އިންޑިއާގެ ބޮޑުވަޒީރު ނަރެންދުރަ މޯދީ ވެރި ރަށް މާލޭގައި އުޅުއްވާތީ ރަށުގެ ބޮޑު ސަރަހައްދެއް ފުލުހުން ބަންދުކޮށް، އިސްލާމީ މަރުކަޒަށް ނަމާދަށް އެރުން ވެސް މަނާކޮށްފި އެވެ.
މިއަދު އިސްލާމީ މަރުކަޒުގައި އަސްރު ނަމާދަށް ބަންގި ގޮވިއިރު އިމާމު ފިޔަވައި ހުރީ އެންމެ މީހެކެވެ. މަރުކަޒަކީ 5000 މީހުންގެ ޖާގައިގެ މިސްކިތެކެވެ.
"އަސުރަށް ބަންގި ގޮވައިފިން، މިސްކިތުގައި އެންމެ މީހަކު. ދެރަ ދޯ؟،" އިމާމު ފޭސްބުކްގައި ކުރި ޕޯސްޓެއްގައި ވިދާޅުވެފައިވެ އެވެ.
ޖުމްހޫރީ މައިދާނާއި އިސްލާމީ މަރުކަޒުން ފެށިގެން، ބޮޑުތަކުރުފާނު މަގު ބީއެމްއެލް އާއި މުލީއާގެއާ ހަމައަށް އެއްގޮތަކަށް ވެސް ވަނުން މަނަ އެވެ. ގަޑިން 6:00 ޖަހަންދެން އެ ސަރަހައްދު މުޅިން ބަންދު ވާނެ ކަމަށް ފުލުހުން ބުނެ އެވެ.
"އިންޑިއާގެ ބޮޑުވަޒީރު ރާއްޖެއަށް ކުރައްވާ ރަސްމީ ދަތުރުފުޅާ ގުޅިގެން ޖޫމްހޫރީ މައިދާން ސަރަހައްދު 2025 ޖުލައި 26 ވަނަ ދުވަހުގެ 11:00 އިން 18:00 އަށް ބަންދުކުރެވޭނެ ވާހަކަ ދަންނަވަން. މި ކަންކަމާ ގުޅިގެން ދިމާވެދާނެ ދަތިތަކަށް މައާފަށް އެދެން. އަދި މިފަދަ ކަންކަމުގައި އާންމުންގެ ފަރާތުން ލިބޭ އެއްބާރުލެއްވުމަށް ޝުކުރުދަންނަވަން،" ފުލުހުން ބުނެފައިވެ އެވެ.
އެ ސަރަހައްދު ބަންދު ކުރީ މޯދީގެ ސަލާމަތީ ކަންކަން ބެލެހެއްޓުމަށެވެ. މޯދީގެ ސެކިއުރިޓީ ބަލަހައްޓަނީ ދިވެހި ސިފައިންގެ އިތުރުން ބޮޑުވަޒީރާއެކު ދިވެހިރާއްޖެއަށް އައި ހާއްސަ އިންޑިއާ ސިފައިންގެ ޓީމަކުންނެވެ.
މިއަދު ހެނދުނު 9:06 ގައި ދިވެހިރާއްޖެއަށް ވަޑައިގެންނެވި މޯދީ ވެރި ރަށް މާލެއަށް ވަޑައިގަތީ 2:34 ގަ އެވެ. އެމަނިކުފާނަށް ޖުމްހޫރީ މައިދާނުގައި މަރުހަބާ ދެންނެވީ 21 ބަޑީގެ ސަލާމަކުންނެވެ. އެއަށްފަހު މުއިއްޒާއެކު މޯދީ ވަޑައިގެންނެވީ ރައީސުލްޖުމްހޫރިއްޔާގެ އޮފީހަށެވެ.
ރައީސް އޮފީހުގައި ކުރިއަށް ގެންދެވީ ދެ ގައުމުގެ މެދުގައި ބާއްވާ ރަސްމީ މަޝްވަރާތަކެވެ. އޭގެ ފަހުން ދެ ގައުމުގެ މެދުގައި ސޮއި ކުރި އެއްބަސްވުންތައް ބަދަލު ކުރުމުގެ ހަރަކާތް މިހާރު ކުރިއަށްދަނީ އެވެ. އެ ކަންކަން ނިމުމުން، ދެ ގައުމުގެ ވެރިން ނޫސްވެރިންނަށް ސްޓޭޓްމަންޓެއް ދެއްވާނެ އެވެ.
