އިންޑިއާގެ ބޮޑުވަޒީރު ނަރެންދުރަ މޯދީއަކީ މުސްލިމުން މަރާ ޓެރަރިސްޓެއް ކަމަށް ބުނެ ސަލަފް ޖަމިއްޔާގެ ރައީސް އަބްދުﷲ ބިން މުހައްމަދު އިބްރާހިމް ސޯޝަލް މީޑިއާގައި ކުރެއްވި ޕޯސްޓު ޑިލީޓްކުރީ ސަލަފުން އަންގައިގެންކަން އެނގިއްޖެ އެވެ.
ސަލަފުގެ ތަރުޖަމާނު މުހައްމަދު ތަސްލީމް އަދަދު އިން ކުރި ސުވާލަކަށް ޖަވާބު ދެއްވަމުން ވިދާޅުވީ މޯދީއާ ގުޅޭގޮތުން އަބްދުﷲ ކުރެއްވި ޕޯސްޓު ޑިލީޓްކުރަން ސަލަފުން އެންގީ އެ ޖަމިއްޔާގެ އުސޫލާއި ގަވާއިދުގެ ތެރެއިން އެކަން ގޮސްފައި ނެތީމަ ކަމަށެވެ.
"ޖަމިއްޔާގެ ރައީސް ވެސް މިހާރު ޓުވީޓުކޮށްފައި އޮތީ ކޮމިޓީއަށް ނުވެސް އެނގި. މިކަހަލަ ހައްސާސް މައްސަލައެއްގައި އެހެންވީމަ އެ އުސޫލުން ގަވާއިދުގެ ތެރެއިން އެކަން ގޮސްފައި ނެތީމަ ކޮމިޓީން އަންގާފައި އެއޮތީ ރައީސަށް އެ ޑިލީޓްކުރަން. އެހެންވެގެން އެ ޑިލީޓްކޮށްފައި އެ އިނީ،" އޭނާ ވިދާޅުވި އެވެ.
ތަސްލީމް ވިދާޅުވީ ސަލަފުގެ އެތެރޭގެ ހިންގުން ރަނގަޅު ކުރުމަށް އައު އުސޫލުތަކެއް ކަނޑައަޅާފައިވާއިރު، އެ އުސޫލުތަކުގެ ބޭރުން ކަމެއް ހިނގާނަމަ އެކަމެއް ރަނގަޅުކުރަން އަންގާނެ ކަމަށެވެ.
"ޑިލީޓްކުރީ އަސްލު މިހާރު ޖަމިއްޔާގެ އެތެރޭގެ ހިންގުން ރަނގަޅު ކުރުމުގެ ގޮތުން ހުންނާނެ އުސޫލުތަކެއް މިހާރު ކަނޑައެޅިފައި ވަރަށް ފަހު. ދެން އޭގެ ތެރެއިން އެ އުސޫލުން ބޭރުން ކަންކަން ދާ ކަމަށްވަންޏާމުން އޮންނަ ގޮތަކީ ހަމަ ކޮމިޓީން އަންގާނެ ކަންކަން ރަނގަޅު ކުރަން،"
މިދިޔަ ހޯމަ ދުވަހުގެ ރޭ އަބްދުﷲ ޕޯސްޓެއް ކުރެއްވީ މިނިވަން ދުވަސް ފާހަގަ ކުރަން ބާއްވާ ހަފުލާގެ ޝަރަފުވެރި މެހެމާނުގެ ގޮތުގައި ބައިވެރިވެވަޑައިގަތުމަށް މޯދީ މާލެ ވަޑައިގަންނަވާތީ އެކަމާ ނުރުހުންވެ އެވެ.
"މޯދީއަކީ އިސްލާމުންގެ ބޮޑު އަދާވާތްތެރިއެއް، ބާބަރީ މިސްކިތް ތަޅާ، އެތާ ފައްޅި އަޅައި، މުސްލިމުންގެ ދުވަސްވީ ބިންތައް ފޭރެމުންގެންދާ، އެތައް މުސްލިމުންނެއް އަންދާލައި، އަހުމަދު އާބާދު ގަބުރުސްތާނަށް ހެދި ޓެރަރިސްޓެއް. މި ރާއްޖޭގެ ކަންކަމުގެ ޝަރަފު އޭނާއަށް ދިނުމަކީ ބޮޑު މުސީބާތެއް،" އަބްދުﷲ ބުނެފައިވެ އެވެ.
އަންނަ ހޮނިހިރު ދުވަހު ބާއްވާ މިނިވަން ދުވަހުގެ ޖަލްސާގައި ބައިވެރިވެވަޑައިގަތުމަށް މޯދީ ވަޑައިގަންނަވާނީ މާދަމާ އެވެ. ޖަލްސާގައި ބައިވެރިވެވަޑައިގެންނެވުމަށްފަހު ޖުލައި 26، ގައި މޯދީ ރާއްޖެއިން ފުރާވަޑައިގަންނަވާނެ އެވެ.
މޯދީއަކީ މި ވެރިކަމުގައި ރާއްޖެ ވަޑައިގަންނަވާ އެންމެ ފުރަތަމަ ހެޑް އޮފް ސްޓޭޓް އެވެ. އަދި މިއީ ދިވެހިރާއްޖެއަށް މޯދީ ކުރައްވާ ތިން ވަނަ ޒިޔާރަތެވެ.
