ރައީސް ޑރ. މުހައްމަދު މުއިއްޒުގެ ސްޕެޝަލް އެންވޯއީގެ މަގާމަށް ކުރީގެ ރައީސް ޑރ. މުހައްމަދު ވަހީދު ހަސަން އައްޔަންކުރައްވައިފި އެވެ.
ރައީސް އޮފީހުން ބުނީ އެ މަގާމަށް ވަހީދު އައްޔަންކުރީ މިއަދު ހެނދުނު އެ އޮފީހުގައި ބޭއްވި ހާއްސަ ރަސްމިއްޔާތެއްގައި ކަމަށެވެ. އެ މަގާމަށް އެމަނިކުފާނު އައްޔަންކުރީ މުސާރަ ނުލިބޭ ގޮތަށް ކަމަށް ރައީސް އޮފީހުން ބުނެފައިވެ އެވެ.
މިއަދުގެ ރަސްމިއްޔާތަށްފަހު ދެ ރައީސުން ބައްދަލުކުރައްވާ މަޝްވަރާކުރެއްވި އެވެ. މި ބައްދަލުވުމުގައި ވަހީދަކީ ވަރަށް ގާބިލު ބޭފުޅެއް ކަމަށް ވިދާޅުވެ ރައީސް މުއިއްޒު އެމަނިކުފާނުގެ އަރިހުން ސަރުކާރުގެ ޖާރިޖީ ގުޅުންތައް ވަރުގަދަ ކުރުމަށް އެދިވަޑައިގެންނެވި ކަމަށް މިކަމާ ގުޅިގެން ރައީސް އޮފީހުން އާންމުކުރި ހަބަރުގައި ބުނެފައިވެ އެވެ.
އެގޮތުން އިގުތިސޯދީގޮތުން ނަފާ ލިބޭނެ ކަންކަން މަގުފަހިކުރުމަށް ގައުމުތަކާއެކު މަޝްވަރާކުރެއްވުމަށް އިރުޝާދު ދެއްވާ އަލަށް އައްޔަންކުރެއްވި މަގާމުގެ މަސްއޫލިއްޔަތު އަދާކުރުމުގައި ރައީސް މުއިއްޒުގެ ފަރާތުން ވަހީދަށް ފުރިހަމަ އެއްބާރުލުން ދެއްވާނެ ކަމަށް އެމަނިކުފާނު ވިދާޅުވެފައިވެ އެވެ.
އެ ބައްދަލުވުމުގައި ވާހަކަދައްކަވަމުން މަގާމުގެ ޒިންމާ ފުރިހަމައަށް އަދާކުރައްވާނެ ކަމަށް ވިދާޅުވެ ސަރުކާރަށް ހިދުމަތް ކުރަން ފުރުސަތު ދެއްވީތީ ވަހީދު ރައީސް މުއިއްޒު އަށް ޝުކުރު ދެންނެވި ކަމަށް ރައީސް އޮފީހުން ބުނެ އެވެ.
ވަހީދަކީ ރާއްޖޭގައި ގިނަ ޕާޓީތަކަށް ހުޅުވާލައިގެން ބޭއްވި ފުރަތަމަ ރިޔާސީ އިންތިހާބުން ހޮވުނު ސަރުކާރުގެ ނައިބު ރައީސް އެވެ. އެމަނިކުފާނު ރައީސް ކަމާ ހަވާލުވެވަޑައިގެންނެވީ ކުރީގެ ރައީސް މުހައްމަދު ނަޝީދުގެ ވެރިކަން ބަގާވާތަކުން ބަދަލުކުރުމަށްފަހު އެވެ.
ބަގާވާތަށްފަހު ޖެހިގެން އައި އިންތިހާބުގައި ވަހީދު ވާދަކުރެއްވި ނަމަވެސް ލިބިވަޑައިގެންނެވީ އެންމެ 5 ޕަސެންޓު ވޯޓެވެ. އެއަށް ފަހު ސިޔާސީ ކަންކަމާ ދުރުގާ ހުންނެވުމަށްފަހު ވަހީދު އެނބުރި ސިޔާސީ މައިދާނުން ފެނުނީ 2023 ގެ ރިޔާސީ އިންތިހާބާ ދިމާކޮށެވެ.
މި ވެރިކަމުގައި މިހާތަނަށް ވަކި މަގާމެއްގައި ނުހުންނެވި ނަމަވެސް އެކި ހަފުލާތަކުގެ ކުރީ ސަފުން ރައީސް މުއިއްޒު އާއެކު ވަހީދު ފެނިގެން ގޮސްފައިވެ އެވެ.
