ހަނޯއީ، ވިއެޓްނާމް (މެއި 23) - ކުށް ކުރުން ހުއްޓުވުމުގައި އެއްބާރުލުން ނުދޭ ކަމަށް ބުނެ މެސެޖިން އެޕް، ޓެލެގްރާމް ވިއެޓްނާމްގައި ބްލޮކް ކުރަން އެ ގައުމުގެ ޓެކްނޮލޮޖީ މިނިސްޓްރީން ނިންމައިފި އެވެ.
ޓެކްނޮލޮޖީ މިނިސްޓްރީގެ ޓެލެކޮމް ޑިޕާޓްމަންޓުގެ ޑެޕިއުޓީ ހެޑް ސޮއިކުރައްވައި މެއި މަހުގެ 21 ވަނަ ދުވަހު އެ ގައުމުގެ ޓެލެކޮމް ކުންފުނިތަކުން ޓެލެގްރާމް ބްލޮކް ކުރުމަށް އަޅާފައިވާ ފިޔަވަޅުތައް ތަންފީޒުކޮށް ޖޫން 2، ގެ ކުރިން އަނބުރާ މިނިސްޓްރީއަށް ރިޕޯޓް ކުރުމަށް ވަނީ އަންގާފަ އެވެ.
މިނިސްޓްރީން މި ގޮތަށް އެންގީ ގައުމީ ސައިބާސެކިއުރިޓީ ޑިޕާޓްމަންޓުން އެދުމުންނެވެ. އެގޮތުން ވިއެޓްނާމްގައި ހިންގާ 9،600 އަށްވުރެ ގިނަ ޓެލެގްރާމް ޗެނަލްތަކުގެ ތެރެއިން 68 ޕަސެންޓު ޗެނަލްއަކީ ކުށް ކުރުމަށް ބޭނުންކުރާ ޗެނަލްތަކެއް ކަމަށް ފުލުހުން ބުނެ އެވެ.
އޭގެ ތެރޭގައި ޓެރަރިޒަމްގެ ކުށްތަކަށް ހިތްވަރު ދިނުމާއ، މަކަރާއި ހީލަތުން ފައިސާ އާއި މުދާ ހޯދުމާއި، މަސްތުވާތަކެތި ޓްރެފިކްކޮށް ވިއްކުން ފަދަ ކުށްތައް ހިމެނެ އެވެ.
ޓެކްނޮލޮޖީ މިނިސްޓްރީގެ އޮފިޝަލަކު ވިދާޅުވީ މިގޮތަށް ނިންމީ ޖިނާއީ ތަހުގީގުގައި މައުލޫމާތަށް އެދުމުން ޓެލެގްރާމުން ބޭނުންކުރާ މީހުންގެ ޑޭޓާ ސަރުކާރަށް ނުދިނުމުން ކަމަށެވެ.
ދުނިޔޭގެ އެކި ކަންކޮޅުތަކުގައި ގާތްގަނޑަކަށް އެއް ބިލިއަން މީހުން ބޭނުންކުރާ ޓެލެގްރާމްއަކީ ސެކިއުރިޓީ އާއި ޑޭޓާ ބްރީޗްވުމުގެ މައްސަލަތަކާ ގުޅިގެން ގޮންޖެހުންތަކާ ކުރިމަތިލާން ޖެހިފައިވާ ޕްލެޓްފޯމެކެވެ.
