ރައީސް މުހައްމަދު މުއިއްޒުގެ އާއިލާގެ ވަކީލުގެ ގޮތުގައި ހަރަކާތްތެރިވާ ކުރީގެ ބަންޑާރަ ނައިބު އައިޝަތު އާޒިމާ ޝަކޫރަށް ފުލުހުން ސެކިއުރިޓީ ދޭން ފަށައިފި އެވެ.
އަދަދު ނޫހުން އާޒިމާއަށް ގުޅުމުން އޭނާ ވަނީ ފުލުހުން ސެކިއުރިޓީ ދޭ ކަން ކަށަވަރުކޮށްދީފަ އެވެ. ރައީސްގެ އާއިލާގެ ވަކީލެއްގެ ގޮތުގައި އާޒިމާ ހަރަކާތްތެރިވާން ފެށީ މިދިޔަ މަހުގެ ތެރޭގަ އެވެ.
"އަޅުގަނޑު ހުށަހެޅި މައްސަލައަކާ ގުޅިގެން ފުލުހުން އެސެސްމަންޓު ހެދުމަށްފަހު، ފުލުހުން ނިންމާފައިވާ ގޮތަށް ސެކިއުރިޓީ ލިބެމުންދޭ،" އާޒިމާ ވިދާޅުވި އެވެ.
އެއީ ކޮން މައްސަލައެއްތޯ އެހުމުން އާޒިމާ ވަނީ އެ ތަފުސީލުތައް ހާމަކުރަން ބޭނުންނުވާ ކަމަށް ވިދާޅުވެފަ އެވެ.
އާޒިމާ ދަނީ ރައީސް މުއިއްޒުގެ ދަރިކަލަކާ ގުޅޭ ގޮތުން އިދިކޮޅު އެމްޑީޕީގެ އެކްޓިވިސްޓަކު ވާހަކަ ދެެއްކި ކަމަށް ބުނެ އެ ޕާޓީ އާއި ޕާޓީގެ ޗެއާޕާސަން ފައްޔާޒް އިސްމާއިލް އަދި އެކްޓިވިސްޓު މަރިޔަމް ޒުބައިރު (މަންދީ) ގެ މައްޗަށް ކޮށްފައިވާ ދައުވާތަކުގައި ރައީސްގެ އާއިލާ ތަމްސީލު ކުރައްވަމުންނެވެ.
ސިވިލް ކޯޓު އަދި ފެމިލީ ކޯޓުގައި އެ ދައުވާތައް އުފުލީ ރައީސް މުއިއްޒުގެ އަނބިކަނބަލުން ސާޖިދާ މުހައްމަދު އެވެ. މީގެތެރެއިން މަންދީގެ މައްޗަށް ފެމިލީ ކޯޓުގައި ކުރި ދައުވާގެ ޝަރީއަތް މިހާރު ވަނީ ފަށައިފަ އެވެ.
މި މައްސަލާގައި ދައުވާ ކުރަން ނިންމިކަން އިއުލާނުކުރީ ރައީސްގެ އާއިލާގެ ފަރާތުން ބޭއްވި ނޫސްވެެރިންގެ ބައްދަލުވުމުގައި އާޒިމާ އެވެ.
