މި ސަރުކާރުން ގެންގުޅެނީ ވަކި ކޮޅަކަށް ނުޖެހޭ ހާރިޖީ ސިޔާސަތެއް ކަމަށާއި އދ. ގައި ވޯޓު ދޭ ގޮތުން ރާއްޖޭގެ ސްޓޭންޑު ސާފުވާނެ ކަމަށް ވިދާޅުވުމަށްފަހު ރަޝިޔާ ކުށްވެރިކުރާ މޭރުމުން ލިޔެފައި އޮތް ގަރާރުގެ ދެލި ކޮޕީއަކަށް ދިވެހި ސަރުކާރުން ވޯޓު ދީފި އެވެ.
އެ ވޯޓު އޮތީ މިދިޔަ ބުދަ ދުވަހެވެ. އެ ގަރާރަށް ކިޔާ ނަމަކީ "ކޯޕަރޭޝަން ބިޓްވީން ދަ ޔުނައިޓެޑް ނޭޝަންސް އެންޑް ދަ ކައުންސިލް އޮފް ޔޫރަޕް" އެވެ. ބުދަ ދުވަހު ފާސް ކުރީ އެ އދ. ގެ 81 ވަނަ އާންމު މަޖިލީހަށް އެ ގަރާރު ހުށަހެޅުމަށެވެ.
އެ ގަރާރުގައި މުޅި ޔޫރަޕުގެ އެއްބައިވަންތަކަމާއި ހަމަޖެހުން ކަށަވަރު ކުރުމަށް މަސައްކަތް ކުރުމަށް ގޮވާލައިފައިވެ އެވެ. އަދި ޔޫރަޕުގެ ހަމަޖެހުމަށް ކުރިމަތިވަމުންދާ ބައެއް ގޮންޖެހުންތައް ގަރާރުގައި ފާހަގަކޮށްފައިވެ އެވެ.
އެގޮތުން ޔޫކްރެއިނާ ދެކޮޅަށް ރަޝިޔާއިން ހިންގަނީ އުދުވާނެއް ކަމަށާއި އެކަމުގެ ސަބަބުން ޔަހޫދީންނާ ދެކޮޅު ފިކުރު ޔޫރަޕުގައި ފެތުރެމުންދާ ކަމަށާއި ރަޝިޔާއިން ލާއިންސާނީ އަމަލުތައް ހިންގާ ފަދަ މޭރުމަކުން ގަރާރުގައި ލިޔެފައިވެ އެވެ. އޭގެއިތުރުން ޔޫކްރެއިންގެ ކުޑަކުދިންގެ ހައްގުތައް ކަށަވަރު ކުރުމުގެ ވާހަކަތަކުގެ ތެރެއިން އެ ގައުމުގެ ކުޑަކުދިންނަށް ބައެއްގެ ފަރާތުން ޖިންސީ ގޯނާ ލިބެމުންދާކަމަށް ދޭހަވާ ފަދަ މޭރުމަކުން ވެސް ގަރާރުގައި ބައެއް ހިމަނާފައިވެ އެވެ.
އެ ގަރާރަށް ވޯޓު ނުދިން ސަބަބު ސާފުކޮށްދެއްވަމުން ރަޝިޔާގެ ސަފީރު ވިދާޅުވީ މިހާރު އެ ގަރާރު އޮތް ގޮތުން އެއަށް ތާއީދު ނުކުރެވޭނެ ކަމަށެވެ. އޭނާ ވިދާޅުވީ މީގެ ދެ އަހަރު ކުރިން އެ ގަރާރުގައި ސިޔާސީ ގޮތުން ވަކި މަގުސަދެއް ހާސިލު ކުރުމަށް ބައިތަކެއް ހިމަނާފައިވާ ކަމަށެވެ.
"ކައުންސިލް އޮފް ޔޫރަޕު މިހާރުވެފައި ވަނީ ގާނޫނީ ގޮތުން ބާތިލު އަދި ގާނޫނީ އެއްވެސް ބުރަދަނެއް ނެތް ކަންކަން ކުރިއަރުވާ ޕްލެޓްފޯމަކަށް، އޭގެތެރޭގައި އުދުވާނުތަކުގެ ސަބަބުން ލިބޭ ގެއްލުމުގެ ރެޖިސްޓްރީ ކިޔާ ދަފުތަރު ވެސް ހިމެނޭ،" ރަޝިޔާގެ ސަފީރު ވިދާޅުވި އެވެ.
އެ ގަރާރު ފާސް ކުރީ ރާއްޖެ ހިމެނޭ ގޮތަށް 105 ގައުމެއްގެ ވޯޓާއެކު އެވެ. އެ ގަރާރަށް ވޯޓު ނުދިނީ ނުވަ ގައުމަކުންނެވެ. ވޯޓު ނުދިން ގައުމުތަކުގެ ތެރޭގައި އެމެރިކާ އާއި ރަޝިޔާ ހިމެނެ އެވެ. ޖުމުލަ 33 ގައުމަކުން އެ ވޯޓުގައި ބައިވެރިނުވެ އެވެ. އޭގެ ތެރޭގައި ސައުދީ އަރަބިއްޔާ އާއި އިންޑިއާ އާއި ސްރީ ލަންކާ އާއި ޗައިނާ އާއި އޮމާން އާއިި ޕާކިސްތާނާއި ކުވައިތު އާއި ޔަމަން އަދި މިސްރު ހިމެނެ އެވެ.
ރަޝިޔާގެ އިތުރުން ދެން އެ ގަރާރަށް ވޯޓު ނުދިން ގައުމުތަކުން ވެސް ވޯޓު ދީފައި ނުވަނީ، ރަޝިޔާ އާއި ޔޫކްރެއިންއާ ދެމެދު ހިނގަމުުންދާ ހަނގުރާމައިގައި ރަޝިޔާ ކުށްވެރި ކުރާ މޭރުމުން ގަރާރު ލިޔެފައި އޮތުމުންނެވެ.
އެ ގަރާރަށް ރާއްޖެއިން ވޯޓު ދިންއިރު، މީގެ ކުރިން ރައީސުލްޖުމްހޫރިއްޔާ މުހައްމަދު މުއިއްޒު އެސްޓޯނިއާއަށް ކުރެއްވި ދަތުރުގެ ތެރެއިން އެ ގައުމުގެ ގާނޫނު ހަދާ މަޖިލީހުގެ ރައީސްއާ ބައްދަލު ކުރެއްވުމާ ގުޅޭގޮތުން އެ ގައުމުން އެކްސްގައި ކުރި ޕޯސްޓުގައި ރާއްޖެއިން ޔޫކްރެއިންއަށް ތާއީދު ކުރާތީ ޝުކުރު އަދާކޮށްފައިވެ އެވެ.
ނަމަވެސް އެކަމާ ގުޅިގެން އާންމުންގެ ފާޑުކިޔުން އަމާޒުވުމުން ފޮރިން މިނިސްޓަރު ހަލީލް އެކްސްގައި ހަމަ އެ ދުވަހު ކުރެއްވި ޕޯސްޓެއްގައި ވިދާޅުވީ ރާއްޖެއިން ގެންގުޅެނީ ވަކި ކޮޅަކަށް ނުޖެހޭ ހާރިޖީ ސިޔާސަތެއް ކަމަށާއި ރާއްޖެއިން އދ. ގައި ވޯޓު ދޭ ގޮތުން އެކަން ސާފު ވާނެ ކަމަށެވެ.
"ބައިނަލްއަގުވާމީ މައްސަލަތަކާ ގުޅޭގޮތުން ރާއްޖެއިން ގެންގުޅޭ ވިސްނުން ބަދަލެއް ނުވޭ، އަޅުގަނޑުމެން އދ ގައި ވޯޓު ދޭ ގޮތުން މިކަން ސާފުވާނެ، ގައުމުތަކުގެ މިނިވަންކަމާއި ސިޔާދަތާއި އިސްތިގުލާލާ ގުޅިފައި ހުންނަ ކަންކަމުގައި ރާއްޖެއިން އަބަދުވެސް ގެންގުޅެނީ އދ ގެ ޗާޓަރާ އެއްގޮތްވާ ގޮތެއްގެ މަތިން ވަކި ކޮޅަކަށް ނުޖެހޭ ސިޔާސަތެއް،" ހަލީލްގެ ޕޯސްޓުގައި ލިޔުއްވާފައިވެ އެވެ.
އެ ދުވަހު ހަލީލް އެހެން ވިދާޅުވުމަށްފަހު ރަޝިޔާ ކުށްވެރިކުރާ މޭރުމުން ލިޔެފައި އޮތް ގަރާރެއްގެ ދެލި ކޮޕީއަށް ވޯޓު ދިނުމުން ބައެއް ފަރާތްތަކުން ދަނީ ފާޑުކިޔަމުންނެވެ.
