ދެކުނު އޭޝިއާގެ ކުޑަ ކުދިންގެ ފަލަވުމުގެ މައްސަލައަށް އަސަރުކުރާ މުހިންމު ހަ ކަމެއް ކެނެޑާގެ މެކްމާސްޓަ ޔުނިވާސިޓީގެ ދިރާސާއަކުން ހޯދައިފި އެވެ.
"ޖަމާ ނެޓްވޯކް އޯޕެން" ޖާނަލްގައި ޝާއިއުކޮށްފައިވާ މި ދިރާސާގެ މައިގަނޑު ހޯދުންތަކުގެ ތެރޭގައި، މަންމައިންނާ ގުޅުންހުރި ތިން ކަމަކާއި، ކުއްޖާއާ ގުޅުންހުރި ތިން ކަމެއް ހިމެނެ އެވެ.
މަންމައާ ގުޅުންހުރި ކަންތައްތަކުގެ ތެރޭގައި، މާބަނޑުވުމުގެ ކުރިން ފަލަވެފައި ހުރުމާއި، މާބަނޑު ދުވަސްވަރު ބަރުދަން އެކަށީގެންނުވާ ވަރަށް އިތުރުވުމާއި، ސިއްހަތަށް ފައިދާހުރި ކާނާ ނުކެއުން ހިމެނިފައިވެ އެވެ.
ކުއްޖާއާ ގުޅުންހުރި ކަންތައްތަކުގެ ތެރޭގައި، ގާތުން ކިރުދިނުމުގެ މުއްދަތު ކުރުވުމާއި، ދުވާލެއްގެ މައްޗަށް ކުރާ ޖިސްމާނީ ހަރަކާތްތައް މަދުވުމާއި، ސްކްރީން ބަލާ ވަގުތު ގިނަވުން ހިމެނެއެވެ.
ދިރާސާގެ ފުރަތަމަ ލިޔުންތެރިޔާ، ޑރ. ސަންޑީ އަޒާބް ވިދާޅުވީ "ދެކުނު އޭޝިއާގެ ކުދިންނަކީ ފެނޯޓައިޕަކަށް ނިސްބަތްވާ ކުދިންނެވެ. މި ކުދިން އާންމުކޮށް އުފަންވާއިރު ހުންނަނީ ލުއި ބަރުދަނެއްގައި ނަމަވެސް، ހަށިގަނޑުގެ މުޅި ނިސްބަތުން ވަނީ ބަރުދަން މަތި" ކަމަށެވެ.
ދިރާސާގެ ކޮރެސްޕޮންޑިން އޯތާ، ޕްރޮފެސަރު ސޮނިޔާ އަނަންޑް ވިދާޅުވީ "އެމީހުންގެ އައު ހޯދުންތަކުން ފާހަގަކުރެވުނު އެންމެ މުހިންމު ކަމަކީ، މި ހުރިހާ ކަމަކީވެސް ބަދަލުކުރެވިދާނެ ކަންތައްތަކެއް" ކަމަށެވެ.
މި ދިރާސާއިން ހުށަހަޅާފައިވާ ގޮތުގައި ސިއްހީ މަރުކަޒުތަކުން، ކުދިންނަށް މި ކަންތައްތަކުގެ ރިސްކް ސްކޯއެއް ދިނުމަކީ މުހިންމު ކަމެކެވެ. ރިސްކު މަތި ކުދިން ދެނެގަނެ، އެކުދިންނަށް ހާއްސަ އަޅާލުމެއް ދީ، ފަލަވުމުގެ މައްސަލަ ކުޑަކުރުމަށް މަސައްކަތްކުރެވިދާނެއެވެ.
މި ދިރާސާއަކީ ކެނެޑާއާއި ޔުނައިޓެޑް ކިންގްޑަމްގެ 3,000 އަށްވުރެ ގިނަ ކުދިން ހިމެނޭގޮތަށް ކުރެވުނު ބޮޑު ދިރާސާއެކެވެ. ދިރާސާގައި ދެކުނު އޭޝިއާ އަދި ޔޫރަޕްގެ ދޮން ނަސްލުގެ ކުދިން ހިމެނިފައިވާކަން ފާހަގަކޮށްލެވެއެވެ.
ދިރާސާއިން ބާރުއަޅާފައިވަނީ، ފަލަވުމުގެ މައްސަލަ ހައްލުކުރުމަށްޓަކައި، ފަރުދީ އަދި މުޖްތަމަޢުގެ ފެންވަރުގައި ބަދަލުތަކެއް ގެންނަންޖެހޭ ކަމުގައެވެ. މިގޮތުން، މާބަނޑު އަންހެނުންނަށް ރަނގަޅު ކާނާ ލިބޭނެ ޕްރޮގްރާމްތަކާއި، ގާތުން ކިރުދިނުމަށް ބޭނުންވާ ވަސީލަތްތައް ފަސޭހައިން ލިބޭނެގޮތް މަގުފަހިކުރުން ހިމެނެއެވެ.
