ލަންޑަން (އޭޕްރީލް 4) - އިނގިރޭސި ޕްރިމިއާ ލީގުގައި ރޭ ޓޮޓެންހަމް ހޮޓްސްޕާސް 1-0 އިން ބަލިކޮށް ޗެލްސީ ލީގުގެ ހަތަރު ވަނަ އަށް ޖެހިލައިފި އެވެ.
ޗެލްސީ ހަތަރަކަށް އެރީ 30 މެޗުން 52 ޕޮއިންޓާ އެކު އެވެ. ފަސް ވަނައިގައި އޮތީ ލީގުގެ އެންމެ ފަހުން ހަތަރު އަހަރުގެ ވެސް ޗެމްޕިއަން، މެންޗެސްޓާ ސިޓީ އެެވެ. އެ ޓީމަށް ވަނީ 30 މެޗުން 51 ޕޮއިންޓް ލިބިފަ އެވެ. ހަ ވަނައިގައި އޮތީ ނިއުކާސަލް ޔުނައިޓެޑް އެވެ. އެ ޓީމަށް ވަނީ 30 މެޗުން 50 ޕޮއިންޓް ލިބިފަ އެވެ.
ސްޓެމްފޯޑް ބްރިޖުގައި ރޭ ކުޅުނު މި މެޗުގައި، ޗެލްސީން ޖެހި ހަމައެކަނި ގޯލު ކާމިޔާބުކުރީ އެ ޓީމުގެ ކެޕްޓަން، އެންޒޯ ފެނާންޑޭޒް އެވެ. މިއީ، ދެ ވަނަ ހާފު ފެށިގެން ފަސް މިނިޓް ތެރޭ، ކޯލް ޕާމާ ނަގައިދިން ބޯޅައަކުން އެންޒޯ ޖެހި ގޯލެކެވެ.
އޭގެ ފަހުން، ޗެލްސީގެ މޮއިސަސް ކައެސޭޑޯ ވަނީ ޗެލްސީ އަށް ދެ ވަނަ ގޯލެއް ޖަހައިދީފަ އެވެ. އެކަމަކު، ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު ނިންމީ އޮފްސައިޑް ކަމަށެވެ.
ބަދަލަކަށް ކުޅެން އެރި، ޓޮޓެންހަމްގެ މިޑްފީލްޑަރު، ޕަޕެ މަޓާ ސާ ވަނީ ގޯލެއް ޖަހައިފަ އެވެ. އެކަމަކު، އެ ބޯޅަ ފޮނުވާލުމުގެ ކުރިން ސާ ވަނީ ޗެލްސީގެ ކައެސޭޑޯ އަށް ފައުލުކޮށްފަ އެވެ.
މި ނަތީޖާ އިން ބަލިވެ، ލީގުގެ ގަދަ 10 ތެރޭގައި ނިންމުމުގެ ފުރުސަތު ޓޮޓެންހަމް އަށް ވަނީ ހަނިވެފަ އެވެ. ޓޮޓެންހަމް އަށް 30 މެޗުން 34 ޕޮއިންޓް ލިބިފައިވާއިރު، އެ ޓީމު އޮތީ ލީގުގެ 14 ވަނައިގަ އެވެ. ޓޮޓެންހަމް އެންމެ ފަހުން، ލީގުގެ ގަދަ 10 އިން ބޭރުން ނިންމީ، 2008 ވަނަ އަހަރުގެ ސީޒަނުގަ އެވެ.
