ވޮޝިންޓަން، އެމެރިކާ (އެޕްރީލް 2) - އެމެރިކާއަށް ގައުމުތަކުން އިމްޕޯޓް ކުރާ މުދަލުން މަދުވެގެން 10 ޕަސެންޓުގެ "ރެސިޕްރޮކަލް ޓެރިފް"އެއް ނެގުމަށް އެ ގައުމުގެ ރައީސް ޑޮނާލްޑް ޓްރަމްޕް ނިންމަވައި އެކަން ތަންފީޒު ކުރަން ފެށުމާއެކު ދުނިޔޭގެ ބާޒާރުގައި ތަކެތީގެ އަގުތައް އުފުލި މުޅިން އައު "ވިޔަފާރީގެ ހަނގުރާމަ"އެއް ފެށޭނެކަމުގެ ބިރު ބޮޑުވެއްޖެ އެވެ.
ޓްރަމްޕްގެ ރިޔާސީ ވައުދު ފުއްދެވުމުގެ ގޮތުން އިއްޔެ ވައިޓް ހައުސްގައި ހާއްސަ ރަސްމިއްޔާތެއް ބާއްވައި އެމަނިކުފާނު ވަނީ ރިޔާސީ އޯޑަރެއްގައި ސޮއިކުރައްވާފަ އެވެ. އާ ޓެރިފް ރޭޓުތައް އިއްޔެ އެމެރިކާގެ ސަރުކާރުން އާންމުކޮށްފައިވާއިރު އެޕްރީލް 5، އިން ފެށިގެން ބޭސް ރޭޓުގައި ޓެރިފް ނަގަން ފަށާނެ އެވެ. ބޭސް ރޭޓަކީ 10 ޕަސެންޓެވެ.
ބައެއް ގައުމުތަކުގެ މުދަލުން 10 ޕަސެންޓަށް ވުރެ ބޮޑު ޓެރިފެއް ނަގާނެ އެވެ. އެމެރިކާގެ އެކުވެރި ގައުމުތަކާއި އަދި ވާދަވެރިވާ ގައުމުތަކުން ގެންނަ މުދާ ވެސް ހިމެނޭހެން އެޕްރީލް 9، އިން ފެށިގެން އާންމުކޮށްފައިވާ ރޭޓުތަކުގައި ޓެރިފް ނަގާނެ އެވެ.
އެގޮތުން، ޔޫރަޕިއަން ޔޫނިއަނުން އިމްޕޯޓް ކުރާ މުދަލުން 20 ޕަސެންޓު، ޖަޕާނުން ގެންނަ މުދަލުން 20 ޕަސެންޓު ޓެރިފް ނަގާނެ އެވެ. އެމެރިކާގެ އެންމެ އަވަށްޓެރި ދެ ގައުމު ކަމަށްވާ ކެނެޑާ އާއި މެކްސިކޯއިން ބޯޑަރު ހުރަސްކޮށް ވައްދާ މުދަލުން ނަގާ ޓެރިފްގެ ރޭޓު ހުރީ 25 ޕަސެންޓުގަ އެވެ.
ފިޗް ރޭޓިންސް އެމެރިކާގެ ރިސާޗް ހެޑް ވިދާޅުވި ގޮތުގައި ޓްރަމްޕްގެ ވެރިކަމުގައި އެމެރިކާގެ އިމްޕޯޓް ޓެކްސްގެ ރޭޓް 22 ޕަސެންޓަށް ވަނީ އުފުލިފަ އެވެ. މިދިޔަ އަހަރު އެ އަދަދު ހުރީ 2.5 ޕަސެންޓުގަ އެވެ.
މިއީ އެމެރިކާއިން ގައުމުތަކަށް އެތެރެ ކުރާ މުދަލުން ނަގާ ޓެރިފާއި ޑިއުޓީ ފަދަ ޓެކްސްތަކަށް ރައްދު ދިނުމުގެ ގޮތުން ނިންމެވު ނިންމެވުމެއް ކަމަށް ޓްރަމްޕް ވިދާޅުވި އެވެ. މީގެ ސަބަބުން އަމިއްލަ ގައުމުގައި އުފެއްދުންތެރިކަން އިތުރުވެގެންދާނެ ކަމަށް ޓްރަމްޕް ދެކެވަޑައިގަންނަވަ އެވެ.
މި ޓެރިފްތަކާއެކު ދުނިޔޭގެ އިގުތިސޯދަށް ލޮޅުން އަރައި މަޑުޖެހޭނެ ކަމަށް އިކޮނޮމިސްޓުން ލަފާކުރެ އެވެ. މީގެ ސަބަބުން ރިސެޝަނެއްގެ ބިރު އޮތްކަމަށް ވެސް އެ މީހުން އަންނަނީ ބުނަމުންނެވެ.
ޓެރިފްތައް މަތިކުރުމާ ގުޅިގެން ފާއިތުވި ގަރުނުގެ މެދުތެރެއިން ފެށިގެން އަމަލުކުރަމުން އަންނަ ދުނިޔޭގެ ވިޔަފާރީގެ އިންތިޒާމުތަކަށް ބަރޯސާވެފައިވާ މާލީ ބާޒާރުތަކާއި ވިޔަފާރިތައް ހާސްކަމަކަށް ވެއްޓިފަ އެވެ.
ޓްރަމްޕް ނަންގަވަން ފެއްޓެވި ޓެރިފްތަކުގެ އަގު އާހިރުގައި ދައްކަން ޖެހޭނީ އެމެރިކާގެ އާންމު ރައްޔިތުން ކަމުން އެކަމުގެ ކަންބޮޑުވުން ވެސް ދަނީ ބޮޑުވަމުންނެވެ.
