ކައުނު ނުވަތަ ދުނިޔެ ދައުރުވަމުންދިއުމުގައި ޒިންމާވާކަމަށް ބެލެވޭ ސިއްރުވެރި ބާރު ނުވަތަ ހަކަތަ ކުރިން ހީކުރިގޮތާ ހިލާފަށް ބަދަލުވަމުންދާ ކަމަށް އާ ދިރާސާއަކުން ދައްކައިފި އެވެ.
ދުނިޔޭގެ އެންމެ ބޮޑު ޓެލެސްކޯޕްތަކުގެ ތެރެއިން އެއް ޓެލެސްކޯޕް ކަމުގައިވާ ނިކޮލަސް ޔޫ. މަޔަލް 4-މީޓަރު ޓެލެސްކޯޕުން ކުރެވުނު އައު ދިރާސާއަކުން، ޔުނިވާސް ފުޅާވަމުންދާ ބާރުމިނަށް ބަދަލު އަންނަމުންދާކަމަށް ދައްކާފައިވާއިރު، މިކަން ދައްކުވައިދެނީ ޑާކް އެނާޖީ ކަމަށް ބުނެވޭ، މިހާތަނަށް ނޭނގޭ ބާރު ކުރިން ގަބޫލުކުރެވިފައިވާ ގޮތާ ހިލާފަށް އަމަލުކުރަމުންދާކަމެވެ.
ޑާކް އެނާޖީ ސްޕެކްޓްރޮސްކޮޕިކް އިންސްޓްރުމަންޓް (ޑީއީއެސްއައި) އިން ކުރެވުނު މި ދިރާސާގައި، 15 މިލިއަނަށްވުރެ ގިނަ ގެލެކްސީ އަދި ކުއާސަތަކުގެ މައުލޫމާތު ބޭނުންކޮށްފައިވެއެވެ. މި ދިރާސާގެ ނަތީޖާއިން ދައްކާގޮތުގައި، ޑާކް އެނާޖީއަކީ އެއްހަމައެއްގައި ހުންނަ ބާރެއް ނޫނެވެ. މިއީ ކުރިން ސައިންޓިސްޓުން ގަބޫލުކޮށްފައިވާ ގޮތާ ތަފާތު ހޯދުމެކެވެ.
މި ދިރާސާގެ ނަތީޖާއިން ދައްކާގޮތުގައި، ކައުނުގެ އެކްސްޕޭންޝަން ރޭޓް ވަގުތާއެކު ބަދަލުވަމުން އަންނަކަމަށް ފާހަގަކުރެވެއެވެ. މިކަމުގެ ސަބަބުން، މިހާތަނަށް ކައުނުގެ އުފެދުމާއި ތަރައްގީ ވަމުން އައި ގޮތް ދެނެގަތުމަށް ބޭނުންކުރެވެމުން އައި ސްޓޭންޑަރޑް މޮޑެލްގެ ސައްހަކަމާމެދު ސުވާލު އުފެދިފައިވެއެވެ.
ޑީއީއެސްއައި އަކީ އެއްފަހަރާ 5،000 ގެލެކްސީގެ އަލި ކެޕްޗާކުރުމުގެ ގާބިލުކަން ލިބިފައިވާ އާލާތެކެވެ. މިކަމުގެ ސަބަބުން ބޮޑެތި ކޮސްމިކް ސްޓްރަކްޗާތައް ދިރާސާކުރުމާއި، ޔުނިވަރސްގެ ފުޅާވަމުންދާ މިންވަރަށް އަންނަ ބަދަލުތައް ވަޒަންކުރުމުގެ ފުރުސަތު ތަހުގީގުކުރާ ފަރާތްތަކަށް ލިބިގެންދެއެވެ.
މި ދިރާސާގެ ނަތީޖާއަކީ ކޮސްމޮލޮޖީގެ ދާއިރާއަށް ލިބުނު ވަރަށް މުހިންމު ކުރިއެރުމެކެވެ. އަދި މިކަމުގެ ސަބަބުން ޔުނިވަރސްގެ އަސާސީ މަސައްކަތްތަކާ ބެހޭގޮތުން އިތުރު ސުވާލުތަކެއް އުފެދި، އިތުރު ދިރާސާތަކަށް މަގުފަހިވެގެން ދާނެއެވެ.
މި ދިރާސާގެ ނަތީޖާތައް އެހެން ކޮސްމިކް އޮބްޒަވޭޝަންތަކާ އަޅާކިޔާއިރު، ފާހަގަކުރެވޭ ތަފާތުތަކެއް ހުރިކަމަށް ރިޕޯޓުކުރެވިފައި ވެއެވެ. ހާއްސަކޮށް ކޮސްމިކް މައިކްރޯވޭވް ބެކްގްރައުންޑް (ސީއެމްބީ) އާއި ޓައިޕް އައިއޭ ސުޕަރނޯވާތަކުން ލިބޭ މިންތަކާ އަޅާބަލާއިރު މި ތަފާތުތައް ފެންނަން ހުއްޓެވެ.
ސީއެމްބީއަކީ ކައުނުގެ ކުރީކޮޅުގެ ފޮސިލް އަލިކަމަށްވެފައި، މިއީ ކައުނު ފުޅާވެފައިވާ ގޮތް ދެނެގަތުމަށް ބޭނުންކުރެވޭ އެއްޗެކެވެ. އަދި ޓައިޕް އައިއޭ ސުޕަނޯވާތަކަކީ އޭގެ އެއްވަރު އަލިކަމުގެ ސަބަބުން "ސްޓޭންޑަރޑް ކޭންޑަލްސް" ގެ ގޮތުގައި ބެލެވޭ، ދުރުމިން ވަޒަންކުރުމަށް ބޭނުންކުރެވޭ މުހިންމު ވަސީލަތެކެވެ.
ޑީއީއެސްއައި އިން ލިބުނު މައުލޫމާތުން ދައްކާގޮތުގައި، ޑާކް އެނާޖީގެ ނުފޫޒު ވަގުތާއެކު ދަށްވަމުން އައިސްފައިވާކަމަށް ލަފާކުރެވެ އެވެ. މިއީ މިހާތަނަށް ގަބޫލުކުރެވިފައިވާ ކޮސްމޮލޮޖިކަލް މޮޑެލްއާ ޚިލާފު ކަމެކެވެ. މިހާތަނަށް ގަބޫލުކުރެވިފައިވަނީ ޑާކް އެނާޖީގެ ނުފޫޒު ބަދަލުނުވެ ދެމިހުންނާނެ ކަމަށެވެ.
ރަސްމީ ނޫސްބަޔާނެއްގައި ވާހަކަދައްކަވަމުން، ޑީއީއެސްއައި ޕްރޮޖެކްޓްގެ ސައިންޓިސްޓް އާޖުން ޑޭ ވިދާޅުވީ މި ހޯދުންތަކުގެ ސަބަބުން އިންސާނުން ޔުނިވަރސްއާމެދު ދެކޭގޮތް އަލުން މާނަކުރަން ޖެހިދާނެ ކަމަށެވެ. ޑީއީއެސްއައި އިން ކުރިއަށްދާ އޮބްޒަވޭޝަންތަކުން ޑާކް އެނާޖީގެ ދައުރާ ބެހޭ މައުލޫމާތު އިތުރަށް ފުރިހަމަވެގެންދާނެ އެވެ.
މި ޕްރޮޖެކްޓް ނިމޭއިރު، ޑާކް އެނާޖީ ބަދަލުވަމުންދޭތޯ އިތުރަށް ސާފުވެ، ޔުނިވަރސް ތަރައްގީވަމުން އައި ގޮތާ ބެހޭ މިހާރުގެ ނަޒަރިއްޔާތަކަށް ބަދަލު އަތުވެދާނެކަމަށް ސައިންޓިސްޓުން ލަފާކުރެ އެވެ.
