އައްޑޫ ހަންކެޑެ އިންޓަގްރޭޓެޑް ޓޫރިޒަމް ކޮންސެޕްޓަށް ތަރައްގީ ކުރަން ޗައިނާގެ ކުންފުންޏަކާ ހަވާލު ކުރިތާ ދެ އަހަރު ދުވަސް ފާއިތުވެގެންދިޔައިރު ވެސް އެތަނުގެ ބިން ސާފު ކުރުން ފިޔަވައި އެއްވެސް މަސައްކަތެއް ނުހިނގައި އޮތީ އެ މަޝްރޫއުއަށް ބޭނުންވާ ފައިސާ ހަމަނުޖެހޭތީކަން އެނގިއްޖެ އެވެ.
އެކަމާ ގުޅޭގޮތުން އަދަދު އާ ވާހަކަ ދެއްކި ބައެއް މީހުން ބުނީ އެ މަޝްރޫއު ހިންގަން ބޭނުންވާ ފައިސާ ހޯދަނީ ލޯނު ނަގައިގެން ކަމަށެވެ. ނަމަވެސް، ފައިސާ ހަމަނުޖެހި އޮތީ، ޗައިނާއަށް ދައްކަންޖެހޭ ލޯނުތައް ރީފައިނޭންސް ކޮށްދޭން ރާއްޖެއިން އެދިފައިވާތީ އެ ގައުމުގެ ބޭންކުތަކުން މިވަގުތު ލޯނު ހޯދަން ދަތިވުމުންނެވެ.
އިންޓަގްރޭޓެޑް ޓޫރިޒަމް ކޮންސެޕްޓަށް ހަންކެޑެ ތަރައްގީ ކުރަން މިދިޔަ ސަރުކާރުން ހަވާލު ކުރީ ޗައިނާ ނެޝަނަލް އިލެކްޓްރިކަލް އިންޖިނިއަރިން ކުންފުންޏާ (ސީއެންއީސީ) އެވެ. ހަންކެޑެ ތަރައްގީ ކުރަން ނިންމާފައި އޮތީ ބޭންކް އޮފް ޗައިނާ އިން 142.9 މިލިއަން ޑޮލަރު (2.3 ބިލިއަން ރުފިޔާ) ގެ ލޯނެއް ނަގައިގެންނެވެ.
ނަމަވެސް އެ ތަނުގެ ބިން ސާފު ކުރުން ފިޔަވައި އިތުރު ކަމެއް މިހައިތަނަށް ކޮށްފައެއް ނުވެ އެވެ.
ނަމަވެސް، މިދިޔަ މަހު ސަރުކާރުން ވަނީ ހަންކެޑެ މަޝްރޫއުގެ އަމަލީ މަސައްކަތް އިފުތިތާހު ކުރުމަށް ކަމަށް ބުނެ ރަސްމިއްޔާތެއް ވެސް ބާއްވައިފަ އެވެ. ހަންކެޑެ މަޝްރޫއުގެ އަމަލީ މަސައްކަތް ފަށްޓަވައި ދެއްވީ ހޯމް މިނިސްޓަރު އަލީ އިހުސާނައި, ފަންޑު މެނޭޖްމަންޓު ކޯޕަރޭޝަން (އެމްއެފްއެމްސީ) ގެ މެނޭޖިން ޑިރެކްޓަރު އަހްމަދު ނާޒިމް އަބޫބަކުރުގެ އިތުރުން ސީއެންއީއީސީގެ މަންދޫބެކެވެ.
ޓޫރިޒަމާބެހޭ ގާނޫނަށް ގެނައި 10 ވަނަ އިސްލާހުން ބާރުލިބި ޓޫރިޒަމް އާމްދަނީ އިތުރުކުރުމުގެ ގޮތުން ބިދޭސީންނަށް ގެދޮރު ވިއްކަން ސަރުކާރުން ކުރިޔަށް ގެންދާ ރިއަލް އެސްޓޭޓް ޓޫރިޒަމް ޕްރޮޖެކްޓުތައް ހިންގާ ސަރަހައްދެއްގެ ގޮތުގައި މިދިޔަ ސަރުކާރުން ހަންކެޑެ ކަނޑައެޅީ ޑިސެމްބަރު 2، 2021 ގަ އެވެ.
މި މަޝްރޫއުގެ ދަށުން ހަންކެޑެގައި 2082 ޓޫރިސްޓު އެކި ފަންތީގެ ޓޫރިސްޓު އެކޮމޮޑޭޝަން ފެސިލިޓީތަކެއް ގޮތަށް ގާއިމުކުރާނެ އެވެ. އެއީ;
- ދެ ގްރޭންޑް ހޮޓެލް - 600 އެނދު
- ދެ ޑިލަކްސް ހޮޓެލް - 320 އެނދު
- އަށް ބުޓީކް ހޮޓެލް - 560 އެނދު
- އަށް ސާވިސްޑް އެޕާޓްމަންޓު - 560 އެނދު
- އަށް ބީޗް ވިލާ, ދެ ކޮޓަރީގެ - 32 އެނދު
- ނުވަ ބީޗް ވިލާ, ހަތަރު ކޮޓަރީގެ - 72 އެނދު
މި މަޝްރޫއުއާއެކު އައްޑޫގައި 1,500 ވަޒީފާ އުފެދޭނެ ކަމަށް އެމްއެފްއެމްސީން ލަފާކުރެ އެވެ. މިއީ 25,000 ޓޫރިސްޓުންނަށް އަމާޒުކޮށް ހިންގާ މަޝްރޫއުއެކެވެ.
ހަންކެޑެގެ މަސައްކަތް ނުފެށުނު ނަމަވެސް، އެތަނުުގައި ތަރައްގީ ކުރާ ހޯޓާތައް މެނޭޖުކޮށް ހިންގަން ވަނީ ދުބާއީގެ ޓައިމްސް ހޮޓެލްސް އާއި ކޮންޑުއިޓް ހައުސް އާ ހަވާލުކޮށްފަ އެވެ.
ހަންކެޑެ ތަރައްގީ ކުރުމުގެ މަސައްކަތް ލަސްވަމުން ދާތީ އެމްޑީޕީން މީގެ ކުރިން ވަނީ ކަންބޮޑުވުން ފާޅުކޮށް އެ މަޝްރޫއު ވީހައިވެސް އަވަހަކަށް ފަށައިދިނުމަށް ގޮވާލައިފަ އެވެ.
އައްޑޫގައި ފަތުރުވެރިކަން ކުރި އެރުވުމަށް މިދިޔަ ސަރުކާރުން ވަނީ ފަސް ރަށް ހިއްކައި އައްޑޫ އެއާޕޯޓު ތަރައްގީ ކުރަން ވެސް މަސައްކަތްތަކެއް ކޮށްފަ އެވެ.
