ވެރިކަން ހިންގާ ޕީޕަލްސް ނެޝަނަލް ކޮންގްރެސްގެ މެންބަރުން ކުރިން ވިދާޅުވެފައި ވަކާލާތު ކުރަމުން އައި ގޮތަށް ޖުޑީޝަލް ސާވިސް ކޮމިޝަން އެކުލެވިގެންވާ ގޮތް އިސްލާހު ކުރުމަށް އެފަދަ ބިލެއް މަޖިލީހަށް ފޮނުވުމަށް ބަންޑާރަނައިބު އަހުމަދު އުޝާމަށް މެންބަރު އަހުމަދު އަޒާން މިއަދު ގޮވާލައްވައިފި އެވެ.
ސުޕްރީމް ކޯޓަށް ފަނޑިޔާރު ހުސެއިން ޝަހީދު އައްޔަން ކުރުމުގެ ބަހުސްގައި ވާހަކަ ދައްކަވަމުން އަޒާން ވިދާޅުވީ ޖޭއެސްސީއަށް ސިޔާސީ ބޭފުޅުން އައްޔަން ނުކުރުމަކީ ރައީސް މުހައްމަދު މުއިއްޒުގެ ވައުދެއް ކަމަށެވެ. އެ ވައުދާ އެއްގޮތަށް ޖޭއެސްސީ އެކުލެވިގެންވާ ގޮތް ވީހާ ވެސް އަވަހަށް ބަދަލު ކުރަންޖެހޭ ކަމަށް އޭނާ ވިދާޅުވި އެވެ.
"ރަނގަޅު ފަނޑިޔާރުން ލުމުގެ އިތުރަށް މި ނިޒާމު ވެސް އިސްލާހު ކުރަންޖެހޭ. އިއްޒަތްތެރި ރައީސް، އަޅުގަނޑުމެން އިދިކޮޅުގައި އޮވެ އެންމެ ބާރަށް ދެއްކި ވާހަކައަކީ ޖޭއެސްސީ އިސްލާހު ކުރުމުގެ ވާހަކަ، ހާއްސަކޮށް ޖޭއެސްސީގެ ކޮމްޕޮޒިޝަން ބަދަލު ކުރުމުގެ ވާހަކަ،" އަޒާން ވިދާޅުވި އެވެ. "އަޅުގަނޑުމެންގެ އިއްޒަތްތެރި ރައީސުލްޖުމްހޫރިއްޔާ ވަނީ ޖޭއެސްސީއަށް ސިޔާސީ ބޭފުޅުން އައްޔަން ނުކުރައްވާނެ ކަމަށް ވިދާޅުވެފައި. އެމަނިކުފާނުގެ ވައުދުފުޅެއް އެއީ."
އަޒާން ވިދާޅުވީ ޖޭއެސްސީ އިސްލާހު ކުރުމުގެ ބިލެއް ބަންޑާރަނައިބު ހުށަހަޅުއްވައިފި ނަމަ މަޖިލީހުން އެ ބިލު ވަގުތުން ފާސް ކުރާނެ ކަމަށެވެ.
"އަޅުގަނޑު ގޮވާލަން ރައީސްގެ ވައުދުފުޅާ އެއްގޮތަށް ދައުލަތު ބަންޑާރަނައިބު ޖޭއެސްސީގެ ކޮމްޕޮޒިޝަން އިސްލާހު ކުރައްވަން ވީ އެންމެ އަވަހަށް ބިލެއް މި އިއްޒަތްތެރި މަޖިލީހަށް ހުށަހަޅުއްވަން. އަޅުގަނޑުމެންގެ އިއްޒަތްތެރި މެންބަރުން މި ތިބީ އެފަދަ ބިލެއް ހުށަހަޅުއްވައިފި ނަމަ ވަގުތުން ފާސް ކުރަން ތައްޔާރަށް،" އޭނާ ވިދާޅުވި އެވެ.
ޖޭއެސްސީގައި އޮތީ ސަރުކާރުގެ ކޮންޓްރޯލެވެ. އެއީ މަޖިލީހުގައި ވެސް ސަރުކާރުގެ މެޖޯރިޓީ އޮތުމުންނެވެ. އެ ކޮމިޝަނުގައި 10 މެންބަރުން ހިމެނޭއިރު ރައީސް އައްޔަން ކުރައްވާ މެންބަރަކާއި ބަންޑާރަ ނައިބާއި މަޖިލީހުގެ ރައީސް އާއި މަޖިލީހުގެ މެންބަރެއް ވެސް ހިމެނެ އެވެ.
ސުޕްރީމް ކޯޓަށް އަލުން ފަނޑިޔާރަކު އައްޔަން ކުރަން މި މަސައްކަތް ކުރަނީ، ރައީސް މުއިއްޒާއި ބަންޑާރަނައިބު އަހުމަދު އުޝާމް އެންމެ މަތީ ކޯޓުގެ ފަނޑިޔާރުންނަށް ބިރުދައްކަވާ ކަމަށް ވިދާޅުވެ އެ ކޯޓުގެ ފަނޑިޔާރު ހުސްނުއްސުއޫދު އިސްތިއުފާ ދެއްވުމުންނެވެ.
ސުއޫދު އިސްތިއުފާ ދެއްވިއިރު ހުންނެވީ ސަސްޕެންޑުކޮށްފަ އެވެ. ސުއޫދާއެކު ފަނޑިޔާރު މަހާޒް އަލީ ޒާހިރާއި ފަނޑިޔާރު އަޒްމިރާލްދާ ޒާހިރު ވެސް ސަސްޕެންޑު ކުރި އެވެ. ފަނޑިޔާރުން ސަސްޕެންޑު ކުރީ ސިޔާސީ ޕާޓީތަކަށް މެންބަރުންގެ ގޮނޑި ގެއްލުވައިލެވޭ ގޮތަށް ގާނޫނުއަސާސީ އިސްލާހު ކުރި މައްސަލައިގެ ޝަރީއަތް ފެށެން ކުޑަތަންވެފައި އޮއްވައި، ޝަރީއަތަށް ހުރަސްއެޅޭ ގޮތަށެވެ.
ފަނޑިޔާރުން ސަސްޕެންޑު ކުރި ދުވަހު، ސުޕްރީމް ކޯޓުގެ ދެ ފަނޑިޔާރުން މަގާމުން ވަކި ކުރަން މަޖުބޫރުވާ ގޮތަށް ރައްޔިތުންގެ މަޖިލީހުން ގައިރު ގާނޫނީ ބިލެއް ވެސް ފާސް ކުރި އެވެ. ނަމަވެސް އެ ބިލު މިހާރު ވަނީ އަނބުރާ މަޖިލީހަށް ފޮނުވާލައިފަ އެވެ.
ފަނޑިޔާރުން ސަސްޕެންޑު ކުރީ އެ ފަނޑިޔާރުންގެ މައްސަލަތަކެއް އެންޓި ކޮރަޕްޝަން ކޮމިޝަނުން ބަލަމުންދާ ކަމަށް ބުނެ އެވެ. ފަހުން އެނގުނު ގޮތުގައި އޭސީސީއިން ބަލަނީ ޖުޑީޝަލް ސާވިސް ކޮމިޝަނުން ވެސް ބަލަމުންދާ މައްސަލަ އެވެ.
އެ މައްސަލައިގައި ފަނޑިޔާރު އަޒްމިރާލްދާ ވަނީ އޭސީސީގެ ރައީސް އާދަމް ޝާމިލްއާ ދެކޮޅަށް އެ ކޮމިޝަނަށް މައްސަލައެއް ހުށަހަޅައިފަ އެވެ. އެ މައްސަލަ އެ ކޮމިޝަނުގައި ރަޖިސްޓްރީ ކޮށްފައިވާ ކަމަށް އޭސީސީއިން ބުނެ އެވެ.
