މޯލްޑިވްސް ސިކްސަސްގެ ނަމުގައި އަންނަ އަހަރު އިންޓަނޭޝަނަލް ކްރިކެޓް މުބާރާތެއް ބޭއްވުމަށް، ކްރިކެޓް ބޯޑް އޮފް މޯލްޑިވްސް (ސީބީއެމް) އިން ލޯންޗުކޮށްފި އެވެ.
ބުދަ ދުވަހުގެރޭ ގިޔާސުއްދީން އިންޓަނޭޝަނަލް ސްކޫލުގައި ބޭއްވި ކްރިކެޓް ހަވީރުގައި ސީބީއެމްގެ ރައީސް، މުހައްމަދު ފައިސަލް އާއި ސްޕޯޓްސް މިނިސްޓަރު، އަބްދުﷲ ރާފިއު (ރާއްޕެ)، ލޯންޗްކޮށްދިން، މޯލްޑިވްސް ސިކްސަސްގެ ފުރަތަމަ މުބާރާތް އޮންނާނީ އަންނަ އަހަރު އެވެ.
މި މުބާރާތުގައި ރާއްޖޭން ބޭރުން ހަ ޓީމެއް ވާދަކުރާ ގޮތަށް ހަމަޖެހިފައިވާ ކަމަށް ކްރިކެޓް ބޯޑުން ވަނީ ބުނެފަ އެވެ.
ދެމެހެއްޓެނިވި ގޮތެއްގައި، ބައިނަލްއަގުވާމީ ކްރިކެޓް މުބާރާތްތައް ރާއްޖެ އަށް ގެނައުމަށްޓަކައި، މަގުކޮށުމުގެ އެންމެ އިސް މަސައްކަތެއްގެ ގޮތުގައި ކުރަން އޮތީ، ކްރިކެޓަށް ހާއްސަ ސްޓޭޑިއަމެއް ގާއިމްކުރުމެވެ. ކްރިކެޓް ބޯޑްގެ ރައީސް، ފައިސަލް ވަނީ، ސްޕޯޓްސް މިނިސްޓަރު ރާފިއުގެ އަރިހުން ކްރިކެޓް އާއިލާގެ ނަމުގައި އިލްތިމާސެއް ކުރައްވައިފަ އެވެ. އެއީ، ކްރިކެޓަށް ހާއްސަ ސްޓޭޑިއަމެއް ގާއިމްކޮށްދިނުމަށް އެދި ކުރި އިލްތިމާސެކެވެ.
ކްރިކެޓް ބޯޑުގެ ރައީސް ފައިސަލް (ވ) އާއި ސްޕޯޓްސް މިިނިސްޓަރު ރާފިއު.--- ފޮޓޯ: މިރާޝް ނާޝިމް / އަދަދު ސްޕޯޓްސް
ސީބީއެމް އިން، ރާއްޖޭގެ ކްރިކެޓް ކުރިއަރުވާ އާލާ ކުރުމަށް ޓަކައި އިތުރު ފަރާތްތަކުގެ އެހީތެރިކަމާ އެއްބާރުލުން ހޯދަމުގެ ގޮތުން ތިން އެއްބަސް ވުމެއްގައި ދާދި ފަހުން ވަނީ ސޮއިކޮށްފަ އެވެ.
އެ ގޮތުން ސޮއި ކުރެވުނު އެއްބަސްވުންތަކުގެ ތެރޭގައި ހިމެނޭ ފުރަތަމަ ކޮންޓްރެކްޓަކީ، ފުވައްމުލައް ކްރިކެޓް ދަނޑު ތަރައްޤީ ކުރާމާއި މޯލްޑިވްސް ޕްރިމިއާ ލީގު ގާއިމު ކުރުމަސް އިނގިރޭސި ވިލާތުގެ ސައުތު އޭޝިއާ ނެޓްވޯކް ލިމިޓެޑްއާ އެކު ސޮއި ކުރެވުނު އެއްބަސްވުމެކެވެ.
ދެ ވަނަ އަށް ސޮއިކުރެވުނު އެއްބަސް ވުމަކީ، ކްރިކެޓް ބޯޑަށް ބޭނުންވާ ޖާޒީ އާއި އެޓަޔާ ހޯދުމުގެ ގޮތުން އިންޑިޔާ ގެ ޓީ10 ސްޕޯޓްސް އާ އެކު ވެވުނު އެއްބަސްވުމެކެވެ. މީގެ އިތުރުން، މޯލްޑިވްސް އިސްލާމިކް ބޭންކް (އެމްއައިބީ)އާއެކު، ގައުމި ކްރިކެޓް ޓީމް ސޮއިކުރި އެއްބަސްވުމުގެ ތެރެއިން، ގައުމީ ޖޯޒީ ތަކުގެ ސްޕޮންސަރ ކުރާނެ އެވެ.
ޖޯޒީ ސްޕޮންސަކުރުމަށް ވެވުނު އެއްބަސްވުމުގެ ތެރެއިން، އެމްއައިބީން އެއް އަހަރު ދުވަހު ގެ މުއްދަތައް ޤައުމީ ޓީމާއި އުމުރު ފުރާތަކުގެ ޓީމުތަކުގެ ޖާޒީ އަދި ދިވެހި އަމްޕަޔަރުންގެ ކިޓް ސްޕޮންސަ ކުރާނެ އެވެ.
