އަލުން ތަރައްގީ ކުރަން ބަންދު ކުރުމަށްފަހު އަލުން ހުޅުވަން ކަނޑައަޅާފައި އޮތް ތަރީހަށް ރިސޯޓެއް ނުހުޅުވައިފި ނަމަ އެއްވެސް ބަދަލެއް ދިނުމަކާ ނުލައި ރިސޯޓުތައް އަތުލެވޭ ގޮތަށް ގާނޫނަށް ބަދަލު ގެންނަން ހުށަހަޅައިފި އެވެ.
ޓުއަރިޒަމްގެ ގާނޫނަށް އެ ބަދަލު ގެންނަން ހުށަހެޅީ ސަރުކާރުގެ ފަރާތުން ތިމަރަފުށީ ދާއިރާގެ މެންބަރު އަހުމަދު ރިޔާޒް ހޯމަ ދުވަހު މަޖިލީހަށް ހުށަހެޅުއްވި ބިލެއްގަ އެވެ.
އެ ބިލުގެ 45 ވަނަ މާއްދާގެ ހ. ގައި ބުނެފައި ވަނީ މިހާރު ވެސް އޮޕަރޭޓު ކުރަމުންދާ ރިސޯޓެއް އަލުން ތަރައްގީ ކުރަން ބަންދު ކުރާ ނަމަ ބަންދު ކުރަންޖެހޭނީ ސަރުކާރުން ކަނޑައަޅާ ތަރީހަކާ ހަމައަށް ކަމަށެވެ. ރިސޯޓެއް ބަންދު ކުރެވޭނީ ރަށް ކުއްޔަށް ދޭން ހަދާފައިވާ އެއްބަސްވުން އިސްލާހު ކުރުމަށްފަހު ކަމަށް ވެސް އެ މާއްދާގައި ބުނެފައިވެ އެވެ.
އެ ބިލުގެ 45 ވަނަ މާއްދާގެ ށ. ގައި ބުނެފައި ވަނީ ރިސޯޓު ހުޅުވަން އެއްބަސްވި މުއްދަތުގެ ތެރޭގައި ތަން ހުޅުވައި، ހިދުމަތް ދޭން ނުފަށައިފި ނަމަ ކުލީގެ އެގްރިމެންޓު ބާތިލު ކުރުމުގެ އިހުތިޔާރު ސަރުކާރަށް ލިބޭނެ ކަމަށެވެ. އަދި އެގޮތަށް އެގްރިމެންޓު ބާތިލު ކުރާއިރު، އެއްވެސް ބަދަލެއް ސަރުކާރުން ދޭން ނުޖެހޭނެ ކަމަށް ވެސް އެ މާއްދާގައި ބުނެފައިވެ އެވެ.
އަލުން ތަރައްގީ ކުރަން ނުވަތަ އެ ނޫން ބޭނުމެއްގައި ވެސް ސަރުކާރުގެ ހުއްދަ ނެތި ރިސޯޓެއް އޮޕަރޭޓު ކުރުން ހުއްޓާލި ނަމަވެސް އެގްރިމެންޓު ބާތިލު ކުރުމުގެ އިހުތިޔާރު ސަރުކާރަށް ލިބޭނެ ކަމަށް އެ ބިލުގެ 45 ވަނަ މާއްދާގެ ނ. ގައި ބުނެފައިވެ އެވެ.
އެ ބިލަށް މިއަދު ބަހުސް ކުރަމުން އިދިކޮޅު މޯލްޑިވިއަން ޑިމޮކްރެޓިކް ޕާޓީގެ ބައެއް މެންބަރުން ވަނީ އެކަމަށް ވަރަށް ބޮޑަށް ފާޑުވިދާޅުވެފަ އެވެ.
"އަޅުގަނޑު ގަބޫލު ކުރަނީ މިއީ ވަރަށް ނުރައްކާތެރި ޕޮއިންޓެއް ކަމަށް މިއީ ގާނޫނުގައި ހިމަނާފައި އިން. ގާނޫނުއަސާސީގެ 40 ވަނަ މާއްދާގެ ށ. އާ ހިލާފަށް ލިޔެވިފައިވާ މާއްދާއަކަށްވުން އެކަށީގެންވޭ. އެއީ 40 ވަނަ މާއްދާގައި ބުނެފައި ވަނީ ޝަރުއީ ގޮތުން ދޭންޖެހޭ ބަދަލެއް ދިނުމަށްފަހު ކަމަށް މީހުންގެ މުދާ ނެގެންޖެހޭނީ،" ހުޅުމާލޭ ދެކުނު ދާއިރާގެ މެންބަރު އަހުމަދު ޝަމްހީދު ވިދާޅުވި އެވެ.
އިދިކޮޅު މެންބަރުން އެ ކަންބޮޑުވުން މަޖިލީހުގައި ހިއްސާ ކުރެއްވި ނަމަވެސް ވެރިކަން ހިންގާ ޕީޕަލްސް ނެޝަނަލް ކޮންގްރެސްގެ މެންބަރުން ވިދާޅުވީ ބަދަލަކައި ނުލައި ރަށް އަތުލެވޭ ގޮތަށް އޮތުމަކީ ރަނގަޅު ގޮތެއް ކަމަށެވެ. އޭގެ މަގްސަދަކީ އޮޕަރޭޝަނަށް ނުގެނެވި ހުރި ރިސޯޓުތައް އަލުން ހުޅުވުން ކަމަށް ބައެއް މެންބަރުން ވިދާޅުވި އެވެ.
"އަޅުގަނޑު ހިމެނޭ އައްޑޫ ސިޓީގައި މިވަގުތު ވެސް ރިސޯޓެއް އެބަ އޮތް، އަޅުގަނޑުމެންގެ ސިޓީގެ ގިނަ ރައްޔިތުންގެ އުއްމީދުތަކާ ގުޅިފައި އިން ތަނެއް، ޒަމާންތަކެއް ވަންދެން ބަންދުކޮށްފައި، އަލުން ހުޅުވޭނެ މަގެއް ނުފެނިފައި. ކޮވިޑުގެ އާލަމީ ވަބާގައި ތަން ބަންދު ކުރުމަށްފަހު އޭރުގެ ސަރުކާރުން ވަނީ އެ ރިސޯޓު އަނބުރާ އޮޕަރޭޝަނަށް ގެނައުމަށް ނުކުޅެދިފަ،" ފޭދޫ އުތުރު ދާއިރާގެ މެންބަރު އިސްމާއިލް ނިޒާރު ވިދާޅުވި އެވެ.
