ޓައިވާން ސެމިކޮންޑަކްޓަ މެނުފެކްޗަރިން (ޓީއެސްއެމްސީ) އިން ކުރިއަށް އޮތް ހަތަރު އަހަރުގެ ތެރޭގައި އެމެރިކާގައި ޗިޕް އުފެއްދުމަށް 100 ބިލިއަން ޑޮލަރު އިންވެސްޓުކުރުމަށް ނިންމާފައިވާކަމަށް އެކުންފުންޏާ ހަވާލާދީ އެންބީސީ އިން ރިޕޯޓް ކޮށްފި އެވެ.
ޓީއެސްއެމްސީއަކީ އެމެރިކާގެ ބޮޑެތި ޓެކް ކުންފުނިތައް ކަމަށްވާ އެންވިޑިއާ އަދި އެޕަލް ފަދަ ކުންފުނިތަކަށް އާޓިފިޝަލް އިންޓެލިޖެންސް (އޭއައި) ބޭނުންކުރުމަށް ސެމިކޮންޑަކްޓަ ސަޕްލައިކޮށްދޭ މައި ކުންފުންޏެވެ.
އެކުންފުނިން ބުނީ އެކުންފުނީގެ މި އިންވެސްޓްމެންޓް މައިގަނޑު މަގުސަދަކީ އެމެރިކާއަކީ އާޓިފިޝަލް އިންޓެލިޖެންސްގެ މައި މަރުކަޒަކަށް ހެދުމަށް ޓްރަމްޕް ސަރުކާރުން ކުރާ މަސައްކަތްތަކަށް އެހީތެރިކަން ފޯރުކޮށްދިނުން ކަމުގަ އެވެ.
ފާއިތުވި މަހު، ޓްރަމްޕް ވަނީ އޯރަކަލް، އޯޕަންއޭއައި އަދި ސޮފްޓްބޭންކާއެކު ބިލިއަން ޑޮލަރުގެ އޭއައި އިންފްރާސްޓްރަކްޗަރގެ ބިޔަ ޕްރޮޖެކްޓެއް އިފްތިތާހު ކޮށްފަ އެވެ.
ޓްރަމްޕް ވަނީ ޓައިވާނުން އެމެރިކާގެ ޗިޕް އުފެއްދުމުގެ ވިޔަފާރި ވަގަށް ނަގާފައިވާކަމަށް ތުހުމަތުކޮށް، ސެމިކޮންޑަކްޓަ އިމްޕޯޓުތަކަށް ޓެރިފް ނެގުމަށް ވަކާލާތުކޮށްފަ އެވެ. އެހެންނަމަވެސް ޓީއެސްއެމްސީގެ މާލީ ވެރިޔާ ވެންޑެލް ހުއާން ވަނީ ޖަނަވަރީ މަހު ސީއެންބީސީއަށް ދެއްވި އިންޓަވިއުއެއްގައި، ވައިޓް ހައުސްގެ އައު އިދާރާއިން އެ ކުންފުނީގެ އެމެރިކާގެ މަސައްކަތްތަކަށް ފަންޑު ދިނުން ކުރިއަށް ގެންދާނެކަމުގެ ޔަގީންކަން އޮތްކަމަށް ވިދާޅުވެފަ އެވެ.
ޓީއެސްއެމްސީއިން ވަނީ 2020 ގައި ވެސް އެރިޒޯނާގައި އެމެރިކާގެ ފުރަތަމަ ޗިޕް ފެކްޓަރީ އިމާރާތްކުރުމަށް 12 ބިލިއަން ޑޮލަރު އިންވެސްޓުކޮށް، އެމެރިކާގައި އެމަސައްކަތް ފުޅާކުރުމަށް މަސައްކަތްތަކެއް ކޮށްފަ އެވެ. އޭގެ ފަހުން ތިންވަނަ ފެކްޓަރީއާއެކު އެ ސްޓޭޓުގައި ކުރާ އިންވެސްޓްމަންޓް 65 ބިލިއަން ޑޮލަރަށް އިތުރުކޮށް، އެމެރިކާ ސަރުކާރުގެ ކޮމާސް ޑިޕާޓްމަންޓުން 6.6 ބިލިއަން ޑޮލަރުގެ ސަބްސިޑީއެއް އެކުންފުންޏަށް ލިބިފައި ވެއެވެ.
ޓީއެސްއެމްސީ އަކީ ދުނިޔޭގެ ޗިޕް އުފައްދާ އެންމެ ބޮޑެތި ކުންފުނިތަކުގެ ތެރެއިން އެއް ކުންފުންޏެވެ. މިކުންފުނިން އުފައްދާ ސެމިކޮންޑަކްޓަރތަކަކީ ޒަމާނީ ޓެކްނޮލޮޖީގެ ބިންގާކަމުގައިވާ ސްމާޓްފޯނު، ކޮމްޕިއުޓަރ އަދި އާޓިފިޝަލް އިންޓެލިޖެންސް ސިސްޓަމްތަކަށް ބޭނުންވާ އެންމެ މުހިންމު ބާވަތްތަކެވެ.
އެމެރިކާއަށް ޗިޕް އުފެއްދުން އިތުރުކުރުމަކީ ސަޕްލައި ޗެއިން ރައްކާތެރިކަމާއި ޓެކްނޮލޮޖީ ދާއިރާގައި ޗައިނާއާ އޮންނަ ވާދަވެރިކަމުގައި ކުރިއަށް ދިއުމަށް ރައީސް ޓްރަމްޕްގެ އިދާރާއިން އިސްކަންދޭ ކަމެކެވެ. 2022 ގައި ފާސްކުރެވުނު "ޗިޕްސް އެންޑް ސައިންސް އެކްޓް" ގެ ދަށުން، އެމެރިކާ ސަރުކާރުން ސެމިކޮންޑަކްޓަރ އިންޑަސްޓްރީއަށް 52 ބިލިއަން ޑޮލަރުގެ ސަބްސިޑީ ދިނުމަށް ނިންމާފައި ވެއެވެ.
