ރައްޔިތުންގެ މަޖިލީހުގެ ހިތަދޫ މެދު ދާއިރާގެ މެންބަރު އަހުމަދު އަޒާން ވެރިކަންކުރާ ޕީއެންސީ އިން ވަކިކޮށްފާނެ ކަމުގެ އަޑުތައް ފެތުރިފައިވަނިކޮށް، އެ ދާއިރާގެ ބައި-އިލެކްޝަނެއްގައި ވާދަކުރާނެ ކެންޑިޑޭޓަކު ހޯދަން ރައީސް ޑރ. މުހައްމަދު މުއިއްޒު އެދިވަޑައިގެންފި އެވެ.
މި ސަރުކާރުގެ އަދި ޕީއެންސީގެ އިސް ސަފުގައި ހިމެނޭ ދެ މަސްދަރަކުން އަދަދު މައުލޫމާތު ދިން ގޮތުގައި އަޒާނުގެ ބަދަލުގައި ކެންޑިޑޭޓަކު ހޯދަން ރައީސް އެދުނީ އެ ޕާޓީގެ ލީޑަޝިޕުގެ އޮފިޝަލުން ތިބޭ ގްރޫޕަކަށް ފޮނުއްވި މެސެޖެއްގަ އެވެ.
ރައީސް މުއިއްޒު އާއި އަޒާން އާ ދެމެދު މައްސަލަ ޖެހުނީ ސުޕްރީމް ކޯޓުގެ ފަނޑިޔާރުންގެ އަދަދު ހަތަކުން ފަހަކަށް މަދުކުރަން މަޖިލީހުން ފާސްކުރި ބިލާ އޭނާ ދެކޮޅު ހެދުމުންނެވެ. އަޒާން ވަނީ ދެ ފަހަރެއްގެ މަތިން ޕީއެންސީގެ ތްރީ ލައިން ވިޕާ ހިލާފުވެފަ އެވެ. އެގޮތުން ބިލު ފާސްކުރަން އިއްޔެ ނެގި ވޯޓުގައި ބައިވެރިނުވެ، އަޒާން ވަނީ މަޖިލިސް ދޫކޮށް ގޮސްފަ އެވެ.
ބިލު ބަލައިގަތުމަށް ނެގި ވޯޓުގައި ބައިވެރިނުވުމާ ގުޅިގެން އަޒާނަށް ރައީސް މުއިއްޒު ވަނީ ނުރުހުން ފާޅުކުރައްވާ ޕީއެންސީގެ ޕީޖީ ވަޓްސްއެޕް ގްރޫޕަށް އަންގާރަ ދުވަހު މެސެޖެއްވެސް ފޮނުއްވާފަ އެވެ. އޭގެ ފަހުން އަޒާން އެ ގްރޫޕުން ބޭރުކޮށްލި އެވެ.
"ޕާޓީން ތްރީލައިން ވިޕެއް ކަނޑައެޅީމަ އެޔާ ހިލާފު ވުމަކީ އެއްވެސް ބޭފުޅަކު ކޮށްގެން ވާނެ ކަމެއް ނޫން. އެއްވެސް ފަހަރަކު،" އެ ދުވަހު ރަސްމީ ދަތުރެއްގައި ދ. އަތޮޅުގައި ހުންނެވި ރައީސް މުއިއްޒު ވަޓްސްއެޕް ގްރޫޕަށް ފޮނުވި މެސެޖުގައި ވިދާޅުވި އެވެ.
ނަމަވެސް މިހާތަނަށް ގްރޫޕުން ބޭރުކުރުން ފިޔަވާ އަޒާން އާމެދު ޕީއެންސީން އިތުރު ފިޔަވަޅެއް އަޅާފައެއް ނުވެ އެވެ.
މި ނޫހަށް މައުލޫމާތު ލިބިފައިވާ ގޮތުގައި އަޒާނު ވަކިކުރުމާ މެދު ޕީއެންސީގެ އިސްވެރިންގެ ތެރެއިން ބައެއް އޮފިޝަލުން ދެކޮޅެވެ. އެ ޕާޓީއަށް ނިސްބަތްވާ މަޖިލީހުގެ ބައެއް މެންބަރުން ދެކިލައްވާ ގޮތުގައި އަޒާނު ވަކިކުރުން ވެގެންދާނީ ރައީސް މުއިއްޒު "އަޅާނެ އެންމެ ޅަ އެއްޗަށް" ކަމަށެވެ.
މީގެއިތުރުން، ޕީއެންސީގެ އިސް މަޖިލިސް މެންބަރުންނާއި ބައެއް ވަޒީރުންވެސް މިކަމުގައި އަޒާނަށް ހިތްވަރު ދެމުންދާ ކަމަށްވެސް މި ނޫހަށް މައުލޫމާތު ދިން މަސްދަރުތަކުން ބުންޏެވެ.
މިކަމަށް ހިތްވަރު ދެނީ ސުޕްރީމް ކޯޓުގެ ފަނޑިޔާރުން މަދު ކުރާ ބިލަށް ވޯޓު ނުދެއްވީ އެ ބިލަކީ ދިވެހިރާއްޖޭގެ ގާނޫނުއަސާސީއާ ހިލާފު ބިލަކަށް ވާތީ ކަމަށް ވިދާޅުވެ އަޒާން އާންމުކުރެއްވި ސިޓީ އެވެ. އެ ސިޓީގައި އޭނާ ވަނީ ބިލަށް ތާއީދު ނުކުރަން މި ސަރުކާރުގެ ބައެއް ވަޒީރުންނާއި ދައުލަތުގެ ވަކީލުން ވެސް މަޝްވަރާ ދެއްވި ކަމަށް ވިދާޅުވެފަ އެވެ.
ބިލާ ދެކޮޅު ހެއްދިޔަސް ދެމި ހުންނެވީ ސަރުކާރަށް ތާއީދު ކުރާ މެންބަރެއްގެ ގޮތުގައި ކަމަށް އަޒާން އިއްޔެ ވިދާޅުވި އެވެ. ނަމަވެސް އައްޑޫ ރައްޔިތުންނަށް ކޮށްދޭން ސަރުކާރުން ވެފައިވާ ވައުދުތައް ނުފުއްދޭ ނަމަ ސަރުކާރާއި ސަރުކާރުގެ މުއައްސަސާތައް ޖަވާބުދާރީ ކުރުމުގައި ދެމިހުންނަވާނެ ކަމަށް އަޒާން ވިދާޅުވި އެވެ.
އިއްޔެ މަޖިލީހުން ފާސްކުރި ބިލުގައިވާ ގޮތުން، ސުޕްރީމް ކޯޓުން ވަކި ކުރާ ދެ ފަނޑިޔާރުން ކަނޑައެޅުމަށްޓަކައި، އެހެނިހެން ގާނޫނުތަކާއި ގަވާއިދުތަކުން އެފަދަ މަސައްކަތް ކުރަން ދީފައިވާ މުއްދަތުތަކަށް ޖޭއެސްސީން ބަލާކަށް ނުޖެހެނޭ އެވެ.
އަޒާނުގެ އިތުރުން މި ބިލުގައި ގާނޫނުއަސާސީއާ ހިލާފު ކަމަށް ވަރަށް ގިނަ ބަޔަކު ދަނީ ބުނަމުންނެވެ. އަދި އެއީ ކޯޓުތަކަށް ސީދާ ނުފޫޒު ފޯރުވުމުގެ ގޮތުން ސަރުކާރުން ކުރަމުންދާ މަސައްކަތެއް ކަމަށް ވެސް ވަރަށް ތަޖުރިބާކާރުން އަދި މާހިރުން ދަނީ ވިދާޅުވަމުންނެވެ.
