ގޯލްޑަން ފުޓްސަލް ޗެލެންޖު 2025 ގެ ޒޯން ހަތަރެއްގެ ތަށި، އދ. މަހިބަދޫ އަށް ލިބުމަކީ، އެ ރަށުގެ ފުޓްސަލް އަށް ލިބުނު ބޮޑު ކާމިޔާބެއް ކަމަށް އެ ޓީމުގައި މޮޅު ކުޅުމެއް ދެއްކި އަބްދުﷲ މިދުހަތު ފަހުމީ (ބިޗަޑް) ބުނެފި އެެވެ.
މަހިބަދޫން މި ފަހަރުގެ ޒޯން ޗެމްޕިއަންކަން ހޯދީ މިދިޔަ އަހަރު އެ ޒޯންގެ ތަށި އުފުލާލި އއ.ގެ ޗެމްޕިއަން، މަތިވެރި އަތުން މޮޅުވެގެންނެވެ. އެ މެޗުގެ ފުރިހަމަ ވަގުތު ހަމަވިއިރު، 3-3 އިން އެއްވަރުވިއިރު، ޕެނަލްޓީ ޖަހައިގެން މަހިބަދޫ މޮޅުވީ، 7-5 އިންނެވެ.
ގޯލްޑަން ފުޓްސަލް ޗެލެންޖުގައި މަހިބަދޫން ވާދަކުރަން ފެށި ފަހުން، އެ ޓީމުން، އދ.ގެ ޗެމްޕިއަންކަން ވަނީ ހޯދައިފަ އެވެ. ތިން ފަަހަރު އެ އަތޮޅުގެ ފައިނަލުގައި ކުޅުނުއިރު، ޒޯން ތަށި ހޯދުނީ މި ފަހަރު އެވެ. އެ ޓީމަށް ކޮންމެ އަހަރެއްގައި ވެސް ތަފާތު ކުޅުމެއް ދައްކާ ބިޗަޑް ބުނީ، މިއީ ފުޓްބޯޅަ އަށް މަޝްހޫރު މަހިބަދޫ އަށް ފުޓްސަލްގައި ލިބުނު ރަނގަޅު ކާމިޔާބެއް ކަމަށެވެ.
ޒޯން ހަތަރެއްގެ މޮޅު ކުޅުންތެރިޔާގެ ޓްރޮފީ އާއި ޒޯން ތަށި ހިފައިގެން ބިޗަޑް ފޮޓޯ އަކަށް ހުއްޓިލައިގެން.--- ފޮޓޯ: އަތޫފް އާތިފް / އަދަދު ސްޕޯޓްސް
"މިއީ، މަހިބަދޫ ފުޓްސަލް އަށް ވަރަށް ބޮޑު ކުރިއެރުމެކޭ ދަންނަވާލާނީ. އެއީ ހަމަ ޒޯނަށް ދިޔަ ބުރު، މިހާ ބޮޑު ކާމިޔާބެއް، ޒޯން ތަށި މި ލިބުނީ. ވަރަށް ބޮޑު ކާމިޔާބެއް،" ބިޗަޑް ބުންޏެވެ.
ރާއްޖޭގެ އެންމެ ބޮޑު ފުޓްސަލް މުބާރާތް، ގޯލްޑަން ފުޓްސަލް ޗެލެންޖްގެ ގަދަ 16 ބުރުގައި މިރޭ މަހިބަދޫން ނުކުންނާނީ ފ. އަތޮޅުގެ ޗެމްޕިއަން، ދަރަނބޫދޫއާ ދެކޮޅަށެވެ. މިއީ، މި ދެ ޓީމުން ވެސް މި މުބާރާތުގެ މިހާ ހިސާބުގައި ކުރިމަތިލާނެ ފުރަތަމަ ޗެލެންޖެވެ.
ބިޗަޑް ބުނީ، ރާއްޖޭގެ އެންމެ ވަރުގަދަ ޓީމުތަކުގެ ތެރޭގައި ވާދަކުރުމަކީ ވެސް ކާމިޔާބެއް ކަމަށެވެ.
"އަސްލު ވަރަށް ބޮޑު ކާމިޔާބެއް މިއީ ހަމަަ، މިއީ އަނެއްހެން ބުނާނަމަ ވަރަށް ބައިވަރު މަސައްކަތް، ވަރަށް ބައިވަރު މީހުންގެ މަސައްކަތް މިއީ. (ކުރިއަށް އޮތްތަނުގައި) އެއް ގިޔަރު ހިއްލާލައިގެން މަސައްކަތް ކުރާނަން ހަމަ،" ބިޗަޑް ބުންޏެވެ.
މަހިބަދޫ އާއި ދަރަނބޫދޫ ކުޅޭ މެޗު ފަށާނީ މިރޭ 21:00 ގަ އެވެ.
