ގޯލްޑަން ފުޓްސަލް ޗެލެންޖުގެ ގަދަ 16 ޓީމު ވާދަކުރާ ބުރުގައި ވެސް ކުރިއަށްދިއުމަށްޓަކައި، ހދ. ނައިވާދޫން ވަރަށް މަސައްކަތް ކުރަން ޖެހޭ ކަމަށް އެ ޓީމުގެ ތަރި އަބްދުﷲ ޝާފިއު (ޝާއްޕެ) ބުނެފި އެވެ.
ނައިވާދޫން ވަނީ، ހދގެ ޗެމްޕިއަންކަން ހޯދުމުގެ އިތުރުން ޒޯން އެކެއްގެ ވެސް ތަށި ހޯދައިފަ އެވެ. ނައިވާދޫން ހަތް ވަނަ ފަހަރަށް އަތޮޅު ތަށި ހޯދީ ފައިނަލުގައި ނޭކުރެންދޫ އަތުން 3-0 އިން މޮޅުވެގެންނެވެ. މިދިޔަ ފަހަރު ޒޯން ތަށި އެ ޓީމަށް ގެއްލުނު ނަމަވެސް، މި ފަހަރު ޒޯން ތަށި ހޯދީ ފައިނަލުގައި، ހއ. ދިއްދޫ އަތުން 2-0 އިން ކުރިހޯދައިގެންނެވެ. މިއީ، ނައިވާދޫން ޒޯން ތަށި ހޯދި ތިން ވަނަ ފަހަރެެވެ.
"އަލްހަމްދު ލިއްލާހިއޭ ބުނެވޭނީ މި ހަަމަ ވަރަށް ބޮޑު މަސައްކަތެއް އަސްލު. މި ހަމަ އެންމެންގެ ވެސް މަސައްކަތް،" ހދ. އަތޮޅުގެ މޮޅު ކުޅުންތެރިޔާގެ މަގާމާއި ޒޯން އެކެއްގެ ވެސް މޮޅު ކުޅުންތެރިޔާގެ މަގާމު ހޯދި ޝާއްޕެ ބުންޏެވެ.
އޭނާ ބުނީ، ނޮކައުޓް ބުރުގައި ނައިވާދޫން ކުރިއަށްދާއިރު، ކޮންމެ މެޗެއް ވެސް ވަރަށް އުނދަގޫވާނެ ކަމަށެވެ.
"ވަރަށް ބޮޑު ފައިޓަކަށްވާނެ. ހުރިހާ ޓީމެއް ވެސް ވަރަށް މޮޅު މި ފަހަރު. ގަދަ 16 ގައި ކޮންމެ ބަޔަކާ ޖެހުނަސް، ކޮންމެ ޒޯނެއްގެ ދެ ވަނައާ ޖެހުނަސް ވަރަށް މަސައްކަތްކޮށްގެން މިކަން ވާނީ، އިންޝާﷲ ރަނގަޅުވާނެ، މެޗަކަށް ވުރެ މެޗެއް ވަރަށް ރަނގަޅަށް މި ދަނީ،" ޝާއްޕެ ބުންޏެވެ.
ނައިވާދޫ އަށް މި ފަހަރުގެ މުބާރާތުގެ ނޮކައުޓް ބުރުގައި ވާދަކުރަން ޖެހޭނީ، މާލެ ޒޯނުގެ ރަނަރަޕް، މައްޗަންގޯޅިއާ ދެކޮޅަށެވެ.
މިދިޔަ އަހަރުގެ މުބާާރާތުގެ ގަދަ 16 ބުރުގައި، ހދ. ނައިވާދޫ ކެޓީ 4-2 އިން ލ. ގަން އަތުން ބަލިވެގެންނެވެ. މި މެޗުގެ ފުރިހަމަ ވަގުތު ހަމަވީ 0-0 ގެ ނަތީޖާއަކުން އެއްވަރުވެގެންނެވެ. ޕެނަލްޓީގައި ގަމުން ހުރިހާ ޕެނަލްޓީ އެއް ކާމިޔާބުކުރިއިރު, ނައިވާދޫގެ ދެ ޕެނަލްޓީ ނާކާމިޔާބުވި އެވެ.
ގަދަ 16 ބުރުގައި، ނައިވާދޫން މި ފަހަރު ކުޅޭ މެޗު އޮތީ، މާދަމާރޭ 21:00 ގަ އެވެ.
