ރިސޯޓުތަކުގައި ހިންގާ ތިމާވެއްޓާ ރައްޓެހި މަޝްރޫއުތަކަށް އެހީތެރިވުމަށް ކުޑަ ރޭޓެއްގެ "ގްރީން ލޯނެއް" ބޭންކް އޮފް މޯލްޑިވްސް ތައާރަފުކޮށްފި އެވެ.
މި ލޯނު ތައާރަފުކުރީ އިއްޔެ ބޭއްވި މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) ގެ އަހަރީ އާންމު ޖަލްސާގައި، ބީއެމްއެލްގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފް އަދި ކްރައުން އެންޑް ޗަމްޕާ ރިސޯޓްސްގެ ޗެއާމަން ހުސެއިން އަފީފު އެވެ.
މި ލޯނު ދޫކުރާނީ އަހަރަކު 6.5 ޕަސެންޓު ރޭޓުގައި، 50 މިލިއަން ރުފިޔާއާ ހަމައަށް ކަމަށް ބީއެމްއެލްއިން ބުންޏެވެ. މީގެ އިތުރުން، ވަރކިން ކެޕިޓަލް ލިބޭނެ ގޮތަށް ކުރު މުއްދަތުގެ އޯވަޑްރާފްޓް ފެސިލިޓީއެއް ވެސް އިއްޔެ ތައާރަފުކުރި އެވެ.
ގްރީން ރިސޯޓް ފައިނޭންސިން ފެސިލިޓީގެ ދަށުން ރަށުގެ ގޮނޑުދޮށް ހިމާޔަތްކުރުމާއި އެނާޖީ އެފިޝެންޓް އިކުއިޕްމެންޓް ހޯދުމާއި ރީފޮރެސްޓްރޭޝަން އަދި ކުނި މެނޭޖްކުރުން ފަދަ ދެމެހެއްޓެނިވި މަޝްރޫއުތައް ހިންގުމަށް ރިސޯޓުތަކުން ބޭނުންވާ ފައިނޭންސް ފޯރުކޮށްދޭނެ އެވެ.
ރިސޯޓުތަކަށް ދޫކުރާ ގްރީން ލޯނު
• 50 މިލިއަން ރުފިޔާއާ ހަމައަށް އޯވަރޑްރާފްޓް ފެސިލިޓީ
• 6.5 ޕަސަންޓް އިންޓްރެސްޓް ރޭޓް
• ކާޑު މެޝިނުން ރިސޯޓަށް ލިބޭ ފައިސާ އިން ފައިނޭންސް އަނބުރާ ދެއްކުމުގެ ފަސޭހަ ގޮތްތަކެއް.
މަޓީގެ އަހަރީ އާންމު ޖަލްސާގައި ބީއެމްއެލްގެ ސީއީއޯ ޝަރީފް ވިދާޅުވީ ރާއްޖޭގެ އެންމެ ބޮޑު އަދި އެންމެ ކުރިއަރާފައިވާ ބޭންކުގެ ހައިސިއްޔަތުން، އެ ބޭންކުން އޮތީ ފަތުރުވެރިކަމުގެ ދާއިރާއަށް ބޭނުންވާފަދަ ބޭންކިން ހިދުމަތްތަކާއި ފައިސާ ބަލައިގަތުމުގެ އެންމެ ޒަމާނީ ހައްލުތަކެއް ހޯދައިދިނުމަށް ތައްޔާރަށް ކަމަށެވެ.
"ގްރީން ރިސޯޓް ފައިނޭންސް ފެސިލިޓީ ހާއްސަކޮށް ފަރުމާކޮށްފައި ވަނީ ރިސޯޓުތަކަށް ބޭނުންވާ ދެމެހެއްޓެނިވި ހައްލުތަކެއް ގާއިމުކުރުމާއެކު ހިންގުމުގެ ހަރަދުތައް ފަސޭހައިން މެނޭޖްކުރެވޭނެ ފައިނޭންސިން އެއް ހޯދައިދިނުމަށް،" އޭނާ ވިދާޅުވި އެވެ.
ބީއެމްއެލްގެ ކޯޕަރޭޓް ކަސްޓަމަރުން ގްރީން ރިސޯޓް ފައިނޭންސިންއާ ގުޅޭ އިތުރު މައުލޫމާތު ހޯދުމަށް އެ ކަސްޓަމަރަކަށް ހާއްސަކޮށްފައިވާ ރިލޭޝަންޝިޕް މެނޭޖަރުންނަށް ގުޅައި މައުލޫމާތު ސާފު ކުރުމަށް އެ ބޭންކުން ވަނީ އެދިފަ އެވެ.
ވޭތުވެދިޔަ ފަސް އަހަރު ދުވަހުގެ ތެރޭގައި ރިސޯޓު މަޝްރޫއުތަކަށް 400 މިލިއަން އެމެރިކާ ޑޮލަރަށް ވުރެ ބޮޑު އަދަދެއް ބީއެމްއެލްއިން ފައިނޭންސްކޮށްދީފައިވާ ކަމަށް އެ ބޭންކުން ބުންޏެވެ. އެއީ 6.17 ބިލިއަން ރުފިޔާ އެވެ.
ޝަރީފް ވިދާޅުވީ ދިވެހިރާއްޖޭގެ އެންމެ ބޮޑު ބޭންކުގެ ގޮތުގައި، ބީއެމްއެލްއިން އަހަރަކު 150 މިލިއަނަށްވުރެ ގިނަ މުޢާމަލާތް ހިންގާ ކަމަށެވެ. މި މުއާމަލާތްތަކުގެ އަގު ގާތްގަނޑަކަށް 500 ބިލިއަން ރުފިޔާ އަށް އަރައެވެ.
