ގޯލްޑަން ފުޓްސަލް ޗެލެންޖް 2025 ގެ ޒޯން އެކެއްގެ ފުރަތަމަ މެޗުތައް ރޭ ކުޅުނުއިރު، ހއ.ގެ ޗެމްޕިއަން، ވަށަފަރުން ހދ.ގެ އެންމެ ކާމިޔާބު ޓީމު ނައިވާދޫ 1-0 އިން ބަލިކުރިއިރު، ހއ. ދިއްދޫން 5-1 އިން ހދ. ނޭކުރެންދޫގެ މައްޗަށް ކުރިހޯދައިފި އެވެ.
ވަށަފަރާއި ނައިވާދޫގެ ކުރިމަތިލުން ފޯރިގަދަކޮށް ދިޔައިރު، މި މެޗުގައި ދެ ޓީމުން ވެސް ގޯލު ޖަހާނެ ރަނގަޅު ފުރުސަތުތައް ހޯދި އެވެ.
އެކަމަކު، މެޗުގައި ގޯލު ޖެހުމުގައި ކާމިޔާބު ހޯދީ ހަ އަހަރު ފަހުން ހއ.ގެ ޗެމްޕިއަންކަން، ހޯދި ވަށަފަރުންނެވެ. މި މެޗުގައި ވަށަފަރުން ޖެހި ހަމައެކަނި ގޯލު ކާމިޔާބުކުރީ، އިބްރާހިމް އަތީގް ހަސަން (އިއްބެ) އެވެ.
އެންމެ ފަހުން، މި ޒޯނުގެ ޗެމްޕިއަންކަން ހޯދީ އުތީމެވެ. އެއީ، ފައިނަލުގައި ޕެނަލްޓީ ޖަހައިގެން ނައިވާދޫ ބަލިކޮށްގެންނެވެ.
ރޭ މި ޒޯނުގައި ކުޅުނު އަނެއް މެޗުން، ދިއްދޫން ވަނީ ނޭކުރެންދޫއާ ދެކޮޅަށް ކުޅުނު މެޗުގައި ތަފާތު ދައްކައިފަ އެވެ. މިދިޔަ އަހަރު ހއ. ގެ ޗެމްޕިއަންކަން ހޯދި ދިއްދޫ އަށް ރޭގެ މެޗުގައި ލަނޑުތައް ޖަހައިދިނީ، އަލީ ޝާމް ދެ ގޯލުގެ އިތުރުން، ފާއިގު އަހުމަދު، މުހައްމަދު ޝަނާއު ނަސީރު އަދި ނޭކުރެންދޫގެ މުހައްމަދު ރާއިފް ފަޒީލް އަތުން ބައިކޮޅަށް ވަން ގޯލެކެވެ.
މި މެޗުގައި، ނޭކުރެންދޫގެ ހަމައެކަނި ލަނޑު ޖެހީ، މުހައްމަދު ވިލްފް އެވެ. މި މެޗުގެ އިތުރު ވަގުތުގެ ތެރޭގައި ހިނގައިދިޔަ ހަމަނުޖެހުމެއްގައި، ނޭކުރެންދޫގެ ރާއިފް އާއި މުހައްމަދު އަބާން އަށް ރަތް ކާޑެއް ދެއްކިއިރު، ދިއްދޫގެ ޒުނާމް މުހައްމަދު ޒުހެއިރު އަށް ވެސް ރަތް ކާޑެއް ދެއްކި އެވެ.
ގޯލްޑަން ފުޓްސަލް ޗެލެންޖުގައި މިރޭ ކުޅޭ މެޗުތައް
20:00: ޒޯން 4: އއ. މަތިވެރި - ވ. ކެޔޮދޫ
20:00: ޒޯން 4: އއ. ތޮއްޑޫ - އދ. މަހިބަދޫ
21:00: ޒޯން 2: ށ. މިލަންދޫ - ށ. ކަނޑިތީމު
21:00: ޒޯން 2: ރ. ދުވާފަރު - ނ. މިލަދޫ
22:00: ޒޯން 7: ގއ، ދެއްވަދޫ - ގދ. ވާދޫ
22:00: ޒޯން 7: ގއ. ވިލިނގިލި - ދަޑިމަގު
23:00: ޒޯން 7: ސ. ހިތަދޫ - ސ. ފޭދޫ
