ލަންޑަން (ފެބްރުއަރީ 5) - ޖެނުއަރީ ޓްރާންސްފާ މާކެޓްގައި އާސެނަލް އަށް ކަންތައްތައް ދިޔަ ގޮތް ކަމަކުނުދާ ކަމަށް އެ ޓީމުގެ ކޯޗު، މިކޭލް އާޓެޓާ ބުނެފި އެވެ.
އާޓެޓާ މި ގޮތަށް ބުނެފައިވަނީ، އެ ޓީމަށް އަނިޔާގެ މައްސަލަތައް ކުރިމަތިވި ނަމަވެސް، އެ މަގާމުތަކަށް ޖެނުއަރީގެ ޓްރާންސްފާ މާކެޓްގެ ތެރޭގައި ކުޅުންތެރިން ހޯދިފައިނުވާތީ އެވެ.
އެ ގޮތުން، އާސެނަލްގެ ދެ އެޓޭކަަރުން ކަމަށްވާ ގަބްރިއެލް ޖީސޫސް އާއި ބުކާޔޯ ސަކާ މި ވަގުތު ހުރީ އަނިޔާގެ ސަބަބުން ކުޅުމާ ދުރުގަ އެވެ. މި ފަަހަރުގެ ޓްރާންސްފާގައި އާސެނަލުން ފޯވާޑެއް ގެންނާނެ ކަމަށް މީޑިއާގައި އަޑުފެތުރުނުއިރު، އެ ޓީމުން އެސްޓަން ވިލާގެ ފޯވާޑް، އޮލީ ވަޓްކިންސް ގެންނަން ރަސްމީކޮށް ކުރި މަސައްކަތް ވެސް ދިޔައީ ކާމިޔާބުނުވެ އެވެ.
"ވަރަށް ރަނގަޅު ވިސްނުންތަކެއް ހުރި އަހަރެމެންގެ އެހެން ޓްރާންސްފާ މާކެޓްތަކެކޭ އެއްގޮތަށް ކޮން ކަމެއްތޯ ކުރަންވީ ޓީމު ވަރުގަދަކުރަން. ކުޅުންތެރިންތަކެއް އަނިޔާގައި ހުރިއިރު، އަހަރަމެެން ކުރަން ޖެހޭ ކަންކަން އެނގިފައި އޮތީ (ޓްރާންސްފާ ވިންޑޯގައި). އެކަމަކު، ކަންކަން ދިޔައީ އަހަރެމެން ހިތްހަމަޖެހޭނެ ގޮތަކަށް ނޫން،" ލީގު ކަޕް ސެމީ ފައިނަލް ދެ ވަނަ ލެގުގައި ނިއުކާސަލް ޔުނައިޓެޑާ ދެކޮޅަށް ކުޅުމުގެ ކުރިން، އާޓެޓާ ބުންޏެވެ.
އޭނާ ބުނީ، ކްލަބްގައި ހުރި މެނޭޖްމަންޓާ ގުޅޭ ހަރަދުކުރުމުގެ ކަންކަމަކީ އޭނާއާ ސީދާ ގޮތުން ގުޅޭ ނިންމުންތަކެއް ނޫން ކަމަށެވެ. އަދި ކްލަބް ރަނގަޅަށް ހިންގުމަށް ބޭނުންވާ ކަންކަމަށް ބަލައި، ނިންމާ ނިންމުންތަކަށް އަބަދުވެސް އިހުތިރާމް ކުރާނެ ކަމަށް އާޓެޓާ ވަނީ ބުނެފަ އެވެ.
ރިޕޯޓްތައް ބުނާގޮތުން، އާސެނަލުން މި ސީޒަނަށް ހަރަދުކުރަން ކަނޑައެޅި ޓްރާންސްފާ ބަޖެޓްގެ ބޮޑުބައެއް އެ ޓީމުން ވަނީ ސީޒަން ފެށުމުގެ ކުރިން ބޭނުންކޮށްފަ އެވެ. އެހެންވެ، މި ފަހަރުގެ ޓްރާންސްފާ ބާޒާރުގައި ބޭނުންކުރަން އެކަށީގެންވާ ބަޖެޓެއް ނުލިބުނީ އެވެ.
މިހާރު ކަންތައްތައް ދިމާވެފައި އޮތްގޮތުން، ސީޒަނުގެ ބާކީ ބައިގައި ވިސްނުންތެރިކަމާ އެކު، ތިބި ކުޅުންތެރިން ލައިގެން ވީ އެންމެ ރަނގަޅަށް މަސައްކަތްކުރަން އާޓެޓާ ވަނީ އަމާޒުހިފައިފަ އެެވެ.
