އެންމެ ފަހުގެ ޗެމްޕިއަން، ދިއްދޫ އަތުން ޕެނަލްޓީ ޖަހައިގެން، 7-6 އިން މޮޅުވެ، ގޯލްޑަން ފުޓްސަލް ޗެލެންޖުގެ ހއ. ތަށި، ވަށަފަރުން ހަ އަހަރަށް ފަހު އުފުލާލައިފި އެވެ.
މިއީ ވަށަފަރުން އަތޮޅު ޗެމްޕިއަންކަން ހޯދި ހަތަރު ވަނަ ފަހަރެވެ. އެ ޓީމުން ވަނީ މީގެ ކުރިން، 2016، 2017 އަދި 2018 ވަނަ އަހަރު މި މުބާރާތުގެ އަތޮޅު ޗެމްޕިއަންކަން ހޯދައިފަ އެވެ.
މި ފަހަރުގެ މުބާރާތުގެ ފައިނަލުގައި ކުޅެގެން ވަށަފަރުން މެޗުގެ ފުރިހަމަ ވަގުތު ހަމަވިއިރު، ވަނީ 2-2 އިން ދިއްދޫއާ އެއްވަރުވެފަ އެވެ. މި މެޗުގެ ފުރިހަމަ ވަގުތުގެ ތެރޭގައި ވަށަފަރުގެ ދެ ގޯލު ޖެހީ އަބްދުﷲ ޝިނާން އާއި އަހުމަދު މަހުތޫމް މުސްތަފާ އެވެ. އަދި ދިއްދޫގެ ލަނޑުތައް ޖެހީ، ހައިޝަމް ރަޝީދު (ހައި) އާއި މުހައްމަދު ޝަނާއު ނަސީރު އެވެ.
ޕެނަލްޓީ ޖަހަން ޖެހުނުއިރު، ވަށަފަރުން ވަނީ ފަސް ޕެނަލްޓީއެއް ކާމިޔާބުކޮށްފަ އެެވެ. އެ ޓީމުން ޕެނަލްޓީ ކާމިޔާބުކުރީ ސިނާން، މަހާސިން މުހައްމަދު، މަހުތޫމް، ޝާމް އަބްދުލް ރަހުމާން އަދި އަލީ ޔަޒްދާން ރަޝީދު އެވެ. ޕެނަލްޓީގައި، ވަށަފަރުގެ ކީޕަރު މަހާސިން މޮޅު ކުޅުމެއް ދެއްކިއިރު، މެޗުގެ މޮޅު ކުޅުންތެރިއަކީ ވެސް އޭނާ އެެވެ. އެކަމަކު، ދިއްދޫން ވެސް ވަނީ ހަތަރު ޕެނަލްޓީއެއް ވައްދާލައިފަ އެވެ. އެ ޓީމުން ޕެނަލްޓީ ކާމިޔާބުކުރީ ޝަނާއު، އަހުޒަމް ރަޝީދު (އަހު)، ޒުނާމް މުހައްމަދު ޒުހެއިރު އަދި އަލީ އައިހަމް ރަޝީދު އެވެ.
އެންމެ ގިނަ ގޯލު ޖެހި ކުޅުންތެރިއަކަށް ވަށަފަރުގެ އިބްރާހިމް އަތީގް ހަސަން (އިއްބެ) ހޮވުނުއިރު، އެންމެ މޮޅު ކުޅުންތެރިއަކީ ވަށަފަރުގެ ކެޕްޓަން، އިބްރާހިމް ސަނޫން (ޗަންނަ) އެވެ.
