ހއ. އަތޮޅަށް ކުރެއްވި ރަސްމީ ދަތުރު ނިންމަވާލެއްވުމަށްފަހު ރައީސް ޑރ. މުހައްމަދު މުއިއްޒު އެނބުރި މާލެ ވަޑައިގެންފި އެވެ.
ވަޒީރުންނާއި ވެރިކަންކުރާ ޕީއެންސީއަށް ނިސްބަތްވާ ރައްޔިތުންގެ މަޖިލީގުގެ މެންބަރުންނާއި ސަރުކާރުގެ ވެރިން އަދި ސަރުކާރާ ގާތް މީޑިއާތަކާއެކު ކުރެއްވި މި ދަތުރުގައި ހއ. ގެ ޖުމުލަ 10 ރަށަކަށް އެމަނިކުފާނު ވަޑައިގެންނެވި އެވެ.
ރައީސް އޮފީހުން ބުނީ ރައީސް މުއިއްޒުގެ މި ދަތުރުގައި ރައްޔިތުންގެ ގާތަށް، ރަށްރަށަށް ވަޑައިގެން، ރައްޔިތުންގެ ހާލު ބައްލަވައި އެ ރައްޔިތުންނަށް އެންމެ ބޭނުންޖެހިފައިވާ ކަންކަން އޮޅުންފިލުއްވި ކަމަށެވެ. އަދި ރައްޔިތުންނަށް ދިމާވެފައިވާ މައްސަލަތަކަށް ހައްލު ހޯއްދެވުމަށް އެކިއެކި މުއައްސަސާތަކާއި އެކި ފަންތީގެ ބޭފުޅުންނާ ބައްދަލުކުރައްވައި މަޝްވަރާ ކުރެއްވި ކަމަށް ރައީސް އޮފީހުން ވިދާޅުވި އެވެ.
މި ދަތުރުގެ ތެރެއިން ރައީސް ވަނީ އެކި ރަށްރަށުގައި މިދިޔަ ވެރިކަމުގައި ހިންގާ ނިމިފައިވާ ބައެއް މަޝްރޫއުތައް އިފުތިތާހުކުރައްވައިފަ އެވެ. އަދި އަލަށް ފެށޭ ބައެއް މަޝްރޫއުތަކުގެ އެއްބަސްވުމުގައި ސޮއިކުރުމުގެ އިތުރުން ބައެއް އާ މަޝްރޫއުތަކުގެ ބިންގާ ވެސް ދަތުރުގެ ތެރެއިން ރައީސް އަޅުއްވައިދެއްވި އެވެ.
ކޮންމެ ރަށެއްގެ ރައްޔިތުންނާ ބައްދަލުކޮށް ވާހަކަދެއްކުމުގެ އިތުރުން، ރައީސް ވަނީ އެ ރަށްރަށުގެ އިދާރާތަކާ ބައްދަލުކުރައްވައި މަޝްވަރާތަކެއް ކުރިއަށް ގެންދަވައިފަ އެވެ.
ދަތުރުގެ އެންމެ ފަހު ރަށް ކަމަށްވާ އުލިގަމުގައި ހުންނަވައި ރައީސް ވަނީ ރަށްރަށުގައި ކުރިއަށްދިޔަ މަޝްރޫއުތައް ހުއްޓިފައިވާ ކަމަށް އެއްބަސްވެވަޑައިގެން އެ މަޝްރޫއުތައް ވަރަށް އަވަހަށް ފަށްޓަވަން މަސައްކަތް ކުރަމުންދާ ކަމަށް ވިދާޅުވެފަ އެވެ.
