ގޯލްޑަން ފުޓްސަލް ޗެލެންޖް 2025 ގެ ކ. އަތޮޅު ސެމީ ފައިނަލުގައި ރޭ ގާފަރު އަތުން މޮޅެއް ހޯދަން ކާށިދޫން ބޭނުންކުރީ މުޅި ޓީމުގެ މެދުގައި އޮތް އިތުބާރާއި ޔަގީންކަން ކަމަށް އެ ޓީމުގެ ކޯޗު އަލީ ހައިޝަމް (ޗުމްޕު) ބުނެފި އެވެ.
ގޯލްޑަން ފުޓްސަލް ޗެލެންޖުގެ މިދިޔަ އަހަރުގެ ކ. އަތޮޅު ފައިނަލުގައި ކާށިދޫ ވަނީ 5-1 އިން ގާފަރު އަތުން ބަލިވެފަ އެވެ.
ކ. އަތޮޅުގެ އެންމެ ކާމިޔާބު ޓީމު، ގާފަރާ ދެކޮޅަށް މި ފަހަރުގެ މުބާރާތުގެ ސެމީ ފައިނަލުގައި ކުޅެ، ކާށިދޫން މޮޅުވީ ފަހަތުން އަރައި 2-1 އިންނެވެ. މިއީ، ކާށިދޫން ގޯލްޑަން ފުޓްސަލް ޗެލެންޖުގައި ގާފަރުގެ މައްޗަށް ހޯދި ފުރަތަމަ މޮޅެވެ.
"އަތޮޅުގައި އެންމެ ވަރުގަދަ ޓީމު އެއީ ގާފަރު ކަންނޭނގެ. ދެން، ޕްރެކްޓިސްތަކުން ފެށިގެން ވެސް މި މެޗުގައި ވެސް ކުޅުންތެރިން ކުރި މަސައްކަތް ކަންނޭނގެ، މިއަދުގެ ރިޒަލްޓަކީ، އަސްލު ވަރަށް މޮޅު ޓީމެއް ބަލިކުރަން މިހާވަރަށް މަސައްކަތް ކޮށްގެން ބަލިކުރެވޭނީ،" ޗުމްޕު ބުންޏެވެ.
މީގެ ކުރިން، ހއ. އުތީމުގެ ކޯޗުކަމާ ހަވާލުވެ އެ ޓީމާ އެކު ވެސް ރަނގަޅު މަސައްކަތްތަކެއް ކުރި ޗުމްޕު ބުނީ، ގާފަރުން ފުރަތަމަ ގޯލެއް ޖެހި ކަމުގައި ވިޔަސް ކާށިދޫ ކުޅުންތެރިން ޕްރެކްޓިހާއި މެޗުތަކުގައި ކުރަމުން އަންނަ މަސައްކަތަށް ބަލާއިރު، ގާފަރު ކައިިރިން ނަތީޖާ އެއް ނެރެވޭނެ ކަމުގެ ޔަގީންކަން އޮތް ކަމަށެވެ.
"އަސްލު ކުޅުންތެރިންނާ މެދު ވަރަށް އުންމީދު އޮތް ފުރަތަމަ ވެސް، ވާހަކަ އަކީ، ފުރަތަމަ އެއްޗެއް ވަނުމެއް ނޫން، މި މެޗު ނެގޭނެ ކަމާ ދޭތެރޭ ކުޅުންތެރިންނާ ދޭތެރޭ ވަރަށް ކޮންފިޑެންސް އޮވެގެން މި މެޗަށް އައީ،" ޗުމްޕު ބުންޏެވެ.
ކ. އަތޮޅު ފައިނަލުގައި ކުޅޭނީ ކާށިދޫ އާއި މާފުށްޓެވެ. ދެ ޓީމު ވެސް ފައިނަަލަށް ދަތުުރުކުރީ މެޗަކުން ބަލިނުވެ އެވެ.
