ރާއްޖޭގެ މާލީ ހާލަތު ދަށަށް ގޮސްފައިވާ ދަނޑިވަޅެއްގައި ރައީސް ޑރ. މުހައްމަދު މުއިއްޒު ރަށްރަށަށް ދަތުރު ކުރައްވާތީ އަމާޒުވާ ފާޑުކިޔުމަށް އެމަނިކުފާނު މިއަދު ރައްދު ދެއްވައިފި އެވެ.
ހއ. އަތޮޅަށް ކުރައްވަމުން ގެންދަވާ ރަސްމީ ދަތުރުގެ ތެރެއިން އެ އަތޮޅު މާރަންދޫގައި ވާހަކަ ދައްކަވަމުން ރައީސް ވިދާޅުވީ، ރަށްރަށަށް ވަޑައިގެން ޖަލްސާތައް ބާއްވާ އިދާރާތަކާ ބައްދަލުކުރަނީ ކަންކަން ހައްލުކުރުމުގެ ނިޔަތުގައި ކަމަށެވެ. އެއީ ބޭކާރު ހަރަދެއް ނޫން ކަމަށް ވެސް ރައީސް ވިދާޅުވި އެވެ.
"ކަމާ ގުޅޭ ވަޒީރުންނާ އެކީގަ ރަށްރަށަށް މިދަނީ ސީރިއަސް މަސައްކަތްތަކެއް ކުރަން. މިކަމަށް ވެސް ބައެއް މީހުން އެބަ ފާޑުކިޔާ ބޭކާރު ހަރަދެއް ކުރަނީއޭ. ހަރަދު ބޭކާރުވާނީ ހަގީގަތުގަ ލަސްވެގެން ގޮސް ގެއްލިގެންދާ ދުވަސްތަކުން އެ ލިބޭ ގެއްލުން މާ ބޭކާރު،" ރައީސް ވިދާޅުވި އެވެ.
ރައީސް ވިދާޅުވީ ރަށްރަށަށް ދަތުރު ކުރާއިރު އިތުރު ބަޔަކާ ނުލައި އެމަނިކުފާނަށް އެކަނި ވެސް ވަޑައިގެންނެވިދާނެ ކަމަށެވެ. އެކަމަކު، ވަޒީރުންނާއި ކަމާ ގުޅޭ އެހެން އޮފިޝަލުން ދަތުރުގައި ބައިވެރި ކުރުވަނީ ސީރިއަސް މަސައްކަތްތަކެއް ހިންގެވުމުގެ ނިޔަތުގައި ކަމަށް ރައީސް ވިދާޅުވި އެވެ.
މާލޭގައި ހުންނަ އޮފީސްތަކުގައި އަރާމުގައި ތިބުމުގެ ބަދަލުގައި އެމަނިކުފާނު ބޭނުންވަނީ ވަޒީރުން ގޮވައިގެން ރަށްރަށަށް ގޮސް، މައްސަލަތައް ސާފުކޮށް، ހައްލުތައް ހޯދައިދެއްވުމަށް ކަމަށް ވެސް ރައީސް މިއަދު ވިދާޅުވި އެވެ.
ރައީސް މިހެން ވިދާޅުވެފައިވާއިރު ވޭތުވެދިޔަ 2024 ވަނަ އަހަރު ސަރުކާރުން ނިންމާލީ ދައުލަތުގެ ބަޖެޓުގައި ދަތުރުތަކަށް ކަނޑައެޅި އަދަދަށްވުރެ އެތައް މިލިއަން ރުފިޔާއެއް އިތުރަށް ހަރަދުކޮށްގެން ކަން ފިނޭންސް މިނިސްޓްރީގެ ތަފާސްހިސާބުތަކުން ދައްކަ އެވެ.
ފިނޭންސުން ކޮންމެ ހަފުތާއަކު އާންމުރާ ދައުލަތުގެ މާލީ ހިސާބުތައް ދައްކާގޮތުން ޑިސެމްބަރު 26، 2024، ގެ ނިޔަލަށް ދައުލަތުގެ ދަތުރުފަތުރަށް ޖުމްލަ 266.6 މިލިއަން ރުފިޔާ ވަނީ ހަރަދުކޮށްފަ އެވެ.
މިދިޔަ އަހަރަށް ރައްޔިތުންގެ މަޖިލީހުން ފާސްކުރި ބަޖެޓުގައި ދަތުރުފަތުރަށް ކަނޑައަޅާފައި އޮތީ 228.3 މިލިއަން ރުފިޔާ އެވެ. އެއީ ބޭރު ދަތުރުތަކަށް ކަނޑައެޅި 69 މިލިއަން ރުފިޔާ އާއި ރާއްޖޭގެ އެތެރޭގެ ދަތުރުތަކަށް ކަނޑައެޅި 53 މިލިއަން ރުފިޔާ އަދި ކަނޑުގެ ދަތުރުތަކަށް ކަނޑައެޅި 44 މިލިއަން ރުފިޔާ އެވެ.
