ގޯލްޑަން ފުޓްސަލް ޗެލެންޖް 2025ގެ ކ. އަތޮޅު ސެމީ ފައިނަލުގައި، ގާފަރު އަތުން 2-1 އިން މޮޅުވެ، އެ ޓީމު މުބާރާތުން ކަޓުވާލުމަށް ފަހު، ކާށިދޫން ފައިނަލުގައި މާފުށްޓާ ދެކޮޅަށް ކުޅުމުގެ ފުރުސަތު ވަނީ ހޯދައިފައި.
މިއީ، ދެ ފަހަރު ގޯލްޑަން ފައިނަލުގައި ކުޅުނު ގާފަރަށް ދަށް ނަތީޖާއެކެވެ. މިދިޔަ އަހަރުގެ ކ. އަތޮޅު ފައިނަލުގައި ގާފަރުން ވަނީ ކާށިދޫ އަތުން 5-1 އިން މޮޅުވެފަ އެވެ. އަދި މިދިޔަ އަހަރުގެ ގޯލްޑަން ފުޓްސަލް ޗެެލެންޖުގެ ސެމީ ފައިނަލަށް ދަތުރުކުރި ގާފަރު މި ފަހަރުގެ އަތޮޅު ސެމީން ކެޓިއިރު، މިއީ، އެ ޓީމަށް އަތޮޅު ބުރުން މުބާރާތް ނިމުނު ދެ ވަނަ ފަހަރެެވެ.
ސެމީ ފައިނަލް މެޗުގައި ގާފަރުން ލީޑުނެގީ އެ ޓީމުގެ ކެޕްޓަން، ސާމިން މުހައްމަދު (ސާންކޮ) ޖެހި ގޯލުންނެވެ. މެޗުގެ ބޮޑުބައިގައި ގާފަރުން ލީޑުގައި އޮވެގެން ކުޅުނު ނަމަވެސް، ކާށިދޫން ނަތީޖާ އަނބުރާލީ މެޗުގެ ފަހު ވަގުތު، ސާޅީހަކަށް ސިކުންތު ތެރޭގައި ދެ ގޯލު ޖަހައިގެންނެވެ.
އެ ގޮތުން، ކާށިދޫން އެއްވަރުކުރީ ކޯނަރެއްގައި، އަހުމަދު މަޖީދު ޖެހި ގޯލުންނެެވެ. އަދި އެ ޓީމު މޮޅުކޮށްދިން ގޯލު ޖެހީ، ޓީމުގެ ކެޕްޓަން، އަކުމަލް މުހައްމަދު (އަކޫބެ) އެވެ.
މާފުށި ޓީމަށް މޮޅު ކުޅުމެއް ދެއްކި މަފާޒް ލަނޑު ޖެހުމަށް ފަހު އުފާފާޅުކުރަނީ.--- ފޮޓޯ: އިމޭޖަސް،އެމްވީ
މި މެޗުގެ މޮޅު ކުޅުންތެރިއަކަށް ހޮވުނީ، ކާށިދޫ ގޯލުގައި މޮޅު ކުޅުމެއް ދެއްކި، ކީޕަރު މުހައްމަދު ސަލީލު އެވެ.
ކ. އަތޮޅުގެ އަނެއް ސެމީ ފައިނަލުގައި މާފުށިން ވަނީ 5-1 އިން ގުރައިދޫ ބަލިކޮށްފަ އެވެ. މި މެޗުގައި ގުރައިދޫގެ ހަަމައެކަނި ގޯލު ޖެހީ އިޝް އާފު އަހުމަދު ފިރާގު އެވެ.
މާފުށީގެ އިސްމާއިލް މަފާޒް އިބްރާހިމް (މަފާ) ހެޓްރިކެއް ހެދި މި މެޗުގައި އެ ޓީމުގެ އަނެއް ގޯލުތައް ޖެހީ އިބްރާހިމް މުބީން އަހުމަދު ރަޝީދު (މުއްކި) އާއި އަހުމަދު ޝަމާލް އެވެ.
ގޯލްޑަން ފުޓްސަލް ޗެލެންޖު 2025 ގެ ކ. އަތޮޅު ފައިނަލް މެޗު އޮންނާނީ އަންނަ ހުކުރު ދުވަހުގެރޭގަ އެވެ.
ގޯލްޑަން ފުޓްސަލް ޗެލެންޖް 2025 (29 ޖެނުއަރީ)
20:00: މ. ފައިނަލް: ދިއްގަރު - މުލަކު
20:00: ފ. ފައިނަލް: ދަރަނބޫދޫ - މަގޫދޫ
21:30: ދ. ފައިނަލް: މާއެނބޫދޫ - ކުޑަހުވަދޫ
