ހއ. އަތޮޅުގެ 10 ރަށަކަށް ކުރައްވާ ތިން ދުވަހުގެ ދަތުރެއްގައި ރައީސް ޑރ. މުހައްމަދު މުއިއްޒު މިއަދު ފުރާވަޑައިގެންފި އެވެ.
ރައީސް އޮފީހުން ބުނީ އެމަނިކުފާނު ހއ. އަތޮޅަށް ކުރައްވާ ދަތުރުގައި ވަޒީރުންނާއި ސަރުކާރުގެ މުއައްސަސާތަކުގެ އިސްވެރިންނާ އެކު ވަޑައިގަންނަވާނީ ދިއްދޫ، ފިއްލަދޫ، ހޯރަފުށި، އިހަވަންދޫ، މާރަންދޫ، މޮޅަދޫ، މުރައިދޫ، ތަކަންދޫ، އުލިގަމު އަދި އުތީމަށެވެ.
ރައީސް ވަޑައިގަންނަވާތީ ހއ. އަތޮޅުގެ ބައެއް ރަށްތަކުގައި ސަރުކާރާ ދެކޮޅަށް އަޑު އުފުލައި ޝުއޫރު ފާޅު ކުރަން ތައްޔާރުވަމުންދާތީ، އެކަމަށް ފުލުހުން ދަނީ ހުރަސް އަޅަމުންނެވެ. މިގޮތުން ރަށްރަށުގައި ޝުއޫރުތައް ލިޔެފައިވާ ބެނާތައް ވެސް ފުލުހުން ވަނީ ނަގައިފަ އެވެ.
ރައީސްގެ މި ދަތުރުގައި ވަޑައިގަންނަވާ ރަށްރަށުގެ ކައުންސިލްތަކާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކާއި ރަށުގެ މުއައްސަސާތަކުގެ އިސްވެރިންގެ އިތުރުން ރަށުގެ ރައްޔިތުންނާ ބައްދަލުކުރެއްވުމަށް ވަނީ ހަމަޖެހިފަ އެވެ.
މީގެ އިތުރުން ހއ. އަތޮޅުގެ އެކި ރަށްތަކުގައި އަލަށް އިމާރާތް ކުރަން ހަމަޖެހިފައިވާ ފުލުހުންގެ މަރުކަޒުތަކާއި ކައުންސިލް އިމާރާތްތަކުގެ އިތުރުން ކޯލްޑް ސްޓޯރޭޖް ފެސިލިޓީ މަޝްރޫއުގެ މަސައްކަތް ރައީސް ފައްޓަވައި ދެއްވާނެ އެވެ.
ރައީސްގެ ދަތުރުގެ ތެރެއިން މަގޭ ސޯލާ ޕްރޮގްރާމްގެ ޕްރޮގްރާމްގެ އަމަލީ މަސައްކަތް ރައީސް ފައްޓަވައިދެއްވައި، ރަށްރަށުގައި އޭޓީއެމްގެ ހިދުމަތް ދެއްވުމަށް ކައުންސިލްތަކާއި ބެންކް އޮފް މޯލްޑިވްސްއާ ދެމެދު އެއްބަސްވުމުގައި ސޮއިކުރާނެ އެވެ.
ރައީސް މުއިއްޒު ހއ. އަތޮޅަށް ކުރައްވާ ތިން ދުވަހުގެ ދަތުރަށް ފަހު އެނބުރި މާލެ ވަޑައިގަންނަވާނީ ބުރާސްފަތި ދުވަހު އެވެ.
ވެރިކަމުގެ ފަސް އަހަރުގައި ރާއްޖޭގައި މީހުން ދިރިއުޅޭ ހުރިހާ ރަށަކަށް ދެ ފަހަރެއްގެ މަތިން ދަތުރު ކުރެއްވުމަކީ ރައީސް މުއިއްޒުގެ ރިޔާސީ ވައުދެކެވެ. އެގޮތުން މިދިޔަ އަހަރު ވެސް އެ މަނިކުފާނު ވަނީ ގިނަ ރަށްތަކަށް ވަޑައިގެން ކައުންސިލްތަކާއި ރައްޔިތުންނާ ބައްދަލު ކުރައްވާފަ އެވެ.
މީހުން ދިރިއުޅޭ ހުރިހާ ރަށަަކަށް ދެވަނަ ފަހަރަށް ދަތުރުކުރަން 2027 ގަައި ފަށާނެ ކަމަށް ރައީސް މުއިއްޒު ކުރިން ވިދާޅުވެފައިވެ އެވެ.
