ރާއްޖޭގައި ކްރިކެޓް އޮފިޝަލުން ގިނަ ކުރުމުގެ މަގުސަދުގައި މޯލްޑިވްސް ނެޝަނަލް އިންސްޓިޓިއުޓް ފޯ ސްޕޯޓްސް (އެމްއެންއައިއެސް)އާ ގުޅިގެން ކްރިކެޓް ބޯޑް އޮފް މޯލްޑިވްސް އިން ބޭއްވި އަމްޕަޔަރު ކޯސް ކާމިޔާބު ކަމަށް އެ އެސޯސިއޭޝަނުން ބުނެފި އެވެ.
ކްރިކެޓް އޮފިޝަލުން ތަމްރީނުކުރުމަށް އަމްފަޔަރު ލެވެލް 1 ކޯހެއް އަށް ބޭއްވީ 16 ބައިވެރިންނާ އެކު އެވެ. މި ކޯސް ކުރިއަށްދިޔަ މުއްދަތަކީ، ޖެނުއަރީ 19 އިން ފެށިގެން ފަސް ދުވަހުގެ މުއްދަތަށެވެ.
މި ކޯހުގައި ކިޔަވާދީފައިވަނީ އަމްފަޔަރިން އެޑިޔުކޭޓަރު ލެވެލް އެކެއް ކޯސް ހަދާފައިވާ އިބްރާހިމް ރިޒާން އާއި އަމްފަޔަރިން އެޑިއުކޭޓަރު ލެވެލް ދޭއް ހަދާފައިވާ އިމާދް އިސްމާއިލް އެވެ.
ރިޒާން ބުނީ، މި ކޯހުގެ މަގުސަދަކީ ރާއްޖޭގެ ކްރިކެޓް މެޗްތަކުގައި އޮފިޝަލް ކަން ކުރާނެ ފަރާތްތަކުގެ އަދަދު އިތުރުކުރުން ކަމަށާއި މީގެ އިތުރުން، ކްރިކެޓް ބޯޑުން ރާވާ ހިންގާ މުބާރާތްތަކުގެ އަދަދު އިތުރުވަމުން ދިއުމާ އެކު މެޗް އޮފިޝަލުން ހޯދުމުގައި ދަތިތަކާ ކުރިމަތިވާތީ އެ އަށް ހައްލު ހޯދުން ކަމަށެވެ.
"އެހެންކަމުން، ސީ.ބީ.އެމްގެ އަހަރީ ކަލަންޑަރގައި ހިމެނިގެން ކުރިއަށް ގެންދިޔަ ކޯހެއް މީ. މީގެ އިތުރު ކޯސްތައް، މާލޭގަ އަދި ފުވައްމުލަކުގައި މިއަހަރު ހިންގޭނެ. ސީ.ބީ.އެމް އިން މިހާރުވާނީ، އަމްޕަޔަރިންގ ފައުންޑޭޝަން ކޯސް ހެދުމަށް ޢާންމުކޮށް ދައުވަތު ދީފައި. ފައުންޑޭޝަން ކޯހަކީ އޮންލައިންކޮށް ހަދާލެވޭ ކޯހެއް. ފައުންޑޭޝަން ހެދުމަށްފަހު، ދެން އޮންނަ މަރުހަލާ އަކީ ލެވެލް 1." ރިޒާން ބުންޏެވެ.
"މި ކޯސް ހިންގުމުގައި، އެމް.އެން.އައި.އެސްގެ ވަރަށް ބޮޑު އެހީތެރިކަމާއި އެއްބާރުލުން ލިބުނު. އެހެންކަމުން އެ ވުޒާރާގެ އިސްވެރިންނަށާއި މުވައްޒަފުންނަށް، ކްރިކެޓް ބޯޑުގެ ނަމުގައި ޝުކުރު ދަންނަވަން. މިކޯހުން ފާސްވި ފަރާތްތަކަށް ލިބޭނީ އެމް.އެން.އައި.އެސް އިން އެންޑޯސްކޮށްފައިވާ ސެޓިފިކެޓެއް."
މި ކޯހުގެ ބައިވެރިން ތިއަރީ އާއި ފްރެކްޓިކަލް ޓެސްޓް ހަދާ އެސެސްކުރެވިފައިވާއިރު، ކޯހުގެ ބައިވެރިންގެތެރެއިން ހަތް ބައިވެރިއަކު ވަނީ 80 ޕަސަންޓަށް ވުރެ މަތިން މާކްސް ހޯދައިގެން ކޯހުން ފާސްވެފަ އެވެ.
މި ކޯހުގެ ބައިވެރިންނަށާއި ފާސްވި ފަރާތްތަކަށް ސެޓްފިކެޓް ދިނުމަށް ޙާއްސަ ރަސްމިއްޔާތެއް ދާދި ފަހުން ކުރިއަށްގެންދިޔައިރު، މި ރަސްމިއްޔާތު ޝަރަފުވެރިކޮށްދެއްވީ މިނިސްޓްރީ އޮފް ސްޕޯޓްސް، ފިޓްނަސް އެންޑް ރެކްރިއޭޝަންގެ ސްޓޭޓް މިނިސްޓަރު، އަބްދުﷲ ރައްޒާޤް އެވެ.
