ގޯލްޑަން ފުޓްސަލް ޗެލެންޖުގެ 2025 ގެ ގދ. އަތޮޅުގެ ފައިނަލުގައި ވާދޫއާ ދެކޮޅަށް ނުކުންނާނީ އެ ޓީމުގެ ފެންވަރު ދަނަގެން ރަނގަޅު ޕްލޭނަކާ އެކު ކަމަށް ގައްދޫގެ ކެޕްޓަން، އަހުމަދު ރިފްޝާން ބުނެފި އެވެ.
ގައްދޫން މި ފަހަރުގެ މުބާރާތުގެ ގްރޫޕް ސްޓޭޖުގައި ވާދޫއާ ދެކޮޅަށް ކުޅުނު މެޗު ވަނީ 1-1 އިން އެއްވަރުކޮށްފަ އެވެ. ގައްދޫން ސެމީ ފައިނަލަށް ދަތުރުކުރީ ގްރޫޕްގެ ފަހު މެޗުގައި ފިޔޯރީއާ 1-1 އިން އެއްވަރުކޮށްގެންނެވެ.
މޮޅެއް ނުހޯދައި ސެމީ އަށް ނުކުތް ނަމަވެސް، ގދ. ގެ އަނެއް ގްރޫޕްގެ އެއް ވަނަ މަޑަވެއްޔާ ދެކޮޅަށް ސެމީ ފައިނަލުގައި ނުކުމެ، ގައްދޫން ވަނީ މޮޅު ކުޅުމެއް ދައްކައި، 4-1 އިން މޮޅުވެފަ އެވެ.
"ސެމީ މި ދިޔައީ އަހަރެމެން ބޭނުންވި ގޮތަށް އަހަރެމެން ޕްރެކްޓިސް ޖެއްސި ގޮތަށް، މިއީ މި މުބާރާތުގައި އަހަރަމެންނަށް ކުޅެވުނު އެންމެ ފުރިހަމަ މެޗު މިއީ. މި ފަހަރު ހަމަ (ފައިނަލުން) މޮޅުވާނެ ކަމަށް މި ބަލަނީ އަހަރެމެން،" ސެމީ ފައިނަލް މެޗުގެ މޮޅު ކުޅުންތެރިޔާގެ މަގާމު ހޯދި ރިފްޝާން، "އަދަދު ސްޕޯޓްސް" އަށް ބުންޏެވެ.
އޭނާ ބުނީ މިއީ، ގައްދޫން ގޯލްޑަން ފުޓްސަލް ޗެލެންޖަށް އެންމެ ރަނގަޅަށް ތައްޔާރުވި ފަހަރު ކަމަށް ވާނެ ކަމަށެެވެ. އަދި ފައިނަލުގައި ވާދޫއާ ކުޅޭއިރު، ސަމާލުވާން ޖެހޭ ކަންކަމަށް ވިސްނައި ރަނގަޅަށް ތައްޔާރުވެގެން ނުކުންނާނެ ކަމަށް ރިފްޝާން ވަނީ ބުނެފަ އެވެ.
"މި ފަހަރު މިއީ، އެހެން ހުރިހާ ފަހަރަކާ އަޅާ ބަލާއިރު ހަމަ ވަރަށް ފުރިހަމަ އަށް ތައްޔާރުވެގެން މި އައީ. ވާދޫ އަކީ މިހާރު އަނެއްހެން ބުނަންޏާ ރާއްޖޭގައި ކުޅޭ ޓޮޕް ލެވަލް ތިން ހަތަރު ކުޅުންތެރިން އެބައުޅޭ. ހަމަ އަހަރެމެން އެ މެޗަށް ނުކުންނާނީ ވަރަށް ބޮޑަށް ތައްޔާރުވެގެން އެ މެޗު ނަގަން،" ރިފްޝާން ބުންޏެވެ.
ގައްދޫން ކުޅެމުން އަންނަނީ ފުޓްސަލްގައި ކާމިޔާބު ކުޅުންތެރިއެއް ކަމަށްވާ އަލީ އަރުޝަދު (އަރޭ)ގެ ކޯޗުކަމުގަ އެވެ. ރިފްޝާން ބުނީ، ގައްދޫން ކުޅެނީ ކޯޗު އަރޭގެ ރޭވުންތެރިކަމާ އެއްގޮތަށް އޭނާގެ ޕްލޭނަށް ކަމަށެވެ.
"ހުރިހާ މެޗެއް ވެސް އަހަރެމެން މި ކުޅެނީ ހަމަ ކޯޗު ބުނާގޮތަށް ހަމަ. އަނެއްހެން ވަކި އަމިއްލަ އެއްޗެއް ނޫން މި ހަދަނީ، ހަމަ ކޯޗުގެ އެއްޗެއް މި ކުޅެނީ،" ރިފްޝާން ބުންޏެވެ.
މިދިޔަ އަހަރުގެ ގދ. ފައިނަލުގައި ވާދޫން ވަނީ ތިނަދޫ އަތުން 4-1 އިން މޮޅުވެފަ އެވެ. މި އަހަރުގެ ފައިނަލް އޮތީ މިރޭ 9 ޖަހާއިރު އެވެ.
