ލަންޑަން (ޖެނުއަރީ 27) - އިނގިރޭސި ޕްރިމިއާ ލީގުގައި ރޭ މެންޗެސްޓާ ޔުނައިޓެޑް ކުޅުނު މެޗުން ފުލަމް އަތުން 1-0 އިން މޮޅުވިއިރު، ޓޮޓެންހަމް ހޮޓްސްޕާސް އިން އަމިއްލަ ދަނޑުގައި ލެސްޓާ ސިޓީ އަތުން 2-1 އިން ބަލިވެ، އެ ޓީމަށް އޮތް ދަތިތަކުން އަރައިގަންނަން އިތުރު ގޮންޖެހުންތަކާ ކުރިމަތިލާންޖެހިއްޖެ އެވެ.
ޓޮޓެންހަމް އިން ރިޗާލިސަން ޖެހި ގޯލުން ފުރަތަމަ ހާފުގައި ލީޑުގައި އޮވެ ނިންމާލި ނަމަވެސް ރެލިގޭޝަން ޒޯނުގައި މި މެޗާ ހަމައަށް އޮތް ލެސްޓާ އިން ވަނީ ދެ ވަނަ ހާފުގައި ދެ ގޯލުގައި ނަތީޖާ އަނބުރާލައިފަ އެވެ. ލެސްޓާގެ ލަނޑުތައް ޖެހީ ޖޭމީ ވާޑީ އާއި ބިލާލް އަލް ހަނޫސް އެވެ.
މިއީ، ލީގުގައި ޓޮޓެންހަމް ޖެހިޖެހިގެން ބަލިވި ހަތަރު ވަނަ މެޗެވެ. މި ނަތީޖާތަކާ އެކު ޓޮޓެންހަމް އޮތީ 23 މެޗުން 24 ޕޮއިންޓާ އެކު 15 ވަނައިގަ އެވެ. ރޭގެ މެޗުގައި، ޓޮޓެންހަމް ސަޕޯޓަރުން ވަނީ އެ ކްލަބްގެ ވެރިންނާ ދެކޮޅަށް އަޑުއުފުލައިފަ އެވެ.
ފުލަމް ގޯލަށް އަމާޒުކޮށް ޔުނައިޓެޑުން ފޮނުވާލި ފުރަތަމަ ހަމަލާގައި އެ ޓީމުން ވަނީ މެޗުން މޮޅުވި ގޯލު ޖަހައިފަ އެވެ. އެ ގޮތުން، 78 ވަނަ މިނިޓްގައި ޔުނައިޓެޑްގެ ޑިފެންޑަރު، ލިސަންދްރޯ މާޓީނޭޒް އޭރިއާބޭރުން ފޮނުވާލި ބޯޅަ ގޯލަށް ވަނީ ފުލަމް ކުޅުންތެރިއަކު ފައިގައި ޖެހިފައި އެ ޓީމުގެ ގޯލްކީޕަރު، ބާން ލޭނޯ އަތުގައި ވެސް ޖެހިފަ އެވެ.
އޭގެ ފަހުން، ފުލަމް އަށް އެއްވަރުކޮށްދޭން ރޮޑްރީގޯ މުނީޒް އަށް ހުސް ފުރުސަތެއް ލިބިގެންދިޔައިރު، ކައުންޓަ އެޓޭކެއްގައި، ޔުނައިޓެޑްގެ އަމަދު ޑިއާލޯ ވަނީ އެ ޓީމަށް އިތުރު ގޯލެއް ޖަހައިދީފަ އެވެ. އެކަމަކު، ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު، އެ ގޯލު ބަލައިނުގަންނަން ނިންމީ އޮފްސައިޑް ކަމަށްވާތީ އެވެ.
މި މޮޅާ އެކު، ޔުނައިޓެޑް އޮތީ 23 މެޗުން 29 ޕޮއިންޓާ އެކު، ލީގުގެ 12 ވަނައިގަ އެވެ.
