ރައީސުލްޖުމްހޫރިއްޔާ ޑރ. މުހައްމަދު މުއިއްޒު މި ހަފުތާގައި ހއ. ދިއްދޫއަށް ކުރަން ނިންމަވާފައިވާ ދަތުރަށް ހުރަސް އެޅޭ ފަދަ އެއްވެސް ކަމެއް ނުކުރަން ދިއްދޫ ކައުންސިލުން އިދިކޮޅު އެމްޑީޕީއަށް އަންގައިފި އެވެ.
އެމްޑީޕީގެ އެ ދާއިރާގެ ރައީސް، އަބްދުﷲ ވަހީދުއަށް އެޑްރެސްކޮށް އިއްޔެ ދިއްދޫ ކައުންސިލުން ފޮނުވި ސިޓީއެއްގައި ބުނީ ދިއްދޫ ރައްޔިތުންނާ ރައީސް ބައްދަލު ކުރެއްވުމަށް ބާއްވާ ޖަލްސާއަށް ދަތިވާ ގޮތަށް ލައުޑް ސްޕީކަރު ކަހަލަ ވަސީލަތްތައް މެދުވެރިކޮށް އެއްވެސް ކަމެއް ނުކުރަން އެދޭ ކަމަށެވެ.
"މި ދަތުރުފުޅާ ގުޅިގެން އިންތިޒާމު ކުރައްވާ ހަރަކާތްތަކަށް ހުރަސްއެޅޭ ފަދަ އެއްވެސް ކަމެއް ތިޔަ ޕާޓީން ނުކުރެއްވުމަށާއި ރައީސުލްޖުމްހޫރިއްޔާ ދިއްދޫ ރައްޔިތުންނާއެކު ބާއްވާ ރަސްމީ ބައްދަލުވުމަށް ދަތިވާ ފަދަ ގޮތަކަށް ލައުޑް ސްޕީކަރު މެދުވެރިކޮށް ނުވަތަ އެ ނޫން ވެސް ވަސީލަތެއް މެދުވެރިކޮށް އެއްވެސް ކަމެއް ނުކުރުމަށް މި ކައުންސިލުން އިލްތިމާސް ކުރަމެވެ،" ދިއްދޫ ކައުންސިލުން ފޮނުވި ސިޓީގައި ބުންޏެވެ.
ރައީސްގެ ދަތުރަށް ހުރަސް ނޭޅުމަށް އެދި ދިއްދޫ ކައުންސިލުން އެމްޑީޕީއަށް ފޮނުވި ސިޓީ
ރައީސުލްޖުމްހޫރިޔއްޔާ ދިއްދޫއަށް ވަޑައިގަންނަވަން ނިންމަވާފައި ވަނީ އަންނަ އަންގާރަ ދުވަހު އެވެ. އެ ދަތުރަށް ހުރަސްއެޅޭ ފަދަ ކަމެއް ނުކުރުމަށް އަންގައި ދިއްދޫ ކައުންސިލުން އެމްޑީޕީއަށް ފޮނުވި ސިޓީގައި އެދިފައި ވަނީ ސުލްހަވެރި ސިޔާސީ ހަރަކާތްތައް ހިންގި ކަމުގައިވީ ނަމަވެސް ރަށުގެ ސުލްހަމަސަލަސްކަމާއި އަމަންއަމާން ކަމަށް ހާއްސަ ސަމާލުކަމެއް ދިނުމަށާއި ގާނޫނީ އިމުން ބޭރު ނުވުމަށެވެ.
ރައީސްގެ ދަތުރަށް ހުރަސް ނޭޅުމަށް އެދި އެ ރަށު ކައުންސިލުން އެމްޑީޕީއަށް ސިޓީއެއް ފޮނުވާފައިވާއިރު، މިދިޔަ މުއްދަތުގައި ރާއްޖޭގެ އެކި ކަންކޮޅަށް ރައީސް ކުރެއްވި ދަތުރުތަކާ ގުޅުވައި ދަތުރަށް ހުރަސް އެޅޭނެ ފަދަ އެއްވެސް ކަމެއް އެ ޕާޓީން ކޮށްފައެއް ނުވެ އެވެ.
