ގޯލްޑަން ފުޓްސަލް ޗެލެންޖުގެ 2025 ގެ ބ. އަތޮޅު ފައިނަލުގައި އެންމެ ފަހުން ވެސް ވާދަކުރި އޭދަފުށްޓާއި ތުޅާދޫ ވަނީ ބައްދަލުކުރަން ޖެހިއްޖެ އެވެ.
މިދިޔަ އަހަރު އޭދަފުށިން ވަނީ ފައިނަލުގައި ތުޅާދޫ 5-2 އިން ބަލިކޮށްފަ އެވެ. ތިން ޓީމު ވާދަކުރާ މި ފަހަރުގެ ބ. އަތޮޅުގެ މެޗުތައް ފެށީ އޭދަފުށްޓާއި ތުޅާދޫގެ މެޗަކުންނެވެ. އެ މެޗުން ތުޅާދޫ އަތުން އޭދަފުށި މޮޅުވީ 1-0 އިންނެވެ.
އޭގެ ފަހުން، ތުޅާދޫން 1-0 އިން ފެެހެންދޫ ބަލިކޮށްފައިވަނިކޮށް، މިރޭ އޭދަފުށިން ވަނީ ފެހެންދޫ އަތުން 2-0 އިން މޮޅުވެފަ އެވެ. އޭދަފުށީގެ ލަނޑުތައް ޖެހީ ހުސެއިން ޝަރީފު (މުޑާ) އާއި ނިޝާމް މުހައްމަދު ރަޝީދު (ޕޮގްބާ) އެވެ.
ގޯލްޑަން ފުޓްސަލް ޗެލެންޖުގެ އެންމެ ފަހުގެ ޗެމްޕިއަން އޭދަފުށިން ބ. އަތޮޅުގެ ލީގު ބުރުގެ އެއް ވަނަ ހޯދީ ހަ ޕޮއިންޓާ އެކު އެވެ. ތުޅާދޫ އަށް ތިން ޕޮއިންޓް ލިބުނުއިރު، ފެހެންދޫ ނިންމާލީ ޕޮއިންޓެއް ނުލިބި އެވެ.
ބ. އަތޮޅުގެ ފައިނަލް މެޗު އޮންނާނީ، މި މަހުގެ 30 ވަަނަ ދުވަހުގެރޭގަ އެވެ.
މިލަދޫ ކުޅުންތެރިން ލަނޑު ޖެހުމަށް ފަހު އުފާފާޅުކުރަނީ.--- ފޮޓޯ: އިމޭޖަސް،އެމްވީ
ވެލިދޫ ބަލިކޮށް ނ. އަތޮޅުގެ ފައިނަލުގެ ފަހު ޖާގަ މިލަދޫ އަށް
ގޯލްޑަން ފުޓްސަލް ޗެލެންޖުގައި މި ފަހަރު ނ. އަތޮޅުން ވާދަކުރަނީ ތިން ޓީމެވެ. ހޮޅުދޫން ވަނީ ފުރަތަމަ ދެ މެޗުން ވެލިދޫ އާއި މިލަދޫ ބަލިކޮށް ފައިނަލުގެ ފުރަތަމަ ޖާގަ ހޯދައިފަ އެވެ. ފައިނަލުގެ ދެ ވަނަ ޖާގަ އަށް ވާދަކުރީ ވެލިދޫ އާއި މިލަދޫ އެވެ.
ދެ ވަނަ ފަހަރަށް ގޯލްޑަންގައި ވާދަކުރާ، މިލަދޫން ފައިނަލުގެ ދެ ވަނަ ޖާގަ ޔަގީންކުރީ، މިއަދު ހަވީރު ކުޅުނު މެޗުގައި، 6-1 އިން ވެލިދޫ ބަލިކޮށްގެންނެވެ.
މިލަދޫން ފަސޭހަ މޮޅެއް ހޯދި މި މެޗުގައި އެ ޓީމުގެ، ގޯލުތައް ޖެހީ މުހައްމަދު އިޔާން ހަސަން، މޫސާ ހުމައިދު، ހުސައިން ޝަފީ، މުހައްމަދު ޔައިޝް ނާއިޒު، މުހައްމަދު ނަވީދު އަދި މުހައްމަދު ހުސައިން އެވެ. އަދި މި މެޗުގައި ވެލިދޫން ކާމިޔާބުކުރި ހަމައެކަނި ގޯލު ޖެހީ އިބްރާހީމް ޒިޔާނެވެ.
ގޯލްޑަން ފުޓްސަލް ޗެލެންޖުގެ ނ. އަތޮޅު ފައިނަލް މެޗު ކުޅޭނީ އަންގާރަ ދުވަހުގެރޭގަ އެެވެ.
