ފައިނަލުގައި ޕެނަލްޓީ ޖަހައިގެން 4-2 އިން އެންމެ ފަހުގެ ޗެމްޕިއަން، ކަނޑިތީމު ބަލިކޮށް، ގޯލްޑަން ފުޓްސަލް ޗެލެންޖު 2025 ގެ ށ. އަތޮޅުގެ ޗެމްޕިއަންކަން މިލަންދޫން ހޯދައިފި އެވެ.
މިލަންދޫން މުޅިން އަލަށް އަތޮޅު ޗެމްޕިއަންކަން ހޯދިއިރު އެ ޓީމު ވަނީ ކުޅުނު ހުރިހާ މެޗަކުން މޮޅުވެފަ އެވެ. އޭގެ ތެރޭގައި، ގްރޫޕް ސްޓޭޖުގައި ކަނޑިތީމު އަތުން މޮޅުވި މެޗާއި ފައިނަލުގައި މިއަދު މޮޅުވި މެޗު ހިމެނެ އެެވެ.
ރެހެންދި ފުޓްސަލް ދަނޑުގައި މިއަދު ހަވީރު ކުޅުނު މެޗަށް ނުކުތްއިރު، މިލަންދޫން ކުޅެން ޖެހުނީ ކާޑު ހަމަވުމުގެ ސަަބަބުން އެ ޓީމުގެ އެންމެ މުހިންމު ކުޅުންތެރިޔާ، އިބްރާހިމް ސައީދު (އޮސްކާ) ނުލަ އެވެ. އޭނާ އަށް ތިން ކާޑު ހަމަވުމުގެ ސަބަބުން ފައިނަލަށް ވަނީ ސަސްޕެންޑްވެފަ އެވެ.
ފައިނަލް މެޗުގެ ފުރަތަމަ ހާފުގައި ކަނޑިތީމުން ލީޑުނެގީ އިބްރާހިމް ނަދާދު (ކުޑައްޓޭ) ޖެހި ގޯލުންނެވެ. އޭގެ އިރުކޮޅެއް ފަހުން، އިބްރާހިމް ޒާހީ ދިން ބޯޅައަކުން މިލަންދޫގެ ލަނޑު ޖެހީ އަހުމަދު ޝާނީ އެވެ. ޝާނީ ވަނީ މި ފަހަރު ށ. އަތޮޅުން އެންމެ ގިނަ ގޯލު ޖެހި ކުޅުންތެރިޔާގެ މަގާމާއި އެންމެ މޮޅު ކުޅުންތެރިޔާގެ މަގާމު ހޯދައިފަ އެވެ.
ނަތީޖާ ނެރެން ޕެނަލްޓީ ޖަހަން ޖެހުނުއިރު، ކަަނޑިތީމުން ޖެހި ތިން ޕެނަލްޓީއެއް ނާކާމިޔާބުވިއިރު، މިލަންދޫގެ ކީޕަރު އަހުމަދު ހުޝާމް ވަނީ މޮޅު ކުޅުމެއް ދައްކައިފަ އެވެ. މިލަންދޫން ތިން ޕެނަލްޓީއެއް ކާމިޔާބުކުރިއިރު، އެ ޓީމުގެ ޕެނަލްޓީތައް ކާމިޔާބުކުރީ ޒާހީ، ޝާނީ އަދި އިސްމާއިލް ފަތުހީ އެވެ. އެ ޓީމުގެ އަލީ އީނާސް އަށް ދެ ފަހަރު ޕެނަލްޓީ ޖަހަން ދިނުމުން ވެސް ފޮނުވާލީ ކީޕަރު އަަތަށެވެ.
ކަނޑިތީމުން ޕެނަލްޓީ ކާމިޔާބުކުރީ އިސްމާއިލް ނިހާން އެވެ. ކަނޑިތީމުން އާދަމް ތައުފީގު (ތައު) ޖެހި ޕެނަލްޓީ ބޭރަށް ދިޔައިރު، އަހުމަދު ރިޒާން އާއި މުހައްމަދު ޝާން ޖެހި ޕެނަލްޓީ ކީޕަރު ހުޝާމް ހުއްޓުވީ އެވެ.
ގޯލްޑަން ފުޓްސަލް ޗެލެންޖް 2025: (25 ޖެނުއަރީ)
20:00: ފ. މަގޫދޫ - ފ. ދަރަބޫދޫ
20:00: ފ. ބިލެއްދޫ - ފ. ފީއަލި
22:00: ދ. ކުޑަހުވަދޫ - ދ. ބަނޑިދޫ
22:00: ބ. އޭދަފުށި - ބ. ފެހެންދޫ
23:00: މ. ސެމީ ފައިނަލް: ދިއްގަރު - މުލި
23:00: މ. ސެމީ ފައިނަލް: ކޮޅުފުށި - މުލަކު
