ގޯލްޑަން ފުޓްސަލް ޗެލެންޖުގައި ގްރޫޕްގެ ފަހު މެޗުގައި ދިއްފުށްޓާ ލަނޑެއް ނުުޖެހި 0-0 އިން އެއްވަރުވެ، ހޯދި ޕޮއިންޓާ އެކު އެ ޓީމު ކަޓުވާލައި ގާފަރުން ސެމީ ފައިނަލުގައި ކާށިދޫއާ ދެކޮޅަށް ކުޅެން ޖެހިއްޖެ އެވެ.
ގްރޫޕް އޭގެ އެއް ވަނަ ދިޔައީ މިރޭ ހިންމަފުށި އަތުން 6-1 އިން މޮޅުވެ، ހަތް ޕޮއިންޓް ހޯދި މާފުށްޓެވެ. އެ ގްރޫޕްގެ ދެ ވަނަ ދިޔައީ ފަސް ޕޮއިންޓް ހޯދި ގާފަރެވެ. ތިން ވަނަ އަށް ދިޔަ ދިއްފުށި ވަނީ ހަތަރު ޕޮއިންޓާ އެކު ކަޓައިފަ އެވެ. ގްރޫޕްގެ ފުލަށް ދިޔަ ހިންމަފުށި ކުޅުނު ތިން މެޗުން ވެސް ވީ ބައްޔެވެ.
ގްރޫޕް ބީގެ އެއް ވަނަ ހޯދި ކާށިދޫ އާއި ދެ ވަނަ ހޯދި ގުރައިދޫ އަށް ވެސް ލިބުނީ ހަތް ޕޮއިންޓެެވެ. ކާށިދޫން ފަހު މެޗުގައި 4-2 އިން ގުޅި ބަލިކުރިއިރު، ގުރައިދޫން ވަނީ ތުލުސްދޫ އަތުން 4-0 އިން މޮޅުވެފަ އެވެ. ތިން ވަނަ އަށް ދިޔަ ގުޅި އަށް ތިން ޕޮއިންޓް ލިބުނުއިރު، ފުލުގައި ނިންމި ތުލުސްދޫ ވީ ތިން މެޗުން ވެސް ބައްޔެވެ.
ގާފަރާއި ދިއްފުށި ކުޅުނު މެޗުގައި ދެ ޓީމުން ވެސް ފަހު ވަގުތާ ހަމައަށް ޖެހެންދެން ހިތްވަރުކުރި އެވެ. ގާފަރުގެ ޝަނާން ރަޝާދު ފުރަތަމަ ހާފުގައި ޖެހި ބޯޅައެއް ދަނޑިއަށް އަމާޒުވިއިރު، މެޗުގެ ފަހު ގަޑީގައި ދިއްފުށީގެ ހަމަަލާއެއް ވެސް ދަނޑިއަށް އަމާޒުވި އެވެ. މެޗުގެ ފަހުކޮޅުގައި، ގާފަރުގެ ސާމިން މުހައްމަދު ނަސީރު އަށް ދިއްފުށީގެ ޝައިހާން ކުރި ފައުލަކަށް އޭނާ އަށް ދެ ވަނަ ރީނދޫ ކާޑާ އެކު ރަތް ކާޑު ދެއްކިއިރު، އެ ފައުލާ ގުޅިގެން ދެ ޓީމުގެ އޮފިޝަލުން ދަނޑައަށް އަރައި ހަމަނުޖެހުމެއް ހިނގި އެވެ.
ކާށިދޫ އަށް ގޯލުތައް ޖަހައިދިނީ، އަޖުލާން އަބްދުލް ހަންނާން އާއި ޝައްފާން ވަސީމް، ކޮންމެ ކުޅުންތެރިއަކު ދެ ގޯލެވެ. ގުޅީގެ ދެ ގޯލު ޖަހައިދިނީ އަހުމަދު އަރުސޫން ޝާހިރު އާއި މުހައްމަދު ޔަޒީދު އެވެ. މި ފަހަރުގެ ސެމީގައި ގާފަރާއި ކާށިދޫ ކުޅޭއިރު، މިދިޔަ އަހަރުގެ ފައިނަލުގައި، ގާފަރުން ވަނީ ކާށިދޫ 5-1 އިން ބަލިކޮށްފަ އެވެ.
މި ފަހަރުގެ ސެމީ ފައިނަލް އަނެއް މެޗުގައި ކުޅޭނީ ގުރައިދޫ އާއި މާފުށްޓެވެ.
ހިންމަފުށި ކޮޅަށް، މިދިޔަ އަހަރުގެ ސެމީ ފައިނަލަށް ދަތުރުކުރި، މާފުށީގެ ލަނޑުތައް ޖަހައިދިނީ އަހުމަދު ޝަމާލް ހެޓްރިކެއްގެ އިތުރުން، އިސްމާއިލް މަފާޒް އިބްރާހިމް، އިސްމާއިލް ނަޒީހު އަދި ހަސަން ރިފާން އެވެ. ހިންމަފުށީގެ ގޯލު ޖެހީ އަތުޝަން އިބްރާހިމް އެވެ.
ތުލުސްދޫ އަތުން މޮޅުވި މެޗުގައި ގުރައިދޫގެ ގޯލުތައް ޖެހީ، އަބްދުﷲ ޝަޔަމް، އަހުމަދު ނޫމާން (ހެލްމެޓް)، ނާއިޝް އާދަމް އަދި އިޝްއާފު އަހުމަދު ފިރާގު އެވެ.
ކ. އަތޮޅުގެ ސެމީ ފައިނަލް މެޗުތައް އޮތީ، އަންނަ އަންގާރަ ދުވަހުގެ ރޭގަ އެވެ.
ގޯލްޑަން ފުޓްސަލް ޗެލެންޖް (25 ޖެނުއަރީ 2025)
16:00: ށ. ފައިނަލް: ކަނޑިތީމު - މިލަންދޫ
16:00: ނ. މިލަދޫ - ނ. ވެލިދޫ
------------------------------------------
20:00: ފ. މަގޫދޫ - ފ. ދަރަބޫދޫ
20:00: ފ. ބިލެއްދޫ - ފ. ފީއަލި
21:00: ދ. ކުޑަހުވަދޫ - ދ. ބަނޑިދޫ
21:00: ބ. އޭދަފުށި - ބ. ފެހެންދޫ
22:00: މ. ސެމީ ފައިނަލް: ދިއްގަރު - މުލި
22:00: މ. ސެމީ ފައިނަލް: ކޮޅުފުށި - މުލަކު
