މި ފަހަރުގެ މުބާރާތުގައި ށ. އަތޮޅުގެ ގްރޫޕް ސްޓޭޖުން ފެށިގެން ފައިނަލާ ހަމައަށް ކުޅުނު ހުރިހާ މެޗަކުން މޮޅުވެފައިވާ، މިލަންދޫން ފައިނަލަށް ނުކުންނާނީ ވަރުގަދަ އަޒުމަކާ އެކު ތަށި ހޯދަން ކަމަށް އެ ޓީމަށް މި މުބާރާތުގައި މޮޅު ކުޅުމެއް ދައްކަމުން އަންނަ އަހުމަދު ޝާނީ ބުނެފި އެވެ.
މިލަންދޫން ވަނީ މި ފަހަރުގެ މުބާރާތުގެ ގްރޫޕް ސްޓޭޖުގައި ކުޅުނު ތިން މެޗުންނާއި ސެމީ ފައިނަލުގައި ވެސް މޮޅުވެފަ އެވެ. ސެމީ ފައިނަލުގައި އެ ޓީމުން ވަނީ ނަރުދޫ އަތުން 4-0 އިން މޮޅުވެފަ އެވެ.
"ވަރަށް ދުވަހުގެ މަސައްކަތް މިއީ، މަހެއް ކުރިން، ދުރާލާ ރެޑީވެގެން ޕްރެކްޓިސް ވެސް ޖައްސައި، އިރާދަކުރެއްވިއްޔާ އަޅުގަނޑުމެން ޓާގެޓަކީ ށ. އަތޮޅުގެ ޗެމްޕިއަންކަން ނެގުން. އިރާދަކުރެއްވިއްޔާ، މި އަށް ވުރެ ރަނގަޅަށް ޖައްސައި ތަށި އަޅުގަނޑުމެން ނަގާނަން،" ސެމީ ފައިނަލް މެޗަށް ފަހު، "އަދަދު ސްޕޯޓްސް" އަށް ޝާނީ ބުންޏެވެ.
މި ފަހަރުގެ މުބާރާތުގައި މިލަންދޫގެ ބައެއް މެޗުތަކުގައި ކެޕްޓަންކަން ވެސް ކުރި ޝާނީ އަކީ އެ އަތޮޅުގެ އެންމެ ގިނަ ގޯލު ޖެހި ކުޅުންތެރިންގެ ތެރެއިން އެކަކެވެ. އެ ގޮތުން، ޝާނީ އާއި މިލަންދޫގެ އިބްރާހިމް ޒާހީ ވަނީ ކޮންމެ ކުޅުންތެރިއަކު ފަސް ގޯލު ޖަހައިފަ އެވެ.
އެހެން ނަމަވެސް، ޝާނީ ދެކޭގޮތުގައި ގޯލްޑަން އަންނަނީ އަހަރުން އަހަރަށް އުނދަގޫވަމުންނެވެ. އެހެންކަމުން، ޗެލެންޖިން މެޗުތަކުން މޮޅު ހޯދެނީ ބުރަ މަސައްކަތުންކަން ފާހަގަކުރި އެވެ.
"ގޯލްޑަން އަހަރަކަށް ވުރެ އަހަރެއް ޓީމުތައް ގިނަވެ، ކޯޗުން ލައިގެން ވަރަށް ގިނަ ދުވަހު ޕްރެކްޓިސްކޮށް، ހުރިހާ ޓީމެއް ވެސް ވަރަށް ރަނގަޅުވަމުން ހުރިހާ ރަށެއް ވެސް އަންނަނީ. ޕްރެކްޓިސްތަކެއްކޮށްގެން (އަންނާތީ) ހުރިހާ އަތޮޅެއް ވެސް ވަރަށް ޗެލެންޖިން. ވަރަށް އުނދަގޫ،" ޝާނީ ބުންޏެވެ.
ފައިނަލުގައި މިލަންދޫން ކުޅޭނީ އަތޮޅުގެ އެންމެ ކާމިޔާބު ޓީމު ކަނޑިތީމާ އެވެ. މި ދެ ޓީމުން ގްރޫޕް ސްޓޭޖުގައި ކުޅުނު މެޗުން މިލަންދޫ 2-0 އިން މޮޅުވި އެވެ. އެކަމަކު، ފައިނަލް މުޅިން ތަފާތުވާނެތީވެ، ޝާނީ ދެކޭގޮތުގައި، ފުރަތަަމަ މެޗުގައި ދަށްކޮށް އެ ދިޔަ ކަންކަން ރަނގަޅުކުރަން ޖެހޭނެ އެވެ.
"ރަނގަޅު ވާނެ، ރަނގަޅު ފައިޓެއް ދެވޭނެ، ކަނޑިތީމާ ގްރޫޕް ސްޓޭޖުގައި ވެސް ކުޅެފިން. ގްރޫޕް ސްޓޭޖުގައި އެ ގޯސްކޮށް ހެދުނު ކަންތައްތައް ރަނގަޅުކޮށްގެން އެ އަށް ވުރެ ރަނގަޅަށް ކުޅެ، އިރާދަކުރެއްވިއްޔާ ފައިނަލް މެޗުގައި ތަށި ނަގާނަން،" ވަރުގަދަ އުންމީދަކާ އެކު ހުރެ، ޝާނީ ބުންޏެވެ.
ށ. އަތޮޅުގެ ފައިނަލް މެޗު އޮތީ މާދަމާ ހަވީރު 4 ޖަހާއިރު އެވެ.
