ރ. އަތޮޅުގެ ބައެއް ރަށްރަށަށް ކުރެއްވި ރަސްމީ ދަތުރު ނިންމަވާލެއްވުމަށް ފަހު ރައީސް ޑރ. މުހައްމަދު މުއިއްޒު އެނބުރި މާލެ ވަޑައިގެންފި އެވެ.
އަންގާރަ ދުވަހު ފެއްޓެވި މި ދަތުރުގައި ރައީސް ވަނީ ރ. އަތޮޅުގެ 10 ރަށަކަށް ވަޑައިގެންފަ އެވެ. މި ދަތުރުގައި އެ ރަށްރަށުގެ ކައުންސިލްތަކާއި އެހެން އިދާރާތަކާ ރައީސް ބައްދަލުކުރެއްވި އެވެ.
ރައީސްގެ އިތުރުން ގިނަ ވަޒީރުންނާއި ވެރިކަންކުރާ ޕީއެންސީއަށް ނިސްބަތްވާ މަޖިލިސް މެންބަރުން ހިމެނޭ ސަރުކާރުގެ ބޮޑު ވަފުދެއް ވެސް ރައީސް އާއެކު ރ. އަތޮޅަށް ވަޑައިގަތެވެ.
ކޮންމެ ރަށެއްގެ ރައްޔިތުންނާ ބައްދަލުކުރައްވާ ވާހަކަދެއްކެވުމުގެ އިތުރުން ރައީސް މުއިއްޒު ވަނީ އެ ރަށްރަށުގައި މިދިޔަ ސަރުކާރުގައި ފަށާ, މިހާރު މަސައްކަތް ނިންމާފައިވާ ތަރައްގީގެ ބައެއް މަޝްރޫއުތައްވެސް އިފުތިތާހުކުރައްވާފަ އެވެ.
ރަށްރަށުގެ ރައްޔިތުންނާ މުހާތަބުކުރައްވާ ރައީސް ވަނީ މިދިޔަ އަހަރު ތަރައްގީގެ މަޝްރޫއުތައް ކުރިއަށް ނުދިޔަ ސަބަބުތަކާ ބެހޭގޮތުން އެމަނިކުފާނު ދައްކަވާ ވާހަކަތައް ތަކުރާރުކުރައްވާފަ އެވެ. އަދި، ތަރައްގީގެ މުޅީން އައު ވައުދުތަކެއް ވެސް އެމަނިކުފާނު ވެވަޑައިގެންނެވި އެވެ.
