ޕެނަމާ ކެނަލް ދިނީ ޗައިނާއިން އެތަނުން މަންފާ ހޯދަން ނޫން ކަމަށާއި އެ ކެނަލް އަތުލާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
ރައީސްކަމުގެ ހުވާ ކުރެއްވުމަށް ފަހު ގައުމާ މުހާތަބު ކުރައްވަމުން ޓްރަމްޕް ވިދާޅުވީ ޕެނަމާ ކެނަލްއަކީ އެމެރިކާއިން މިހާތަނަށް އެންމެ ބޮޑު ހަރަދެއް ކުރި މަޝްރޫއު ކަމަށް ވާއިރު، އެތަން ޕެނަމާއާ ހަވާލުކުރި އެއްބަސްވުމާ އެ ގައުމުން ހިލާފުވެފައިވާ ކަމަށެވެ.
މި ގޮތުން އެމެރިކާގެ އާގު ބޯޓުތަކަށް ބޮޑު އަގު ނަގައި ނާއިންސާފުން އަމަލު ކުރަމުންދާކަން ފާހަގަކުރައްވައި ޓްރަމްޕް ވިދާޅުވީ ޕެނަމާ ކެނަލްގައި ޗައިނާއިން އޮޕަރޭޓު ކުރަމުންދާ ކަމަށާއި އެތަން ދިނީ ޗައިނާއިން ބޭނުން ހިފަން ނޫން ކަމަށެވެ.
"އަހަރުމެންނާ މެދު ވަރަށް ގޯސްކޮށް އަމަލު ކުރަމުންދަނީ. އެއީ ހަދިޔާއެއްގެ ގޮތުން ދެވިގެންވާނެ ތަނެއް ނޫން. ޕެނަމާއިން އަހަރުމެންނާ އެކުވީ އެއްބަސްވުމާ ވަނީ ހިލާފުވެފައި. އެއްބަސްވުން ހެދި މަގުސަދު ވަނީ ގެއްލިފައި. އެމެރިކާގެ އާގު ބޯޓުތަކަށް ބޮޑު އަގު ނަގަމުންދަނީ. އެއްވެސް އިންސާފަކުން ނޫން އަމަލު ކުރަނީ. ޗައިނާއިން ދަނީ ޕެނަމާ ކެނަލްގައި އޮޕަރޭޓް ކުރަމަުން. އެތަން އަހަރުމެން ދިނީ ޗައިނާއަކަށް ނޫން. އެތަން ދިނީ ޕެނަމާއަށް އެތަން އަތުލާނަން،" ޓްރަމްޕް ވިދާޅުވި އެވެ.
އެމެރިކާގެ ރައީސްކަން ދެވަނަ ފަހަރަށް ކާމިޔާބު ކުރެއްވުމަށްފަހު، އިންތިހާބީ ރައީސްގެ ގޮތުގައި ހުންނަވައި ވެސް ޓްރަމްޕް ވަނީ ޕެނަމާ ކެނަލް އަތުލަން ޖެހިދާނެ ކަމުގެ އިންޒާރު ދެއްވާފަ އެވެ.
ޓްރަމްޕް ކުރިން ވިދާލުވީ އެޓްލާންޓިކް ކަނޑާއި ޕެސިފިކް ކަނޑު ގުޅުވައިދޭ މުހިއްމު އެ ކެނަލް ނުބައި ބައެއްގެ އަތްމަތީގައި ނުބާވާނެ ކަމަށެވެ.
މީގެ ގަރުނަކަށް ވުރެ ކުރިން 1900 އަހަރުތަކުގެ ކުރީކޮޅުގައި އެމެރިކާ އާއި ޕެނަމާއާ ދެމެދު ވެވުނު އެއްބަސްވުމެއްގެ ދަށުން އެމެރިކާއިން ކެނަލް ހެދި އެވެ. އެއަށް ފަހު 1999 އާ ހަމައަށް ކެނަލް ބަލަހައްޓަމުން ދިޔައީ އެމެރިކާ އާއި ޕަނަމާ ގުޅިގެންނެވެ.
ނަމަަވެސް ޑިސެންބަރު 31، 1999 އިން ފެށިގެން އެ ކެނަލް ހިންގުމުގެ ހުރިހާ ބާރެއް އެމެރިކާއިން ޕެނަމާއަށް ދިނެވެ.
އެ ކެނަލް އެންމެ ގިނައިން ބޭނުން ކުރަނީ އެމެރިކާގެ އާގުބޯޓު ފަހަރެވެ. ކެނަލް ހުރަސްކުރާ އުޅަނދުގެ ބޮޑުމިނާއި، ދަތުރުގެ ބޭނުމަށް ބަލައި ނަގާ އަގުތައް 0.50 ޑޮލަރުން 300،000 ޑޮލަރަށް އަރަ އެވެ.
އެމެރިކާ އާއި ޕެނަމާއާ ދެމެދު 1903 ގައި ހެދި އެއްބަސްވުމުގެ ދަށުން އެ ކެނަލް އެމެރިކާއިން ތަރައްގީކޮށް ނިންމީ 1914 ވަނަ އަހަރު އެވެ.
