ގޯލްޑަން ފުޓްސަލް ޗެލެންޖު 2025 ގެ ށ، އަތޮޅުގެ ފައިނަލުގައި މިލަންދޫ އާއި ކަނޑިތީމު ބައްދަލުކުރަން ޖެހިއްޖެ އެވެ.
ގްރޫޕް ސްޓޭޖުން ކުޅުނު މެޗުން މިލަަންދޫ ވަނީ 2-0 އިން ކަނޑިތީމު އަތުން މޮޅުވެފަ އެެވެ. އެންމެ ފަހުގެ ޗެމްޕިއަން، ކަނޑިތީމުން ސެމީ ފައިނަލުގައި މިއަދު ހަވީރު ބިލެއްފަހި ބަލިކުރީ 2-0 އިންނެވެ.
އަދި މުޅިން އަލަށް މި ފަހަރުގެ މުބާރާތުގައި ވާދަކޮށް ސެމީ ފައިނަލަށް ދަތުުރުކުރި ނަރުދޫ އަތުން މިލަންދޫ ވަނީ 4-0 އިން މޮޅުވެފަ އެވެ.
މިލަންދޫން މިއަދުގެ މެޗުގައި ޖެހި ހަތަރު ގޯލުގެ ތެރެއިން ދެ ގޯލު ޖެހީ އެ ޓީމުގެ އަހުމަދު ޝާނީ އެވެ. އަނެއް ދެ ގޯލު ޖެހީ އަލީ އީނާސް އާއި އިބްރާހިމް ޒާހީ އެވެ.
ކަނޑިތީމުގެ ކެޕްޓަން، ކުޑައްޓޭ ބޯޅަ ހިފައިގެންދެވޭތޯ މަސައްކަތް ކުރަނީ.---- ފޮޓޯ: އަތޫފް އާތިފް / އަދަދު ސްޕޯޓްސް
މިލަންދޫގެ ކޯޗު އަހުމަދު ނިޔާޒް މޫސާ (ޓެޑް) ބުނީ، ފައިނަލުގައި ކުޅެން ޖެހޭ ކަނޑިތީމަކީ އަތޮޅުގެ އެންމެ ވަރުގަދަ އެއް ޓީމު ކަމަށާއި އެހެން ނަމަވެސް ފައިނަލަށް ނުކުންނާނީ ގްރޫޕް ސްޓޭޖެކޭ އެއްގޮތަށް ކަނޑިތީމުގެ މައްޗަށް ކުރިހޯދުމަށް ކަމަށެވެ.
އޭނާ ބުނީ، މިނިވަން 50 ޗެމްޕިއަންޝިޕްގައި މިލަންދޫ އަށް ކާމިޔާބު ހޯދައިދެވިއްޖެ ކަމަށާއި ދެން ބޭނުންވަނީ ފުޓްސަލްގައި މިލަންދޫ އަށް ރަން މެޑަލެއް ގެންގޮސްދިނުމަށް ކަމަށެވެ.
ބިލެއްފަހި ކޮޅަށް ކަނޑިތީމަށް މިއަދުގެ މެޗުގައި ލަނޑުތައް ޖަހައިދިނީ، އިބްރާހިމް ނަދާދު (ކުޑައްޓޭ) އާއި އިސްމާއިލް ނިހާން އެވެ.
މިދިޔަ އަހަރު ށ. ފޭދޫ ބަލިކޮށް އަތޮޅު ތަށި ހޯދި، ކަނޑިތީމުގެ ތަރި، ކުޑައްޓޭ ބުނީ، މި ފަހަރުގެ ވެސް ފުރަތަަމަ ދުވަހުން ފެށިގެން އެންމެ ފުރަތަމަ ޓާގެޓަކީ އަތޮޅު ތަށި ދިފާއުކުރުން ކަމަށެވެ.
ކަނޑިތީމާއި މިލަންދޫ ކުޅޭ ށ. އަތޮޅު ފައިނަލް ކުރިއަށްދާނީ އަންނަ ހޮނިހިރު ދުވަހު ހަވީރު އެވެ.
ގޯލްޑަން ފުޓްސަލް ޗެލެންޖުގައި މިރޭ ކުޅޭ މެޗުތައް:
20:00: ދ. މާއެނބޫދޫ - ދ. ކުޑަހުވަދޫ
21:00: ގދ. ފަރެސްމާތޮޑާ - ގދ. ތިނަދޫ
21:00: ގދ. ފިޔޯރީ - ގދ. ގައްދޫ
22:00: ސ. ހުޅުދޫ - ސ. ފޭދޫ
22:00: ސ. ހިތަދޫ - ސ. މީދޫ
23:00: ފ. ފީއަލި - ފ. ނިލަންދޫ
23:00: ފ. ބިލެއްދޫ - ފ. ދަރަނބޫދޫ
