ގޯލްޑަން ފުޓްސަލް ޗެލެންޖު 2025 ގެ އދ. އަތޮޅުގެ ގްރޫޕް ސްޓޭޖުގައި މަހިބަދޫން ކުޅުނު ދެ ވަނަ މެޗުން ވެސް މޮޅުވެ، ގްރޫޕްގެ އެއް ވަނަ ހޯދިއިރު، ސެމީ ފައިނަލުގެ ފަހު ޖާގަތައް ކުނބުރުދޫ އާއި މަންދޫން ހޯދައިފި އެވެ.
ގްރޫޕް އޭގެ ފަަހު މެޗުން ރޭ ކުނބުރުދޫން ވަނީ 3-0 އިން ހަންޏާމީދޫ ބަލިކޮށްފަ އެވެ. ގްރޫޕް ބީގެ ފަހު މެޗުން، މަހިބަދޫން ވަނީ އޮމަދޫ އަތުން 4-1 އިން މޮޅުވެފަ އެވެ.
ގްރޫޕް އޭގެ އެއް ވަނަ ދަނގެތިން ހޯދާފައިވަނީ، ދެ މެޗުން މޮޅުވެ، ހަ ޕޮއިންޓާ އެކު އެވެ. ދެ ވަނަ ހޯދި ކުނބުުރުދޫ އަށް ތިން ޕޮއިންޓް ލިބުނުއިރު، ހަންޏާމީދޫ ކެޓީ ޕޮއިންޓެއް ނުލިބި އެވެ. ގްރޫޕް ބީގެ އެއް ވަނަ ހޯދި މަހިބަދޫ އަށް ހަ ޕޮއިންޓް ލިބުނުއިރު، ދެ ވަނަ ހޯދި މަންދޫ އަށް ތިން ޕޮއިންޓް އަދި ފުލަށް ދިޔަ އޮމަދޫ އަށް ޕޮއިންޓެއް ނުލިބެ އެވެ.
ކުނބުރުދޫ އަށް ރޭގެ މެޗުގައި ލަނޑުތައް ޖަހައިދިނީ، މުހައްމަދު ޔާސިރު މޫސާ، މުހައްމަދު ސަމާހު މޫސާ ފަތުހީ އަދި ހުސެއިން ޝަޒީމް އެވެ. މަހިބަދޫ އަށް ލަނޑުތައް ޖަހައިދިނީ، އަބްދުﷲ މިދުހަތު ފަހުމީ (ބިޗަޑް)، އާދަމް ފަހުމާން އަދި ހަސަން ނާއިމްގެ އިތުރުން، އޮމަދޫގެ އަލީ އަޒުމީ އަތުން ބައިކޮޅަށް ވަން ގޯލެކެވެ. އަދި އޮމަދޫގެ ލަނޑު ޖެހީ އަލީ ޝާޒް ހިލްމީ އެވެ.
ސެމީ ފައިނަލުގައި، މަހިބަދޫން ކުޅޭނީ ކުނބުރުދޫއާ އެވެ. އަދި މަންދޫ ބައްދަލުކުރާނީ ދަނގެއްޗާ އެވެ.
ގޯލްޑަން ފުޓްސަލް ޗެލެންޖުގައި މިއަދާއި މިރޭ ކުޅޭ މެޗުތައް:
16:00: ށ. ސެމީ ފައިނަލް: މިލަންދޫ - ނަރުދޫ
16:00: ށ. ސެމީ ފައިނަލް: ކަނޑިތީމު - ބިލެއްފަހި
17:00: ނ. ހޮޅުދޫ - ނ. މިލަދޫ
----------------------------------------
20:00: ދ. މާއެނބޫދޫ - ދ. ކުޑަހުވަދޫ
21:00: ގދ. ފަރެސްމާތޮޑާ - ގދ. ތިނަދޫ
21:00: ގދ. ފިޔޯރީ - ގދ. ގައްދޫ
22:00: ސ. ހުޅުދޫ - ސ. ފޭދޫ
22:00: ސ. ހިތަދޫ - ސ. މީދޫ
23:00: ފ. ފީއަލި - ފ. ނިލަންދޫ
23:00: ފ. ބިލެއްދޫ - ފ. ދަރަނބޫދޫ
