ގޯލްޑަން ފުޓްސަލް ޗެލެންޖް 2025 ގެ ގއ. އަތޮޅުގެ ސެމީ ފައިނަލަށް ދިޔަ ޓީމުތައް ވަނީ ކަށަވަރުވެއްޖެ އެވެ.
ފޯރިގަދަކޮށް ކުރިއަށްދިޔަ ގއ. އަތޮޅުން، މި ފަހަރު ސެމީ ފައިނަލަށް ދަތުރުކުރީ، ގްރޫޕް އޭ އިން ދާންދޫ، ނިލަންދޫ އަދި ގްރޫޕް ބީ އިން ދެއްވަދޫ އާއި ވިލިނގިލި އެވެ.
ދާންދޫ އިން ރޭ 2-1 އިން ގެމަނަފުށި ބަލިކުރިއިރު، އެ މެޗުގައި ދާންދޫގެ ތަރި އަހުމަދު ހަސަން (އަންމަޑޭ) ދެ ގޯލު ޖެހިއިރު، ގެމަނަފުށީގެ ގޯލު މެޗުގެ ފަހު ވަގުތު ޖެހީ އަލްތޯފު ރަޝާދު އެވެ.
ނިލަންދޫން ވަނީ ރޭ ކަނޑުހުޅުދޫ 1-0 އިން ބަލިކޮށްފަ އެވެ. މި މެޗުގެ ފަހުކޮޅުގައި ކަނޑުހުޅުދޫގެ އައްޒާމް އަލީ ދީދީ އަށް ރަތް ކާޑު ދެއްކިއިރު، އޭގެ ފަހުން،، މެޗު ފަހު ވަގުތު ގޯލު ޖެހީ ނިލަންދޫގެ މައުފޫޒް އާދަމް އެވެ.
މުބާރާތުގައި ތަފާތު ނަތީޖާތަކެއް ނެރެމުން އައި، ދެއްވަދޫ ރޭ ކުޅުނު މެޗުން މާމެންދޫއާ ވަނީ 3-3 އިން އެއްވަރުވެފަ އެވެ. މި މެޗުގައި، ދެއްވަދޫގެ ލަނޑުތައް ޖެހީ، އެ ޓީމުގެ ކެޕްޓަން، އަހްނަފް ރަޝީދާ (އަހުއްކޮ) އާއި ހުޒައިފަތު ރަޝީދު (ހުޒޭ)ގެ އިތުރުން މުހައްމަދު އިމްރާން (އިންމި) އެވެ.
އަދި މާމެންދޫގެ ގޯލުތައް ޖެހީ ރައުހާން ރިއްފަތު، ޝަމްވީލް މުހައްމަދު އަދި އަލީ މައްސޫދު ސައީދު އެވެ.
ވިލިނގިލިން ފޯރިގަދަ މެޗެއް ކުޅެ، ކޮލަމާފުށީގެ މައްޗަށް ކުރިހޯދީ 4-3 އިންނެވެ. ވިލިނގިލީގެ ލަނޑުތައް ޖެހީ، އައުޝަމް ރަޝާދު، އިސްމާއީލް އަޒީޒް، މުހައްމަދު ޝުހާމްގެ އިތުރުން، ކޮލަމާފުށީގެ މުހައްމަދު ޝައްފާފް ޝިހާބު އަތުން ބައިކޮޅަށް ވަން ގޯލެކެވެ. ކޮލަމާފުށީގެ ޝައްފާފް ވަނީ އެ ޓީމަށް ވެސް ގޯލެއް ޖަހައިދީފަ އެވެ. ކޮލަމާފުށީގެ ލަނޑުތަކަށް ބަލާއިރު، ވިލިނގިލީގެ ޝަޒްމީން މުހައްމަދު ރާޝިދު އަތުން ވެސް ބައިކޮޅަށް ގޯލެއް ވަދެފައިވެ އެވެ. އެ ޓީމުން ދެން ގޯލެއް ޖެހީ ޖެހީ އާސިފް ހަނީފް އެވެ.
ގޯލްޑަން ފުޓްސަލް ޗެލެންޖުގައި މިއަދު ހަވީރާއި މިރޭ ކުޅޭ މެޗުތައް:
16:00: ކ. ދިއްފުށި - ކ. މާފުށި
16:00: ކ. ހިންމަފުށި - ކ. ގާފަރު
17:00: ކ. ގުޅި - ކ. ގުރައިދޫ
17:00: ކ. ތުލުސްދޫ - ކ. ކާށިދޫ
----------------------------------------
20:00: އއ. ސެމީ ފައިނަލް: އއ. ރަސްދޫ - އއ. މަތިވެރި
20:00: އއ. ސެމީ ފައިނަލް: އއ. ބޮޑުފޮޅުދޫ - އއ. ތޮއްޑޫ
21:00: އދ. ހަންޏާމީދޫ - އދ. ކުނބުރުދޫ
21:00: އދ. މަހިބަދޫ - އދ. އޮމަަދޫ
22:00: ޅ. ހިންނަވަރު - ޅ. ނައިފަރު
22:00: ޅ. ކުރެންދޫ - ޅ. އޮޅުވެލިފުށި
23:00: ވ. ފުލިދޫ - ވ. ކެޔޮދޫ
