ދުނިޔޭގައި ޑިޖިޓަލީ ގޮތުން އެންމެ ކުރިއަރާފައިވާ ގައުމުތަކުގެ ތެރޭގައި ހިމެނޭ، އެސްޓޯނިއާއަށް ކުރެއްވި ރަސްމީ ދަތުރަށް ފަހު ރައީސް ޑރ. މުހައްމަދު މުއިއްޒު މިއަދު ރާއްޖެއަށް ވަޑައިގެންފި އެވެ.
އެސްޓޯނިއާގެ ރައީސް އަލާ ކަރިސްގެ ދައުވަތަކަށް ރައީސް މުއިއްޒު އެ ގައުމަށް ކުރެއްވި ދަތުރުގައި އެކި ދާއިރާތަކުން ދެ ގައުމުގެ ގުޅުން ބަދަހި ކުރުމާ ގޮތުން މަޝްވަރާ ކުރެއްވި އެވެ.
ރައީސް މުއިއްޒު ވަނީ އެސްޓޯނިއާގެ ރައީސް، ރައްޔިތުންގެ މަޖިލީހުގެ ރައީސް، ވަޒީރުން، ޓާރްޓޫގެ މޭޔަރު، ތައުލީމީ ދާއިރާގެ މަންދޫބުން އަދި އެކި މުއައްސަސާތަކުގެ އިސްވެރިންނާ ބައްދަލު ކުރައްވައި އެކި މަޝްވަރާތައް ކުރިއަށް ގެންގޮސްފަ އެވެ.
އެ ދަތުރުގައި ރާއްޖެ އާއި އެސްޓޯނިއާއާ ދެމެދު ތިން އެމްއޯޔޫއެއްގައި ސޮއިކުރި އެވެ.
އެއީ ދެ ސަރުކާރު ދެމެދުގައި މައުލޫމާތު ބަދަލު ކުރުމުގެ އެއްބަސްވުމަކާއި މޫސުމާއި ތިމާވެއްޓާއި ހަކަތައާ ބެހޭ ދާއިރާތަކުން އެއްބާރުލުން ދިނުމުގެ އެއްބަސްވުމެއްގެ އިތުރުން ރާއްޖޭގެ ހޯމްލޭންޑް ސެކިއުރިޓީ މިނިސްޓްރީ އާއި އެސްޓޯނިއާގެ މިނިސްޓްރީ އޮފް ޖަސްޓިސް އެންޑް ޑިޖިޓަލް އެފެއާޒްއާ ދެމެދު ވެވުނު އެއްބަސްވުމެވެ.
އެސްޓޯނިއާއަށް ކުރެއްވި ދަތުރަށް ފަހު ޕީއެސްއެމްއަށް ދެއްވި އިންޓަވިއުއެއްގައި ރައީސް މުއިއްޒު ވިދާޅުވީ އެ ގައުމު ޑިޖީޓަލައިޒް ކުރަން ހާސިލު ކުރި މަސައްކަތްތަކުގެ އިތުރުން ގޮންޖެހުންތަކުން އަރައިގަތް ގޮތް ދެނެގަނެވުނު ކަމަށެވެ.
