ގޯލްޑަން ފުޓްސަލް ޗެލެންޖު 2025 ގައި، ނ އަތޮޅުގެ ފުރަތަމަ މޮޅު ވެލިދޫ އަތުން މޮޅުވެ، ހޮޅުދޫން އަތޮޅުގެ ފުރަތަމަ މޮޅު ހޯދިއިރު، ވ. އަތޮޅުން ފުލިދޫގެ މައްޗަށް ކުރިހޯދައި ފެލިދޫން ވަރުގަދަކޮށް ފަށައިފި އެވެ.
މި ފަހަރުގެ ގޯލްޑަން ފުޓްސަލް ޗެލެންޖުގައި ނ. އަތޮޅުން ވާދަކުރަނީ އެންމެ ތިން ޓީމެވެ. އެއީ ވެލިދޫ އާއި ހޮޅުދޫގެ އިތުރުން، މިލަދޫ އެވެ.
ރޭ ކުޅުނު މެޗުގައި، ހޮޅުދޫން ވަނީ ފަސޭހަކަމާ އެކު ވެލިދޫގެ މައްޗަށް، 4-1 އިން ކުރިހޯދައިފަ އެވެ. މި މެޗުގައި ހޮޅުދޫން ޖެހި ހަތަރު ގޯލު ވެސް ކާމިޔާބުކޮށްފައިވަނީ، އަބްދުލް ވަދޫދު އެވެ. ވެލިދޫގެ ހަމައެކަނި ގޯލު މި މެޗުގައި ކާމިޔާބުކޮށްފައިވަނީ، އަބްދުﷲ އިބްރާހިމް އެވެ.
މި ނަތީޖާއާ އެކު، ހޮޅުދޫން ވަނީ އަތޮޅު ފައިނަލުގެ އުންމީދު ބޮޑުކޮށްފަ އެވެ.
ފެލިދޫ ޓީމަށް ރޭގެ މެޗުގައި ފައިޒާން ގޯލު ޖެހުމަށް ފަހު އުފާފާޅުކުރަނީ.--- ފޮޓޯ: އިމޭޖަސް،އެމްވީ
ގޯލްޑަން ފުޓްސަލް ޗެލެންޖުގެ ވ. އަތޮޅު ބުރުގައި މި ފަހަރު ތިން ޓީމެއް ވާދަކުރެ އެވެ. އެ ގޮތުން، ފުރަތަމަ މެޗުގައި ފުލިދޫ އަތުން 1-0 އިން ފެލިދޫ މޮޅުވިއިރު، ދެން މި އަތޮޅުން ކުޅެނީ، ކެޔޮދޫ އެވެ.
ރޭ ފެލިދޫން ފުލިދޫގެ މައްޗަށް ކުރިހޯދިއިރު، މި މެޗުގައި ޖެހި ހަމައެކަނި ލަނޑު ކާމިޔާބުކުރީ މުހައްމަދު ފައިޒާން ފަޒީން އެވެ.
ގޯލްޑަން ފުޓްސަލް ޗެލެންޖުގައި މިއަދު ހަވީރާއި މިރޭ ކުޅޭ މެޗުތައް:
16:00: ބ. އޭދަފުށި - ބ. ތުޅާދޫ
17:00: ދ. ބަނޑިދޫ - ދ. މާއެނބޫދޫ
----------------------------------------
20:00: ހއ. ކެލާ - ހއ. ހޯރަފުށި
20:00: ހއ. ފިއްލަދޫ - ހއ. ބާރަށް
21:00: ހއ. އުތީމު - މުރައިދޫ
21:00: ހއ. އިހަވަންދޫ - ހއ. ދިއްދޫ
22:00: ހދ. ނޭކުރެންދޫ - ހދ. ނޮޅިވަރަންފަރު
22:00: ހދ. ފިނޭ - ހދ. މަކުނުދޫ
23:00: ހދ. ނައިވާދޫ - ހދ. ނެއްލައިދޫ
23:00: ހދ. ނޮޅިވަރަން - ހދ. ކުމުންދޫ
