ރަޝިޔާ-ޔޫކްރެއިން ހަނގުރާމައިގައި ވަކި ކޮޅެއް ނުނަގާ އޮތުމަށްފަހު އެ ސިޔާސަތު ބަދަލުކޮށް، ޔޫކްރެއިނަށް ތާއީދު ކުރާ ކަމަށް އެސްޓޯނިއާއަށް ވަޑައިގެން ރައީސް ޑރ. މުހައްމަދު މުއިއްޒު ވިދާޅުވި ނަމަވެސް އެއްވެސް ގައުމަކާ ހަތުރުވެރިކަމެއް ނެތް ކަމަށް ހާރިޖީ ވަޒީރު އަބްދުﷲ ހަލީލު މިއަދު ވިދާޅުވެއްޖެ އެވެ.
ރާއްޖެއިން ޔޫކްރެއިނަށް ތާއީދު ކުރާނެކަން އެނގުނީ ރައީސް މުއިއްޒު އެސްޓޯނިއާގެ ގާނޫނު ހަދާ މަޖިލީހުގެ ރައީސްލޯރީ ހުސާރްއާއެކު ބޭއްވި ބައްދަލުވުމަކަށްފަހު، ޔޫކްރެއިނަށް ތާއީދު ކުރައްވާނެ ކަމަށް އެ ބައްދަލުވުމުގައި ރައީސް ވިދާޅުވި ކަމަށް އޭނާ ވިދާޅުވުމުންނެވެ.
އެއާއެކު، ރަޝިޔާ-ޔޫކްރެއިން މައްސަލައިގައި ރާއްޖެއިން ގެންގުޅުނު ވަކި ކޮޅަކަށް ނުޖެހުމުގެ ސިޔާސަތު ބަދަލުކޮށްފައިވާތީ އެކަމަށް ފާޑުކިޔުން އަމާޒުވި އެވެ. އެ ވާހަކަތަކަށް ރައްދު ދެމުން ހަލީލު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، ރާއްޖޭގެ ސިޔާސަތު ބަދަލުނުވާ ކަމަށެވެ.
"ބައިނަލްއަގުވާމީ މައިދާނުގައި ރާއްޖެއިން ގެންގުޅޭ ސިޔާސަތުތައް ބަދަލެއް ނުވޭ. އދ. ގައި ރާއްޖެއިން ވޯޓު ދެމުންދާ ގޮތް ބައްލަވާލެއްވުމުން އެކަން ސާފުވާނެ. ކުދި ގައުމުތަކުގެ މިނިވަންކަމާއި ސިޔާދަތާއި އިސްތިގްލާލަށް ބުރޫއަރާ ފަދަ ހާލަތްތަކުގައި ރާއްޖެއިން އަބަދުވެސް ނަގަނީ ޕްރިންސިޕަލް ސްޓޭންޑެއް،" އޭނާ ވިދާޅުވި އެވެ.
ހަލީލު އިތުރަށް ވިދާޅުވީ ރާއްޖެއިން ގެންގުޅޭނީ އެއްވެސް ގައުމަކާ ހަތުރުވެރިކަން ނެތް ހާރިޖީ ސިޔާސަތެއް ކަމަށެވެ.
"ދިވެހިރާއްޖޭގެ ހާރިޖީ ސިޔާސަތު ބިނާވެގެންވަނީ އެއްވެސް ގައުމަކާ ހަތުރުވެރި ނުވެ ދިވެހި ރައްޔިތުންނަށް ލާބަ އާއި މަންފާ ލިބޭ ގޮތަށް އަދި ރާއްޖޭގެ މިނިވަންކަމާ ސިޔާދަތަށް ބުރޫ ނާރާ ގޮތަށް ހުރިހާ ގައުމަކާއެކީ ވެސް ގާތް ގުޅުން ބޭއްވުމުގު މައްޗަށް،" އޭނާ ވިދާޅުވި އެވެ.
ރަޝިޔާއަކީ ރާއްޖެއަށް ފަތުރުވެރިން އެންމެ ގިނައިން އަންނަ އެއް ގައުމެވެ. ޔޫކްރެއިން ހަނގުރާމައަށްފަހު ރަޝިޔާގެ ބިލިއަނަރުންގެ ބައެއް މުދާތައް ވެސް ރާއްޖެ ގެނެ އެވެ. އޭގެ ތެރޭގައި ބޮޑު ލަގްޒަރީ ޔޮޓުތައް ހިމެނެ އެވެ.
