މި އަހަރުގެ ގޯލްޑަން ފުޓްސަލް ޗެލެންޖުގައި ވެސް މުޅިން އަލަށް ރަށްތަކުން އަންނަނީ ވާދަކުރަމުންނެވެ. އެ ގޮތުން، ފުރަތަމަ ފަަހަރަށް ވާދަކުރާ އެއް ޓީމަކީ، ށ. އަތޮޅުން ވާދަކުރަމުން އަންނަ ނަރުދޫ އެވެ. ރާއްޖޭގެ ފުޓްސަލްގެ އެންމެ ވަރުގަދަ ސްޓޭޖުގައި، ނަރުދޫން ވަނީ އަތޮޅު ބުރުގައި ގްރޫޕް ސްޓޭޖު ފަހަނައަޅައި ގޮސް ސެމީ ފައިނަލުން ޖާގަ ހޯދައިފަ އެވެ.
ރޭ ނަރުދޫން ކުޅުނު ށ. ގްރޫޕް ބީގެ މެޗުން ގޮއިދޫއާ 2-2 އިން އެއްވަރުވިއިރު، އެ ޓީމަށް ސެމީ ފައިނަލުގެ ފުރުސަތު ލިބުނީ ގްރޫޕް ދެ ވަނައިގަ ގޮތުގަ އެވެ. އެ ގްރޫޕްގެ އެއް ވަަނަ ލިބުނީ، ޅައިމަގު އަތުން 7-1 އިން މޮޅުވެ، ފުރިހަމަ ރެކޯޑަކާ އެކު ނުވަ ޕޮއިންޓް ހޯދައިގެން، ނިންމާލި ބިލެއްފަހި އެވެ. ދެ ވަނަ ހޯދި ނަރުދޫ އާއި ތިން ވަނަ ހޯދި ގޮއިދޫ އަށް ހަތަރު ޕޮއިންޓް ލިބުނުއިރު، ނަރުދޫން ކުރިހޯދީ ލަނޑުގެ ތަފާތުންނެވެ. ފުލަށް ދިޔަ ޅައިމަގަށް ޕޮއިންޓެއް ވެސް ނުލިބެ އެވެ.
ރޭގެ މެޗުގައި، ގޮއިދޫގެ މުހައްމަދު އަހުސާމްގެ ގޯލުން އެ ޓީމުން ލީޑުނަގާފައިވަނިކޮށް ނަރުދޫން ނަތީޖާ އަނބުރާލީ އަމާން އަހުމަދު އާއި ޓީމުގެ ކެޕްޓަން، މުހައްމަދު ނާއިޒު ޖެހި ގޯލުންނެވެ. އަދި މެޗުގެ ފަހުކޮޅުގައި އަހުސާމް ވަނީ ގޯލެއް ޖަހައި ގޮއިދޫ އަށް އެއްވަރުކޮށްދީފަ އެވެ.
"ފުރަތަމަ ގޯލްޑަންގައި ބައިވެރިވެގެން މި މެޗަށް އައިއިރު އިނީ ޑްރޯ ކޮށްލައިގެން އަހަރެމެންނަށް ދެވޭ ގޮތަށް. ނުކުތީ އަސްލު މޮޅަކަށް، ދެން، ފަހު ވަގުތު ވަން ގޯލަކުން ޑްރޯ ވެގެން ނިމުނީ، ދެން، އަލަށް ގޯލްޑަންގައި ކުޅުނު އަހަރު ސެމީ އަށް މި ދެވުނީ، އަލްހަމްދުލިއްލާހި އެކަމަށް. ސެމީ އަށް ދާން މިއަދުގެ މެޗަށް ނުކުތީ ހަަމަ،" ނަރުދޫގެ ކެޕްޓަން، ނާއިޒު، "އަަދަދު ސްޕޯޓްސް" އަށް ބުންޏެވެ.
"އަނެއްހެން އަލަށް މި ނުކުތީ ފުދޭވަރަކަށް އާ ކޮށް މި ދަނީ ގޯލްޑަން، ރާއްޖޭގައި ބާއްވާ އެންމެ ބޮޑު މުބާރާތުގައި، އަނެއްހެން މި އޮތް ސްކޮޑާ ބަލައި ރަނގަޅަށް ހަމަ ޕްރެކްޓިސް ވެސް، އެކި ތަންތަނުން، ރަށުންނާއި ރިސޯޓުން ކުދިންތައް މާލެ ގެނެސްގެން، ކުޑަކޮށް ބައެއް ކަންތައްތަކުގައި ދަތި ހުރޭ އެހެން ނަމަވެސް އިރާދަކުރެއްވިއްޔާ ކުރިއަށްދާނީ،"
ނަރުދޫ އަކީ މި ފަހަރުގެ ގޯލްޑަން ފުޓްސަލް ޗެލެންޖުގައި އަލަށް ވާދަކޮށް ޖުމްލަކޮށް ބަލާއިރު ރަނގަޅު ކުޅުމެއް ދެއްކި ޓީމެކެވެ. ފުރަތަމަ މެޗުގައި ޅައިމަގު އަތުން 3-2 އިން މޮޅުވިިއިރު، ދެ ވަަނަ މެޗުގައި ބިލެއްފަހި އަތުން ބަލިވީ 3-2 އިންނެވެ.
ށ. އަތޮޅުގެ އެއް ސެމީ ފައިނަލުގައި، މިލަންދޫން ކުޅޭނީ ނަރުދޫއާ އެވެ. އަދި، އަނެއް ސެމީ ފައިނަލުގައި ބިލެއްފަހިން ކުޅޭނީ އެންމެ ފަހުގެ އަތޮޅު ޗެމްޕިއަން، ކަނޑިތީމުއާ އެވެ
