ގޯލްޑަން ފުޓްސަލް ޗެލެންޖްގެ ށ. އަތޮޅު ސެމީ ފައިނަލުގެ ފަހު ޖާގަ މުޅިން އަލަށް ވާދަކުރާ ނަރުދޫން ހޯދައިފި އެެވެ.
ރޭ ނަރުދޫން ކުޅުނު ށ. ގްރޫޕް ބީގެ މެޗުން ގޮއިދޫއާ 2-2 އިން އެއްވަރުވިއިރު، އެ ޓީމަށް ސެމީ ފައިނަލުގެ ފުރުސަތު ލިބުނީ ގްރޫޕް ދެ ވަނައިގަ ގޮތުގަ އެވެ. އެ ގްރޫޕްގެ އެއް ވަަނަ ލިބުނީ، ޅައިމަގު އަތުން 7-1 އިން މޮޅުވެ، ފުރިހަމަ ރެކޯޑަކާ އެކު ނުވަ ޕޮއިންޓް ހޯދައިގެން، ނިންމާލި ބިލެއްފަހި އެވެ. ދެ ވަނަ ހޯދި ނަރުދޫ އާއި ތިން ވަނަ ހޯދި ގޮއިދޫ އަށް ހަތަރު ޕޮއިންޓް ލިބުނުއިރު، ނަރުދޫން ކުރިހޯދީ ލަނޑުގެ ތަފާތުންނެވެ. ފުިލަށް ދިޔަ ޅައިމަގަށް ޕޮއިންޓެއް ވެސް ނުލިބެ އެވެ.
ގޮއިދޫގެ މުހައްމަދު އަހުސާމްގެ ގޯލުން އެ ޓީމުން ލީޑުނަގާފައިވަނިކޮށް ނަރުދޫން ނަތީޖާ އަނބުރާލީ އަމާން އަހުމަދު އާއި މުހައްމަދު ނާއިޒު ޖެހި ގޯލުންނެވެ. އަދި މެޗުގެ ފަހުކޮޅުގައި އަހުސާމް ވަނީ ގޯލެއް ޖަހައި ގޮއިދޫ އަށް އެއްވަރުކޮށްދީފަ އެވެ.
ބިލެއްފަހި ޓީމުގެ އާދަމް ހަލީމް ދެ ގޯލު ޖެހިއިރު، އެ ޓީމުގެ އަނެއް ލަނޑުތައް ޖެހީ، ހަސަން ސުޖާއު، އަބްދުﷲ ހަމީދު، އިބްރާހިމް އައިމަން، އަލީ އިފުރާދު، އަދި އަހުމަދު އިބްރާހިމް އެވެ. އަދި ޅައިމަގުގެ ހަމައެކަނި ލަނޑު ޖެހީ، އަބްދުލް ބާސިތު އަބްދުލް ގަނީ އެވެ.
ށ. އަތޮޅުގެ ގްރޫޕް އޭގައި، މިލަންދޫން ވަނީ 2-0 އިން އެންމެ ފަހުގެ ޗެމްޕިއަން، ކަނޑިތީމު ބަލިކޮށް ގްރޫޕްގެ އެއް ވަނަ ހޯދައިފަ އެވެ. މިލަންދޫން ނުވަ ޕޮއިންޓް ހޯދިއިރު، ދެ ވަނަ ލިބުނު، ކަނޑިތީމަށް ވަނީ ހަ ޕޮއިންޓް ލިބިފަ އެވެ. އެންމެ ފަހުގެ ރަނަރަޕް، ފޭދޫން ކުޅުނު ފަހު މެޗުން ވަނީ 4-0 އިން މަރޮށި ބަލިކޮށް ތިން ޕޮއިންޓް ހޯދައިފަ އެވެ. މަރޮށިން ނިންމާލީ ޕޮއިންޓެއް ނުލިބި އެވެ.
މިލަންދޫގެ ލަނޑުތައް ރޭ ޖެހީ، އަހުމަދު ޝަނީ އާއި އިބްރާހިމް ޒާހީ އެވެ. އަދި ފޭދޫން ލަނޑުތައް ޖެހީ، އަހުމަދު ފާއިން މުހައްމަދު، މާއިލް މުހައްމަދު އަދި މާޒިލް މުހައްމަދު އެވެ.
ސެމީ ފައިނަލުގައި، މިލަންދޫން ކުޅޭނީ ނަރުދޫއާ އެވެ. އަދި ބިލެއްފަހިން ކުޅޭނީ ކަނޑިތީމުއާ އެވެ.
ގޯލްޑަން ފުޓްސަލް ޗެލެންޖުގައި މިއަދު ހަވީރާއި މިރޭ ކުޅޭ މެޗުތައް:
16:00: ގދ. މަޑަވެލި - ގދ. ފަރެސްމާތޮޑާ
16:00: ގދ. ވާދޫ - ގދ. ގައްދޫ
17:00: ފ. ނިލަންދޫ - ފ. މަގޫދޫ
17:00: ފ. ފީއަަލި - ފ. ދަރަނބޫދޫ
----------------------------------------
20:00: ނ. ވެލިދޫ - ނ. ހޮޅުދޫ
20:00:
21:00: ސ. މަރަދޫފޭދޫ - ސ. ހުޅުދޫ
21:00: ސ. މަރަދޫ - ސ. މީދޫ
22:00: ވ. ފެލިދޫ - ވ. ފުލިދޫ
22:00: މ. މުލި - މ. ނާލާފުށި
23:00: މ. ވޭވަށް - މ. މަޑުއްވަރީ
23:00: މ. ދިއްގަރު - މ. މުލަކު
