ސްޓެލްކޯގެ މައްސަލަތައް އެންޓި ކޮރަޕްޝަން ކޮމިޝަނުން ތަހުގީގު ކުރާތާ އަހަރެއް ފަހުން އެ ކުންފުނީގެ ކުރީގެ އެމްޑީ އަހުމަދު ޝަރީފްގެ ޕާސްޕޯޓު އިއްޔެ ހިފަހައްޓައިފި އެވެ.
އޭސީސީގެ މީޑިއާ އޮފިޝަލް އައިޝަތު ސަމާ "އަދަދު" އަށް ވިދާޅުވީ އެ ކޮމިޝަނުން ތަހުގީގު ކުރަމުންދާ ސްޓެލްކޯގެ މައްސަލަތަކާ ގުޅިގެން ޝަރީފްގެ ޕާސްޕޯޓު ހިފަހައްޓާފައިވާ ކަމަށެވެ.
ނަމަވެސް ތަހުގީގު ކުރަމުންދާ މައްސަލަތަކާ ގުޅޭ އިތުރު އެއްވެސް ތަފްސީލެއް ސަމާ ދީފައެއް ނުވެ އެވެ.
"ޕާސްޕޯޓް ހިފެހެއްޓީ އިއްޔެ. ކޮމިޝަނުން ތަހުގީގު ކުރާ ސްޓެލްކޯގެ މައްސަލަތަކާ ގުޅިގެން ޕާސްޕޯޓް ހިފެހެއްޓީ. މިވަގުތު އިތުރު ތަފްސީލެއް ދެވޭކަށް ނެތް،" ސަމާ ވިދާޅުވި އެވެ.
މިދިޔަ އަހަރުން ފެށިގެން އޭސީސީން ދިޔައީ ސްޓެލްކޯގެ މައްސަލަތައް ބަލަމުންނެވެ. ނަމަވެސް އޭރު ވެސް އެއްވެސް ތަފްސީލެއް އޭސީސީން ދީފައެއް ނުވެ އެވެ.
އޭސީސީގައި ކޮރަޕްޝަނުގެ މައްސަލަތައް ފުނި ޖެހިފައިވާއިރު، އެ ކޮމިޝަނުން މައްސަލަތައް ބަލާ ގޮތުގެ އިންސާފުވެރިކަމާ ގުޅޭ ގޮތުން ގިނަ ބަޔަކު ދަނީ ސުވާލު އުފައްދަމުންނެވެ.
