ޕެރިސް (ޖެނުއަރީ 14) - އިނގިރޭސި ކްލަބްތައް ފާރަލަމުން ދިޔަ ނަޕޯލީ އަށް ކުޅޭ ޖޯޖިއާގެ ތަރި، ކްވިޗާ ކްވަރަޝްކޭލިއާ ފްރާންސްގެ ޗެމްޕިއަން، ޕީއެސްޖީ އަށް ބަދަލުވާން އެއްބަސްވުމަކަށް އަތުވެފައިވާ ކަމަށް ރިޕޯޓްތައް ބުނެފި އެވެ.
ފްރާންސާއި އިޓަލީގެ މީޑިއާ ރިޕޯޓްތައް ބުނާގޮތުން، ކްވަރަޝްކޭލިއާ ގަންނަން ޕީއެސްޖީން ހުށަހެޅި 80 މިލިއަން ޑޮލަރުގެ ބިޑަށް ނަޕޯލީން ވަނީ އެއްބަސްވެފަ އެެވެ. އަދި ޕީއެސްޖީން ހުށަހަޅަން ނިންމާފައިވާ ފަސް އަހަރުގެ ކޮންޓްރެކްޓަށް ވެސް ކްވަރަޝްކޭލިއާ އެއްބަސްވެފައިވާ ކަމަށްވެ އެވެ.
ކްވަރަޝްކޭލިއާ ހޯދަން މީގެ ކުރިން މެންޗެސްޓާ ސިޓީން މަސައްކަތްކުރިއިރު، މި ފަހަރު އެ ރޭހުގައި މަޝްވަރާކުރީ، މެންޗެސްޓާ ޔުނައިޓެޑާއި ލިވަޕޫލުންނެވެ. އެކަމަކު، އެ ދެ ޓީމުގެ ޕްރޮޕޯސަލަށް މާ ބޮޑަށް ނުވިސްނައި، ކްވަރަޝްކޭލިއާ ނިންމީ ޕީއެސްޖީގެ ކޯޗު ލުއިސް އެންރީކޭއާ އެކު މަސައްކަތް ކުރުމަށެެވެ.
ޖޯޖިއާގެ ޑިނަމޯ ބަޓޫމީ ދޫކޮށް 10 މިލިއަން ޑޮލަރުގެ އަގަކަށް 2022 ވަނަ އަހަރުގެ ޖުލައި މަހު ނަޕޯލީ އަށް ބަދަލުވި ކްވަރަޝްކޭލިއާގެ ޑިމާންޑް ބޮޑުވުމާ ގުޅިގެން، އޭގެ ޖެހިގެން އައި އަހަރު، ނަޕޯލީގެ ރައީސް އައުރޭލިއަން ޑީ ލައުރެންޓީސް ވިދާޅުވި 100 މިލިއަން ޑޮލަރަށް ވެސް ނުވިއްކާނެ ކަމަށެވެ. އެކަމަކު، ނަޕޯލީން މި ފަހަރު ކްވްރަޝްކޭލިއާ އެ ދޫކޮށްލަނީ އޭނާ ކްލަބްގައި އެ ގޮތަށް އެދިގެންނެވެ.
