އޮފް-ޝޯ ފައިނޭންސިންގެ ހިދުމަތް ދިނުމަށް ސަރުކާރުން އުފެއްދި މޯލްޑިވްސް އިންޓަނޭޝަނަލް ފައިނޭންޝަލް ސާވިސަސް އޮތޯރިޓީގެ ޗެއާޕާސަން އަބްދުﷲ ޖިހާދުގެ މައްޗަށް ދައުލަތުން އުފުލި ހިޔާނާތުގެ ދައުވާ ކްރިމިނަލް ކޯޓުން ބޭރުކޮށްލަން ކުރި ހުކުމް ބާތިލުކޮށް، އެ މައްސަލަ އެ ކޯޓުގައި އަލުން ކުރިއަށް ގެންދިޔުމަށް ހައި ކޯޓުން އިއްޔެ އަމުރުކޮށްފި އެވެ.
ކްރިމިނަލް ކޯޓުން ޖިހާދުގެ މައްޗަށް އުފުލި ދައުވާ ބާތިލު ކުރީ ތަހުގީގު ފެށި ސަބަބު ޖިހާދަށް އަންގާފައި ނުވުމާއި ކުރީގެ ނައިބު ރައީސް އަހުމަދު އަދީބުގެ ބަޔާނުގެ ސައްހަކަން ކަށަވަރު ކޮށްފައިވާކަން އެނގެން ނެތުމުން ކަމަށް ބުނެ އެވެ. އެއީ ތަހުގީގަށް އޮތް އުނިކަމެއް ކަމަށާއި އެއީ ދައުވާ އުފުލުމުގައި އޮތް އުނި ކަމެއްކަން ކްރިމިނަލް ކޯޓުގެ ނިންމުގައި ފާހަގަކޮށްފައިވެ އެވެ.
ނަމަވެސް ހައި ކޯޓުން އިއްޔެ ކުރި ހުކުމުގައި ބުނީ އެ ކަންކަމަކީ ދައުވާ އުފުލުމުގައިވާ އުނިކަމެއް ކަމުގައި ދަށު ކޯޓުގެ ފަނޑިޔާރު ނިންމީ ކޮން ސަބަބަކާ ހުރެ ކަމެއް އަދި ކޮން ގާނޫނީ އަސާސަކަށް ބުރަވެ ކަމެއް ދަށު ކޯޓުގެ ނިންމުމުގައި އެނގެން ނެތް ކަމަށެވެ.
މީގެ އިތުރުން ދަށު ކޯޓުން ޖިހާދުގެ ތަހުގީގުގެ ބަޔާނުގެ އޯޑިއޯ ރެކޯޑިއަށް ރިއާޔަތްކުރިނަމަ، އަލުން ތަހުގީގު ކުރަން ނިންމި ސަބަބު ޖިހާދަށް ބުނެދެވުނުކަން ދަށު ކޯޓަށް ސާފުވާނެ ކަމަށާއި ދަށު ކޯޓުން ނިންމި ނިންމުމަށް ބަލާއިރު އެ ރެކޯޑިންއަށް ރިއާޔަތްކުރެވުނުކަން އެނގެން ނެތްކަން ވެސް ހައި ކޯޓުން ކުރި ހުކުމުގައި ފާހަގަކުރި އެވެ.
ހައި ކޯޓުން ކްރިމިނަލް ކޯޓުގެ ނިންމުން ބާތިލުކޮށް މައްސަލަ ދަށު ކޯޓުން އަލުން ބަލަން އަމުރުކުރީ ފަނޑިޔާރު ހުސެއިން މަޖީދު، ފަނޑިޔާރު މުހައްމަދު ނިޔާޒް އަދި ފަނޑިޔާރު މުހައްމަދު ފައިސަލްގެ އިއްތިފާގުންނެވެ.
ޕްރޮސެކިއުޓާ ޖެނެރަލްގެ އޮފީހުން ޖިހާދުގެ މައްޗަށް ދައުވާ ކުރަނީ ފުށިދިއްގަރުފަޅު ސްޕެޝަލް ޓުއަރިސްޓް ޒޯނެއްގެ ގޮތުގައި ތަރައްގީ ކުރުމަށް ޖެނުއަރީ، 2013، ގައި ފައިނޭންސް މިނިސްޓަރަކަށް ހުންނަވައި ޖިހާދު ސޮއި ކުރެއްވި މައްސަލައިގަ އެވެ.
އެއިރު ސަރުކާރުން ސޮއި ކުރީ ޖޮއިން ވެންޗާ އެގްރިމެންޓެއްގައި ޕްރައިމް ކެޕިޓަލް މޯލްޑިވްސް ލިމިޓެޑާއެކު އެވެ. ޖިހާދު ސޮއި ކުރެއްވި އެގްރިމެންޓުގައި ސަރުކާރުގެ ހިއްސާގެ ގޮތުގައި އޮތީ 25 ޕަސެންޓެވެ. އެކަމަކު ސްޕެޝަލް ޓުއަރިޒަމް ޒޯނެއްގައި ގޮތުގައި ތަރައްގީ ކުރާ ތަންތަނުގައި މަދުވެގެން ސަރުކާރުގެ 50 ޕަސެންޓު ހިއްސާ އޮންނަންޖެހޭނެ ކަމަށް ނެޝަނަލް ޕްލޭނިން ކައުންސިލުން އޮތީ ލަފާ ދީފަ އެވެ.
އެހެންވެ ދައުލަތުން ޖިހާދުގެ މައްޗަށް ކުރާ ދައުވާއަކީ "ރައްޔިތުންނަށް ނުވަތަ ދައުލަތަށް ފައިދާއެއް ލިބެން އޮތް ކަމެއްގައި އެ ނޫން ގޮތަކަށް އަމަލުކުރުމުގެ ކުށުގެ ދައުވާ" އެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ނައިބު ރައީސަކަށް ޖިހާދު ހުންނެވިއިރު ދިރިއުޅުއްވި ރެހެންދި-3 ފްލެޓު ހުސް ނުކުރި މައްސަލައިގައި ވެސް ދައުލަތުން ސިވިލް ކޯޓުގައި އޭނާގެ މައްޗަށް ދައުވާއެއް އުފުލި އެވެ. ނަމަވެސް މި ސަރުކާރުން ޖެނުއަރީ، 2024، ގައި ވަނީ އެ ދައުވާ އަނބުރާ ގެންގޮސްފަ އެވެ.
