ގޯލްޑަން ފުޓްސަލް ޗެެލެންޖަކީ ރާއްޖޭގައި ބާއްވާ މުބާރާތްތަކުގެ ތެރެއިން އަހަރުން އަހަރަށް ކުރިއެރުން ފެންނަ އެންމެ ބޮޑު މުބާރާތް ކަމަށް ގއ. ދެއްވަދޫ ޓީމުގެ ތަރި، ހުޒައިފަތު ރަޝީދު (ހުޒޭ) ބުނެފި އެވެ.
ގޯލްޑަން ފުޓްސަލް ޗެލެންޖްގެ އެންމެ ފުރަތަަމަ ޗެމްޕިއަނުން ކަމަށްވާ ބ. ހިތާދޫ ޓީމަށް އެ ފަހަރު ކުޅުނު ހުޒޭ ބުނެފައިވަނީ، ގޯލްޑަން އަކީ ރާއްޖޭގައި ބާއްވާ އެންމެ ބޮޑު މުބާރާތް ކަމަށާއި މި ފަހަރު ވެސް 100 އަށް ވުރެ ގިނަ ޓީމު ބައިވެރިވެފައިވާތީވެ، ގޯލްޑަން ފެންނަނީ އެންމެ ވަރުގަދަ މުބާރާތުގެ ގޮތުގައި ކަމަށެވެ.
"ގޯލްޑަން އަނެއްހެން ބުނަންޏާ 2015 ގައި ކަންނޭނގެ އަޅުގަނޑު ހަނދާން ވަނީ މި ފެށީ. ދެން، މިހާރު ބަލައިފިއްޔާމު ވަރަށް ބޮޑު އިމްޕްރޫވްމަންޓެއް އައިސްފި. ރާއްޖޭގައި މި އަށް ވުރެ ބޮޑު މުބާރާތެއް ނުބާއްވާނެ ކަންނޭނގެ،" ހުޒޭ ބުންޏެވެ.
ހިތާދޫގެ އިތުރުން، މ. ދިއްގަރަށް ވެސް ކުޅެފައިވާ ހުޒޭގެ އިތުރުން މި ފަހަރު ދެއްވަދޫ ޓީމަށް ވަނީ އިތުރު ކުޅުންތެރިން ވެސް ގެނެސްފަ އެވެ. އެއީ، މުހައްމަދު އިމްރާން (އިންމި)، ޝިފާޒް އާދިލް (ތުއްތު)، މުހައްމަދު ޝަފީއު (ޗެކް) އެވެ. މި ކުޅުންތެރިންނާ އެކު، ވަރުގަދަ ޓީމެއް އެކުލަވާލައިގެން ނުކުމެ، ދެއްވަދޫން ވަނީ ކުޅުނު ދެ މެޗުން ވެސް ފަރަގު ބޮޑުކޮށް މޮޅުވެފަ އެެވެ.
ފުރަތަމަ މެޗުގައި ވިލިނގިލި އަތުން 6-1 އިން މޮޅުވިއިރު، ރޭ ކުޅުނު މެޗުން ވަނީ، 14-1 އިން ކޮލަމާފުށި ބަލިކޮށްފަ އެވެ.
"މިދިޔަ އަހަރުއްސުރެން އެ މީހުން (ދެއްވަދޫން) ވަރަށް ބޮޑަށް ރެޑީވެފައި މި އިނީ ގޯލްޑަން އަށް. މި ފަހަރު ސީދާ ދެވެން އިން އެންމެ ދުރަށް ގޮސް ގޯލްޑަން ނަގަން މި ބޭނުންވަނީ. ވަރަށް ބޮޑަށް ދެއްވަދޫން މީނީ ރެޑީވެފައި،" ހުޒޭ ބުންޏެވެ.
ދެއްވަދޫން ކުޅުނު ފުރަތަމަ މެޗުގައި އަނިޔާގެ ސަަބަބުން ނުކުޅެވުނު ހުޒޭ ވަނީ ރޭގެ މެޗުގައި ހަތަރު ގޯލު ޖަހައި މެޗުގެ މޮޅު ކުޅުންތެރިޔާގެ މަގާމު ހޯދައިފަ އެވެ.
ފުރަތަމަ ދެ މެޗުން ހޯދި މޮޅާ އެކު، ދެއްވަދޫން ވަނީ ސެމީގެ ފުރުސަތު ބޮޑުކޮށްފަ އެވެ. އަބްދުﷲ ހަނީފް (ބެންޖޯ)ގެ ކޯޗުކަމުގައި ކުޅޭ ދެއްވަދޫން ގްރޫޕްގައި ކުޅޭ ފަހު މެޗުގައި، މި މަހު 18 ވަނަ ދުވަހު ކުޅޭނީ މާމެންދޫއާ އެވެ.
