ގޯލްޑަން ފުޓްސަލް ޗެލެންޖު 2025 ގައި ރޭ އައްޑޫ ސިޓީގެ މެޗުތައް ފެށިގެންދިޔައިރު، މަރަދޫގެ މައްޗަށް 3-0 އިން ކުރިހޯދައި ހިތަދޫން ފުރަތަމަ މޮޅު ހޯދައިފި އެވެ.
އައްޑޫ ސިޓީން މި ފަހަރުގެ ގޯލްޑަން ފުޓްސަލް ޗެލެންޖުގައި، ހަ ޓީމެއް ވާދަކުރާއިރު، ދެ ގްރޫޕަށް ވަނީ ބަހާލައިފަ އެވެ. އައްޑޫ ސިޓީގެ ފުރަތަމަ މެޗުތައް، ކުރިއަށްދަނިކޮށް ރޭ ވަނީ ހުޅުމާލޭ ފޭސް ވަންގެ ބޮޑު ސަރަހައްދަކުން ކަރަންޓް ގޮސް، 20 ވަރަަކަށް މިނިޓަށް މެޗު މެދުކަނޑާލަން ޖެހިފަ އެވެ.
ގްރޫޕް ބީގައި ރޭ ކުޅުނު މެޗުން ހިތަދޫ މޮޅުވިއިރު، އެ ޓީމުގެ ލަނޑުތައް ޖެހީ، ހާޒިމް ފައުޒީ، އީމާން ނަޒީރު އަދި މުހައްމަދު ދާނިޝް އިބްރާހިމް އެވެ. މި ގްރޫޕްގައި ދެން ހިމެނެނީ، މީދޫ އެވެ.
ގްރޫޕް އޭގައި ރޭ ކުޅުނީ، ފޭދޫ އާއި މަރަދޫފޭދޫ އެވެ. އެ މެޗު ނިމިފައިވަނީ، 2-2 އިން އެއްވަރުވެގެންނެވެ. މި މެޗުގައި، ފޭދޫ އަށް ލީޑުގައިދިނީ، އަހުމަދު ޒައުލް ނާޒިމް އެވެ. މަރަދޫފޭދޫގެ ކެޕްޓަން، އިބްރާހިމް ސައިފް ޖެހި ގޯލުން އެ ޓީމުން ނަތީޖާ ހަމަހަމަކުރިއިރު، އަލުން ފޭދޫން ލީޑުނެގީ، އެ ޓީމުގެ ކެޕްޓަން، ހުސެއިން ގައްސާން ލަބީބް (ހުސީ) ޖެހި ލަނޑުންނެވެ. މަރަދޫފޭދޫން އެއްވަރުކުރީ އޭރިއާބޭރުން، ހުސެއިން ޒައިދާން މުހައްމަދު އަލީ ޖެހި ގޯލުންނެވެ.
ގޯލްޑަން ފުޓްސަލް ޗެލެންޖުގައި ރޭ ވަނީ މ. އަތޮޅުގެ ފުރަތަމަ މެޗު ވެސް ކުޅެފަ އެވެ. އެ މެޗު ނިމިފައިވަނީ، މ. މުލި އާއި ކޮޅުފުށި ވާދަކޮށްގެން ދެ ޓީމުން ކުރެ އެއްވެސް ޓީމަކަށް ލަނޑެއް ނުޖެހި އެވެ. މ އަތޮޅުގެ ގްރޫޕް އޭގައި ހަތަރު ޓީމު ކުޅޭއިރު، ގްރޫޕް ބީގައި ކުޅެނީ ތިން ޓީމެވެ.
ގޯލްޑަން ފުޓްސަލް ޗެލެންޖުގައި މިރޭ ކުޅޭ މެޗުތައް:
20:00: ލ. މާވަށް - ލ. ގަން
20:00: ލ. މުންޑޫ - ލ. ކަލައިދޫ
21:00: މ. މުލައް - މ. ވޭވަށް
21:00: މ. މަޑުއްވަރީ - މ. ދިއްގަރު
22:00: ގއ. ދާންދޫ - ގ. ކަނޑުހުޅުދޫ
22:00: ގއ. ގެމަނަފުށި - ގއ. ނިލަންދޫ
23:00: ގއ. ދެއްވަދޫ - ގއ. ކޮލަމާފުށި
23:00: ގއ. މާމެންދޫ - ގއ. ވިލިނގިލި
